(ភ្នំពេញ)៖ លោកឧត្តមសេនីយ៍ឯកបណ្ឌិត សៅ សុវណ្ណី នៅថ្ងៃទី២៩ ខែមិថុនា ឆ្នាំ២០២៦ ទទួលបានសញ្ញាបត្រសាស្ត្រាចារ្យទស្សនវិជ្ជា ផ្នែកវិទ្យាសាស្ត្រនយោបាយ (Professor of Philosophy in Political Science) ពីសាកលវិទ្យាល័យ Universal Ministries of the King’s College នៃសហរដ្ឋអាមេរិក នៅប្រទេសសិង្ហបុរី។

ជាមួយគ្នានេះ កាលពីថ្ងៃទី៣០ ខែមករា ឆ្នាំ២០២៦ កន្លងទៅនេះ លោកបណ្ឌិតក៏បានទទួលសញ្ញាបត្របណ្ឌិតបន្ថែមមួយទៀត គឺសញ្ញាបត្រ «បណ្ឌិតទស្សនវិជ្ជា វិទ្យាសាស្ត្រ នយោបាយ - Doctor of Philosophy In Political Science» ពីសាកលវិទ្យាល័យ Universal Ministries of The King's College សហរដ្ឋអាមេរិកផងដែរ។

នៅក្នុងឱកាសទទួលបានសញ្ញាបត្រ សាស្ត្រាចារ្យទស្សនវិជ្ជា ផ្នែកវិទ្យាសាស្ត្រនយោបាយ, ឧត្តមសេនីយ៍ឯកបណ្ឌិត សៅ សុវណ្ណី បានឲ្យដឹងថា ថ្ងៃនេះ គឺជាពេលវេលាដ៏មានអត្ថន័យ និងជាមោទនភាពបំផុតក្នុងជីវិតរបស់លោក ដែលត្រូវទទួលបានសញ្ញាបត្រជាសាស្ត្រាចារ្យទស្សនវិជ្ជា ផ្នែកវិទ្យាសាស្ត្រនយោបាយ ពីសំណាក់ Universal Ministries of the King’s College។

លោកបណ្ឌិតបានបន្តថា ទស្សនវិជ្ជា និងវិទ្យាសាស្ត្រនយោបាយ គឺជាត្រីវិស័យដ៏សំខាន់ក្នុងការដឹកនាំ, ការកសាងសន្តិភាព, ការអភិវឌ្ឍសង្គម និងការលើកកម្ពស់តម្លៃមនុស្សជាតិ។ ការទទួលបានសញ្ញាបត្រ ជាសាស្ត្រាចារ្យទស្សនវិជ្ជា ផ្នែកវិទ្យាសាស្ត្រនយោបាយ ដ៏ឧត្តុង្គឧត្តមនាពេលនេះ មិនមែនជាការបញ្ចប់នៃការសិក្សាស្រាវជ្រាវនោះទេ ផ្ទុយទៅវិញ វាគឺជាការចាប់ផ្តើមថ្មីមួយ ដែលតម្រូវឱ្យលោកបន្តខិតខំប្រឹងប្រែងលះបង់ កម្លាំងកាយចិត្ត បញ្ញាស្មារតី ក្នុងការស្រាវជ្រាវ បង្រៀន និងចែករំលែកចំណេះដឹងទាំងនេះដល់យុវជន សហគមន៍ និងសង្គមជាតិទាំងមូលផងដែរ៕