(ភ្នំពេញ)៖ លោក ឃឹម ហ្វីណង់ អ្នកនាំពាក្យក្រសួងកសិកម្ម រុក្ខាប្រមាញ់ និងនេសាទ នៅថ្ងៃទី២៩ ខែមិថុនា ឆ្នាំ២០២៦ បានបញ្ជាក់ថាក្រសួងកសិកម្ម បង្ហាញជំហរម៉ឺងម៉ាត់ក្នុងការស្រាវជ្រាវករណីពេទ្យសត្វទារប្រាក់ ៥០០០ដុល្លារ ពីអាជីវករ នៅខេត្តស្ទឹងត្រែង។

កាលពីពេលថ្មីនេះ វីដេអូមួយដែលមានរយៈពេល ១នាទីនិង២៤វិនាទី ត្រូវបានចែកចាយជាបន្តបន្ទាប់ ពាក់ព័ន្ធនឹងការចុះត្រួតពិនិត្យកន្លែងសត្វឃាត្តមួយកន្លែងក្នុងខេត្តស្ទឹងត្រែង។ តាមរយៈវីដេអូនោះ ម្ចាស់អាជីវកម្ម បានឱ្យដឹងថា មានពេទ្យសត្វមកយកលុយ ៥០០០ដុល្លារពីគាត់ ជាថ្នូរនឹងការបង់ពន្ធចូលច្រក ហើយនឹងផ្ដល់ប្រាក់ដែលនៅសល់ពីបង់ពន្ធឱ្យមកវិញ។ ម្ចាស់អាជីវកម្មដដែល បានលើកឡើងថា ពេទ្យសត្វរូបនោះមិនបានបង់ពន្ធ និងបានកុហកលោកអភិបាលខេត្តស្ទឹងត្រែង និងរដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ។

ចំពោះករណីទារប្រាក់ខាងលើ អ្នកនាំពាក្យក្រសួងកសិកម្ម បានបញ្ជាក់ថា ក្រសួង បាននិងកំពុងបើកការស៊ើបអង្កេតលើករណីនេះដោយយកចិត្តទុកដាក់។ លោក ឃឹម ហ្វីណង់ បានឱ្យដឹងដូច្នេះថា៖ «ក្រសួងតែងតែមានជំហរម៉ឺងម៉ាត់ចំពោះបញ្ហាបែបនេះ។ យើងបានទទួលព័ត៌មាន និងកំពុងធ្វើការស្រាវជ្រាវករណីនេះឱ្យបានល្អិតល្អន់ ហើយបើរកឃើញថាពិតជាមានកំហុសឆ្គងមែន ក្រសួងនឹងមិនញញើតក្នុងការចាត់វិធានការឡើយ។
តែបើវាគ្រាន់តែជាការមួលបង្កាច់ទៅវិញ ក្រសួងក៏នឹងមានវិធានការតាមផ្លូវច្បាប់ចំពោះបុគ្គលដែលព្យាយាមទម្លាក់កំហុសនេះដូចគ្នា»៕