(ព្រះសីហនុ)៖ ក្រុមការងារគណបក្សប្រជាជនកម្ពុជាចុះជួយសង្កាត់រាម ក្រុងកំពង់សោម ក្នុងឱកាសអបអរសាទរខួបលើកទី៧៥ នៃការបង្កើតគណបក្សប្រជាជនកម្ពុជា បានរៀបចំពិធីជួបសំណេះសំណាល និងផ្តល់អំណោយជូនប្រជាពលរដ្ឋដែលជួបការលំបាកខ្វះខាតក្នុងជីវភាពរស់នៅប្រចាំថ្ងៃ ចំនួន៤០គ្រួសារ។

ពិធីនេះបានរៀបចំធ្វើឡើងនៅព្រឹកថ្ងៃទី២៨ ខែមិថុនា ឆ្នាំ២០២៦នេះ ក្រោមវត្តមាន លោក នួន ប៊ុនថុល សមាជិកគណៈ កម្មាធិការគណបក្សខេត្តព្រះសីហនុ និងជាប្រធានគណៈកម្មាធិការគណបក្សក្រុងកំពង់សោម ព្រមទាំងលោក ងួន ឧត្តម ប្រធានក្រុមការងារគណបក្សចុះជួយសង្កាត់រាម និងសមាជិកក្រុមការងារជាច្រើនរូបទៀត នៅស្នាក់ការគណបក្សសង្កាត់រាម ក្រុងកំពង់សោម ខេត្តព្រះសីហនុ។

ក្នុងឱកាសនោះ លោក ងួន ឧត្តម បានមានប្រសាសន៍សំណេះសំណាលជាមួយប្រជាពលរដ្ឋ ដោយលើកឡើងថា ថ្នាក់ដឹកនាំ គណបក្សប្រជាជនកម្ពុជា តែងតែយកចិត្តទុកដាក់ចំពោះសុខទុក្ខ និងជីវភាពរស់នៅរបស់ប្រជាពលរដ្ឋ គ្រប់ពេលវេលា ជាពិសេសការជំរុញឱ្យក្រុមការងារចុះតាមមូលដ្ឋាន ដើម្បីតាមដានស្ថានភាពជីវភាពរស់នៅ ការរក្សាសន្តិសុខ សណ្ដាប់ធ្នាប់ និងការអភិវឌ្ឍលើគ្រប់វិស័យនៅតាមមូលដ្ឋាន។​

លោកបានគូសបញ្ជាក់ថា រដូវនេះជារដូវវស្សាហ៍មានភ្លៀងធ្លាក់ជោគជាំ លាយលំខ្យល់កន្ត្រាក់ ដូច្នេះលោក និងក្រុមការងារ នឹងមានផែនការជាក់លាក់ដើម្បីចុះពិនិត្យតាមខ្នងផ្ទះរបស់ ប្រជាពលរដ្ឋកំពុងជួបការលំបាក ពោលគឺមានជីវភាពខ្វះខាតក្នុងការរស់នៅប្រចាំថ្ងៃ ជាក់ស្តែងកាលកន្លងទៅបន្ទាប់ពីក្រុមការងារបានចុះតាមមូលដ្ឋានគឺមានពិជាមានពលរដ្ឋកំពុងជួបទុកលំបាកថវិការ សម្ភារៈប្រើប្រាស់ ការហូបចុកជាដើម-ល-។

លោកបានបន្តថា នៅថ្ងៃនេះបន្ទាប់ពីបញ្ចប់ការងារចែកអំណោយនៅស្នាក់ការបក្សសង្កាត់រាម លោក ងួន ឧត្តម នឹងដឹកនាំក្រុមការងារទៅពិនិត្យជាក់ស្តែង រួមទាំងបាននាំយកអំណោយទៅប្រគល់ជូនដល់ទីតាំងផ្ទាល់តែងម្តង និងដើម្បីឈានទៅមានផែនការគ្រោងនឹងសាងសង់ផ្ទះជូនពួកគាត់តាមលទ្ធភាពដែលអាចធ្វើទៅបានផងដែរ។

ជាមួយរយៈពេល២ឆ្នាំកន្លងមកនេះ ដែលលោកបានដឹកនាំក្រុមការងារ លោកពិតជាថ្លែងអំណគុណទៅបងប្អូនក្រុមការងារយុវជន ដែលសុទ្ធសឹងជាម្ចាស់អាជីវកម្ម ដែលមានស្មារតី ឆន្ទៈចូលរួមចុះជួយទាំងថវិការ ទាំងសម្ភារៈ កម្លាំងកាយចិត្ត និង ពេលវេលាដ៏មានតម្លៃដើម្បីប្រជាជនយើងទាំងអស់គ្នាកំពុងជួបទុក្ខលំបាកនៅមូលដ្ឋានរាម ក្រុងកំពង់សោមនេះ៕