(ភ្នំពេញ)៖ លោកស្រី យ៉ើ អាស៊ីគីន អនុរដ្ឋលេខាធិការ ក្រសួងកសិកម្ម រុក្ខាប្រមាញ់ និងនេសាទ នៅថ្ងៃទី២៩ ខែមិថុនា ឆ្នាំ២០២៦ បានអញ្ជើញជាអធិបតីក្នុងពិធីបើកកិច្ចសន្ទនាគោលនយោបាយស្តីពី «ការស្រាវជ្រាវនវានុវត្តន៍ដឹកនាំដោយកសិករ ដើម្បីជំរុញការផ្លាស់ប្តូរប្រកបដោយចីរភាពនៃកសិអេកូឡូស៊ី និងប្រព័ន្ធស្បៀងអាហារ»។

កម្មវិធីប្រព្រឹត្តទៅនៅសណ្ឋាគារកាំបូឌីយ៉ាណា មានការចូលរួមពីតំណាងអគ្គនាយកដ្ឋានក្សេត្រសាស្រ្ត ក្រសួង-ស្ថាប័នពាក់ព័ន្ធ ស្ថាប័នស្រាវជ្រាវ អង្គការសង្គមស៊ីវិល ដៃគូអភិវឌ្ឍន៍ សហគមន៍កសិកម្ម ក្រុមកសិករ តំណាងស្ត្រី យុវជន ជនជាតិដើមភាគតិច និងបងប្អូនកសិករ សរុបប្រមាណ១២០រូប។

ថ្លែងនាឱកាសនោះ លោកស្រី យ៉ើ អាស៊ីគីន បានគូសបញ្ជាក់ថា វិស័យកសិកម្មនៅតែជាសសរស្តម្ភអាទិភាពនៃសេដ្ឋកិច្ចជាតិ ស្របតាមយុទ្ធសាស្ត្របញ្ចកោណ-ដំណាក់កាលទី១ និងផែនទីបង្ហាញផ្លូវសម្រាប់ប្រព័ន្ធស្បៀងប្រកបដោយចីរភាពឆ្នាំ២០៣០ សំដៅប្រែក្លាយកសិកម្មកម្ពុជាទៅជាកសិកម្មទំនើប មានការប្រកួតប្រជែង បរិយាបន្ន និងភាពធន់។

ទន្ទឹមនឹងនោះ ដើម្បីបំប្លែងកិច្ចសន្ទនានេះទៅជាសកម្មភាពជាក់ស្តែង លោកស្រីបានផ្តល់អនុសាសន៍គន្លឹះចំនួន៣រួមមាន៖

ទី១) ការបង្កើតយន្តការវេទិកាចែករំលែកបទពិសោធល្អៗ៖ បង្កើតបណ្តាញរួមដើម្បីឱ្យកសិករ អ្នកស្រាវជ្រាវ និងដៃគូអភិវឌ្ឍន៍ ផ្លាស់ប្តូរម៉ូដែលអាជីវកម្ម និងបច្ចេកវិទ្យាជោគជ័យ។

ទី២) ផ្តោតលើនវានុវត្តន៍កសិអេកូឡូស៊ីដែលផ្តល់ផលប្រយោជន៍ទ្វេរដង៖ ធានាឱ្យមានតុល្យភាពរវាង «ចំណូលកសិករ» និង «និរន្តរភាពបរិស្ថាន» តាមរយៈការកាត់បន្ថយថ្លៃដើម បង្កើនទិន្នផល និងបង្កើតតម្លៃបន្ថែមលើទីផ្សារ។

ទី៣) ជំរុញសកម្មភាពរួមគ្នារវាងរដ្ឋ និងឯកជន៖ រដ្ឋ និងដៃគូអភិវឌ្ឍន៍គាំទ្រផ្នែកគោលនយោបាយ និងបច្ចេកទេស ចំណែកឯវិស័យឯកជនវិនិយោគលើខ្សែច្រវាក់តម្លៃ និងធានាការបញ្ជាទិញកសិផលក្នុងតម្លៃសមរម្យ។

ជាទីបញ្ចប់ លោកស្រីបានថ្លែងអំណរគុណយ៉ាងជ្រាលជ្រៅចំពោះ សមាគមខាំបូដ្រា (CamboDHRRA) ដែលបានគាំទ្រប្រជាកសិករនាពេលកន្លងមក និងបានអំពាវនាវដល់គ្រប់ភាគីពាក់ព័ន្ធទាំងអស់ (CamboDHRRA, AFD, WVI-C, ALiSEA) ព្រមទាំងបងប្អូនកសិករ ចូលរួមគាំទ្រឱ្យបានកុះករក្នុងព្រឹត្តិការណ៍ «វេទិកា និងពិព័រណ៍កសិកម្មកម្ពុជាឆ្នាំ២០២៦(CAFE26)» នាខាងមុខនេះ ដើម្បីរួមគ្នាបន្តលើកកម្ពស់កសិកម្ម ប្រកបដោយនិរន្តរភាពនៅកម្ពុជា៕