(បរទេស)៖ ក្រុមមកពីអាហ្រ្វិក ម៉ារ៉ុក បានទៅវគ្គ ១៦ក្រុមនៃព្រឹត្តិការណ៍បាល់ទាត់ជើងឯកពិភពលោក FIFA World Cup 2026 ដោយត្រូវប៉ះសហម្ចាស់ផ្ទះកាណាដា ក្រោយយកឈ្នះហូឡង់ នៅតំបន់ហូឡង់ដោយបាល់ ១១ម៉ែត្រកាត់សេចក្តី ៣-២ នាព្រឹកថ្ងៃអង្គារ ទី៣០ ខែមិថុនានេះ (ម៉ោងនៅកម្ពុជា) ក្រោយលេង ១២០នាទីស្មើគ្នា ១-១។

ម៉ារ៉ុក បានឆ្លងចូលវគ្គពាក់កណ្តាលផ្តាច់ព្រ័ត្រម្តងដែរកាលឆ្នាំ២០២២ នៅកាតា គ្រាដែលហូឡង់ អតីតក្រុមរងជើងឯកកាល World Cup 2010 នៅអាហ្រ្វិកជាក្រុមនៅតំបន់អឺរ៉ុប (UEFA) ទី២ ដែលបានហាលអាវត្រឹមវគ្គចាញ់-ធ្លាក់ ៣២ក្រុម បន្ទាប់ពីក្រុមខ្លាំងឥន្រ្ទីដែកអាល្លឺម៉ង់ហាលអាវ ក្រោយចាញ់ប៉ារ៉ាហ្គាយដោយបាល់ ១១ម៉ែត្រកាត់សេចក្តីនាព្រឹកមិញដែរ។

នេះមានន័យថា វគ្គ ១៦ក្រុមចុងក្រោយនៃ World Cup ជំនាន់ទី២៣ ដែលរៀបចំនៅតំបន់អាមេរិកខាងជើង រួមមានសហរដ្ឋអាមេរិក មិចស៊ិក និងកាណាដាធ្វើម្ចាស់ផ្ទះរួមគ្នានោះ រកបាន ៤ក្រុមហើយដោយរួមមាន កាណាដា ប្រេស៊ីល ប៉ារ៉ាហ្គាយ និងម៉ារ៉ុក នៅពេលក្រុមហាលអាវរួមមាន ជប៉ុន នៅអាស៊ី និងអាល្លឺម៉ង់ ហូឡង់ នៅតំបន់អឺរ៉ុបសុទ្ធតែត្រឡប់ទៅផ្ទះវិញដូចៗគ្នា។

វគ្គ ១៦ក្រុមនៃ World Cup 2026 សហម្ចាស់ផ្ទះកាណាដា ត្រូវប៉ះម៉ារ៉ុក នៅពេលប៉ារ៉ាហ្គាយ ត្រូវរង់ចាំក្រុមឈ្នះរវាងបារាំង ឬក៏ស៊ុយអែត នៅពេលប្រេស៊ីល ត្រូវរង់ចាំក្រុមឈ្នះរវាងកូដឌីវ័រ ឬក៏ន័រវេស៕