(កំពង់ធំ)៖ លោក ហាក់ ម៉ុងហួត អភិបាលស្រុកតាំងគោក និងសហការី នាព្រឹកថ្ងៃទី៣០ ខែមិថុនា ឆ្នាំ២០២៦នេះ បានអញ្ជើញចុះជួប​សំណេះសំណាល សាកសួរទុក្ខ ក៏ដូចជាស្តាប់​នូវរាល់បញ្ហា សំណើ និងសំណូមពរផ្ទាល់​ពីបងប្អូនប្រជាពលរដ្ឋ រស់នៅក្នុងភូមិគោកត្របែក ឃុំស្រឡៅ ស្រុកតាំងគោក ខេត្តកំពង់ធំ។

ក្នុងជំនួបដ៏ស្និទ្ធស្នាលនោះលោក ហាក់ ម៉ុងហួត បានពាំនាំនូវប្រសាសន៍ផ្តាំផ្ញើសួរសុខទុក្ខពីសំណាក់ថ្នាក់ដឹកនាំគ្រប់លំដាប់ថ្នាក់ ជូនចំពោះប្រជាពលរដ្ឋ​ទាំងអស់ ដោយក្តីនឹករលឹក និងការយកចិត្តទុកដាក់​ខ្ពស់បំផុត​លើជីវភាពរស់នៅរបស់ប្រជាពលរដ្ឋ​នៅតាមមូលដ្ឋាន។

ឆ្លៀតក្នុងឱកាសនោះដែរ លោកអភិបាលស្រុក បានបើកឱកាសឱ្យប្រជាពលរដ្ឋលើកឡើងនូវបញ្ហាប្រឈម ស្វែងយល់ពីការលំបាកជាក់ស្តែង​ក្នុងការងារបង្កបង្កើនផល និងជីវភាពប្រចាំថ្ងៃ បញ្ហាអត្រានុកូលដ្ឋាន អត្តសញ្ញាណបណ្ណ សំណើ និងសំណូមពរផ្សេងៗ ហើយរាល់បញ្ហាទាំងអស់​របស់ពលរដ្ឋ ត្រូវកត់ត្រាទុក ដើម្បីស្វែងរក​ដំណោះស្រាយបានទាន់ពេលវេលា។

ក្រៅពីនេះលោក ហាក់ ម៉ុងហួត បានណែនាំឱ្យមន្រ្តី​ជំនាញផ្សព្វផ្សាយ និងជម្រាបជូនប្រជាពលរដ្ឋ​យ៉ាងក្បោះក្បាយអំពីបញ្ហាផ្សេងៗ ជាពិសេសគឺ «វិធានការទប់ស្កាត់នូវបទល្មើសនេសាទ» ដោយបានសង្កត់ធ្ងន់លើចំណុចសំខាន់ៗ រួមមាន៖ ការអប់រំ និងណែនាំប្រជាពលរដ្ឋ​កុំឱ្យមានការប្រើប្រាស់ឧបករណ៍នេសាទខុសច្បាប់ និងបំផ្លិចបំផ្លាញ (ដូចជា ឧបករណ៍ឆក់ ឬមុងក្រឡាញឹក)។ ការបំផុសស្មារតីឱ្យប្រជាពលរដ្ឋ​ចូលរួមសហការជាមួយអាជ្ញាធរមានសមត្ថកិច្ច ក្នុងការរាយការណ៍ពីបទល្មើសនេសាទ ដើម្បីរួមគ្នាការពារធនធានជលផលឱ្យបានគង់វង្សសម្រាប់កូនចៅជំនាន់ក្រោយ។

លោកអភិបាលស្រុក ក៏បានអញ្ជើញចុះពិនិត្យ​មើលវឌ្ឍនភាពនៃការងារបង្កបង្កើនផល និងដំណាំរួមផ្សំផ្សេងៗរបស់ប្រជាកសិករនៅក្នុងមូលដ្ឋានមិគោកត្របែក ដោយផ្ទាល់ផងដែរ៕