(កណ្ដាល)៖ ថ្នាក់ដឹកនាំមន្ទីរសុខាភិបាលនៃរដ្ឋបាលខេត្តកណ្តាល សហការជាមួយអាជ្ញាធរក្រុងសំពៅពូន កាលពីថ្ងៃទី២៩ ខែមិថុនា ឆ្នាំ២០២៦ បានផ្សព្វផ្សាយ ស្តីពីការគ្រប់គ្រងករណីរាតត្បាតជំងឺគ្រុនឈាម ជាមួយនឹងប្រជាពលរដ្ឋក្នុងមូលដ្ឋានសង្កាត់ព្រែកជ្រៃ។

នាឱកាសនោះ លោក គៀម ពិសិដ្ឋ ប្រធានមន្ទីរសុខាភិបាលស្តីទី បានធ្វើការផ្សព្វផ្សាយអប់រំ និងផ្តល់អនុសាសន៍ចំនួន ដើម្បីមានវិធានការទប់ស្កាត់ការរាតត្បាតជំងឺគ្រុនឈាម ដូចខាងក្រោម៖

*ទី១៖ បងប្អូនប្រជាពលរដ្ឋ អាណាព្យាបាល រួមជាមួយអាជ្ញាធរមូលដ្ឋាន ត្រូវចូលរួមកម្ចាត់ដង្កូវទឹកនៅទីកន្លែងដែលមានទឹកដក់ ដូចជាពាង អាងទឹក ថូផ្កា ចានទ្រជើងតុទូ ក្រឡ ធុង ជាដើម និងត្រូវផ្លាស់ប្តូរទឹក និងលាងសម្អាតឱ្យបានជាប្រចាំ
*ទី២៖ ត្រូវប្រកាន់ភ្ជាប់នូវទម្លាប់រស់នៅស្អាត ធ្វើអនាម័យផ្ទះសម្បែង ទុកដាក់សំរាមឱ្យបានត្រឹមត្រូវ លុបបំបាត់ព្រៃស៊ុបទ្រុបជុំវិញផ្ទះ ដើម្បីកាត់បន្ថយជម្រកសត្វមូសខ្លាញី និងគេងក្នុងមុង
*ទី៣៖ ណែនាំឱ្យបុគ្គលិកសុខាភិបាលគ្រប់ថ្នាក់ រួមជាមួយអាជ្ញាធរមូលដ្ឋាន បាញ់ថ្នាំសម្លាប់មូសខ្លាញី និងដាក់ថ្នាំបាណកឃាដសម្លាប់ដង្កូវទឹក នៅក្នុងអាងទឹក ពាងទឹក និងកន្លែងដែលស្តុកទឹកប្រើប្រាស់ផ្សេងៗ
*ទី៤៖ ករណីមានរោគសញ្ញាក្តៅខ្លួនខ្លាំងភ្លាមៗ ត្រូវប្រញាប់នាំអ្នកជំងឺទៅរកសេវាពិនិត្យ និងព្យាបាលរបស់រដ្ឋ (សេវាសាធារណៈ) ដូចជាមណ្ឌលសុខភាព និងមន្ទីរពេទ្យបង្អែកស្រុក និងកុំសាកល្បងព្យាបាលអ្នកជំងឺ គ្រុនក្តៅភ្លាមៗនេះដោយខ្លួនឯង ឬព្យាបាលជំងឺនៅសេវាឯកជនដែលគ្មានសមត្ថភាព។

លោកប្រធានមន្ទីរសុខាភិបាលខេត្តស្តីទី បានបន្តពិនិត្យស្ថានភាព និងសាកសួរសុខទុក្ខអ្នកជំងឺ គ្រុនឈាម ដែលកំពុងស្នាក់ព្យាបាល នៅមន្ទីរពេទ្យតេជោសែន កោះធំ និងផ្ដាំផ្ញើរឲ្យថែទាំសុខភាពឲ្យបានល្អ៕