(សៀមរាប)៖ លោក ង៉ូវ សេងកាក់ អភិបាលរងខេត្តសៀមរាប បានលើកឡើងថា ស្របតាមគោលនយោបាយរបស់រាជរដ្ឋាភិបាល ខេត្តសៀមរាប បាន និងកំពុងបន្តអភិវឌ្ឍខ្លួន ជាគោលដៅទេសចរណ៍ប្រកបដោយគុណភាព សុវត្ថិភាព និងមានបដិសណ្ឋារកិច្ចល្អ។ ការរៀបចំកិច្ចប្រជុំតភ្ជាប់គោលដៅទេសចរណ៍នេះ ដែលគ្រោងនឹងធ្វើឡើងនៅថ្ងៃទី២៣-២៤ ខែកក្កដា ឆ្នាំ២០២៦ខាងមុខនេះ ដែលជាយុទ្ធសាស្ត្រគន្លឹះ ដើម្បីពង្រីកបណ្តាញទេសចរណ៍ បង្កើនលំហូរភ្ញៀវ និងជំរុញការចំណាយក្នុងតំបន់។

លោកបានបន្តថា លើសពីនេះរដ្ឋបាលខេត្ត ក៏បានត្រៀមខ្លួនរួចជាស្រេច ដើម្បីអនុវត្តកម្មវិធី «សម្រួលតម្លៃពិសេស» សម្រាប់វិស័យទេសចរណ៍ពេញមួយខែកញ្ញា ឆ្នាំ២០២៦។ កម្មវិធីនេះ រំពឹងថានឹងទាក់ទាញភ្ញៀវទេសចរជាតិ និងអន្តរជាតិ ឱ្យមកទស្សនាកម្សាន្តនៅខេត្តសៀមរាបកាន់តែច្រើនផងដែរ។

ការថ្លែងយ៉ាងដូច្នេះរបស់លោក ង៉ូវ សេងកាក់ នៅកិច្ចប្រជុំបូកសរុបលទ្ធផលការងាររយៈពេល០៦ខែ ដើមឆ្នាំ២០២៦ ព្រមទាំងពិភាក្សាត្រៀមរៀបចំកិច្ចប្រជុំ ស្តីពីការតភ្ជាប់គោលដៅទេសចរណ៍ ខេត្តសៀមរាប ទៅកាន់គោលដៅទេសចរណ៍នានាទូទាំងប្រទេស ដើម្បីជំរុញកំណើនភ្ញៀវទេសចរ និងលើកកម្ពស់សេដ្ឋកិច្ចមូលដ្ឋាន នាថ្ងៃទី២៩ ខែមិថុនា ឆ្នាំ២០២៦នេះ ដោយមានការចូលរួមពីតំណាងអាជ្ញាធរជាតិអប្សរា គ្រឹះស្ថានអង្គរ មន្ទីរអង្គភាពជំនាញ រួមនិងតំណាងវិស័យឯកជនផងដែរ។

លោកអភិបាលរងខេត្ត បញ្ជាក់ថា កិច្ចប្រជុំនេះ មិនត្រឹមតែជាការវាយតម្លៃលទ្ធផលការងាររយៈពេល ៦ខែ កន្លងមកប៉ុណ្ណោះទេ ប៉ុន្តែជាវេទិកាសម្រាប់អ្នកពាក់ព័ន្ធទាំងអស់ ចូលរួមដោះស្រាយបញ្ហាប្រឈម និងរៀបចំផែនការសកម្មភាពឱ្យបានច្បាស់លាស់ ដើម្បីធានាថា កិច្ចប្រជុំស្តីពីការតភ្ជាប់គោលដៅទេសចរណ៍ និងកម្មវិធីសម្រួលតម្លៃពិសេសពេញមួយខែកញ្ញា ឆ្នាំ២០២៦ នឹងប្រព្រឹត្តទៅដោយរលូន និងទទួលបានជោគជ័យ។

ជាមួយនេះដែរ លោក ង៉ូវ សេងកាក់ ក៏បានស្នើដល់មន្ទីរអង្គភាព ស្ថាប័នពាក់ព័ន្ធ និងវិស័យឯកជន បន្តពង្រឹងកិច្ចសហការ សម្របសម្រួល និងបំពេញតួនាទីរៀងៗខ្លួនឱ្យបានសកម្ម ដោយផ្ដោតលើការងាររៀបចំកម្មវិធីសន្តិសុខ សណ្ដាប់ធ្នាប់ អនាម័យ បរិស្ថាន ការដឹកជញ្ជូន ការផ្សព្វផ្សាយ និងការផ្តល់សេវាកម្មប្រកបដោយគុណភាព ដើម្បីធានាបាននូវបទពិសោធន៍ល្អសម្រាប់ភ្ញៀវទេសចរ ដែលមកកម្សាន្តនៅខេត្តសៀមរា៕