(ឆុងឈីង, ចិន)៖ នារសៀលថ្ងៃចន្ទ ទី២៩ ខែមិថុនា ឆ្នាំ២០២៦ ថ្នាក់ដឹកនាំក្នុងវិស័យយុត្តិធម៌ និងថ្នាក់ដឹកនាំក្រសួងមហាផ្ទៃ ចំនួន២រូប បានចូលរួមកម្មវិធីទទួលសញ្ញាបត្រថ្នាក់បណ្ឌិត នៅសកលវិទ្យាល័យ South-West University of Political Science and Law នៅទីក្រុងឆុងឈីង ប្រទេសចិន។

ការទទួលបានសញ្ញាបណ្ឌិតរប​ស់ថ្នាក់ដឹកនាំទាំង២រូប ក្រោយពីបានធ្វើការសិក្សាស្រាវជ្រាវនៅទីនោះអស់រយៈពេល ៤ឆ្នាំ ទាំងទៅផ្ទាល់ និងពីចម្ងាយ។ ឥស្សរជនទាំង២រូប ដែលទទួលបានសញ្ញាបណ្ឌិត គឺលោក ហន សុខេមរិន ប្រធានសាលាដំបូងខេត្តកែប និងលោក លី សុផាណា អនុរដ្ឋលេខាធិការក្រសួងមហាផ្ទៃ។

កម្មវិធីនេះ កើតចេញពីកិច្ចសហប្រតិបត្តិការ ក្នុងវិស័យកំណែទម្រង់ច្បាប់និងប្រព័ន្ធយុត្តិធម៌ រវាងក្រសួងយុត្តិធម៌កម្ពុជា និងមជ្ឈមណ្ឌលស្រាវជ្រាវច្បាប់ចិនអាស៊ាន របស់សមាគមច្បាប់ប្រទេសចិន (China-ASEAN Legal Research Center) ក្រោមគោលនយោបាយខ្សែក្រវ៉ាត់មួយផ្លូវមួយរបស់រដ្ឋាភិបាលចិន ដែលកម្មវិធីបានចាប់ផ្តើមតាំងពីឆ្នាំ២០១៥ និងបានធ្វើការជ្រើសរើសនិងបញ្ជូនថ្នាក់ដឹកនាំ និងមន្រ្តីនៃក្រសួងយុត្តិធម៌ និងតុលាការ និងថ្នាក់ដឹកនាំនៃក្រសួងស្ថាប័ននានា ព្រមទាំងអ្នកវិជ្ជាជីវៈច្បាប់កម្ពុជា ទៅបន្តការសិក្សានៅសកលវិទ្យាល័យ South-West University of Political Science and Law នៅទីក្រុងឆុងឈីង ប្រទេសចិន ជារៀងរាល់ឆ្នាំ ដែលមកដល់ពេលនេះ សម្រាប់វគ្គថ្នាក់បណ្ឌិត និងអនុបណ្ឌិតមាន ៧០រូប៕