(ភ្នំពេញ)៖ កូនសិស្សឆ្នើមពីកម្ពុជា ២រូប​ដណ្តើមបានចំណាត់ថ្នាក់លេខ១ និង ៤រូបទៀត ដណ្តើមបានចំណាត់ថ្នាក់លេខ២ រួមទាំងមេដាយ មាស ប្រាក់ សំរឹទ្ធចំនួន ៣០គ្រឿង ពីការប្រកួតក្នុងព្រឹត្តិការណ៍ TeenEagle Global Finals នៅចក្រភពអង់គ្លេស លើផ្នែកភាសាអង់គ្លេស និងគណិតវិទ្យា ដែលមានសិស្សានុសិស្សឆ្នើមចំនួន ៥៦៥នាក់ មកពី ២៨ប្រទេសជុំវិញពិភពលោក​ចូលរួមប្រកួត។

ការទៅចូលរួមប្រកួតរបស់កូនសិស្សកម្ពុជានេះបានធ្វេីឡេីងក្រោមការសម្របសម្រួលរបស់ B RIGHT EDUCATION CO.,LTD ដែលជាក្រុមហ៊ុនរៀបចំ​ការ​ប្រកួតប្រជែងរបស់សិស្ស ហើយតែងតែរៀបចំ​កម្មវិធីប្រកួតប្រជែងដូចនេះជាបន្តបន្ទាប់ សម្រាប់អាណាព្យាបាលដែលមានបំណងចង់ឱ្យកូនសិស្ស ចូលរួមប្រកួតប្រជែងដូចនេះ។

នាឱកាសនាំយកជយលាភី និងមេដាយជូនជាតិ នាថ្ងៃទី២៩ ខែមិថុនា ឆ្នាំ២០២៦ តំណាងសិស្សកម្ពុជា បានវាយតម្លៃខ្ពស់ពីការប្រកួតលំដាប់ថ្នាក់អន្តរជាតិនេះ និងបញ្ជាក់ពីការខិតខំប្រឹងប្រែងរៀនសូត្រ ដេីម្បីត្រៀមខ្លួនជាស្រេច មុនឈានដល់ការប្រកួត និងទទួលបានភាពជោគជ័យដូចនេះ និងបានលើកទឹកចិត្តសិស្សប្អូនជំនាន់ក្រោយ ខិតខំពង្រឹងសមត្ថភាពរបស់ខ្លួនឱ្យបានខ្លាំង និងរកឱកាសបង្កើតភាពក្លាហ៊ានក្នុងការចូលរួមប្រកួតប្រជែងលើកម្មវិធីដែលមានលក្ខណៈលំដាប់ថ្នាក់ពិភពលោក ដើម្បីបានបង្ហាញសមត្ថភាព​ឱ្យបរទេសបានឃើញពីសមត្ថភាពរបស់កូនខ្មែរ ដែលជាក់ស្តែងកូនខ្មែររាល់ពេលចូលរួមប្រកួតប្រជែងនៅក្រៅប្រទេស តែងតែទទួលបានភាពជោគជ័យជាបន្តបន្ទាប់ផងដែរ។

តំណាងសិស្សជយលាភី ក៏បានថ្លែងអរគុណដល់ក្រុមហ៊ុន B RIGHT EDUCATION CO.,LTD ដែលបានរៀបចំការប្រកួតប្រជែងរបស់សិស្ស ដេីម្បីឱ្យកូនសិស្សខ្មែរ មានឱកាសបញ្ចេញសមត្ថភាពលេីឆាគអន្តរជាតិ និងលេីកទឹកចិត្តឱ្យក្រុមហ៊ុន បន្តរៀបចំកម្មវិធីដូចនេះឱ្យបានកាន់តែច្រេីនបន្ថែមទៀត ដេីម្បីលេីកទឹកចិត្ត និងផ្តល់ភាពក្លាហាន សម្រាប់កូនសិស្សកម្ពុជា បានប្រកួតលេីឆាគអន្តរជាតិបន្តទៀត។

តំណាង B RIGHT EDUCATION CO.,LTD បានបញ្ជាក់ឱ្យដឹងដែរថា សិស្សានុសិស្សកម្ពុជាបានបង្កើតប្រវត្តិសាស្ត្រថ្មីមួយនៅលើឆាកអន្តរជាតិ ក្នុងការប្រកួតផ្តាច់ព្រ័ត្រជាសកល TeenEagle Global Finals នៅចក្រភពអង់គ្លេស ទាំងផ្នែក​ភាសាអង់គ្លេស និងគណិតវិទ្យា។ ការប្រកួតប្រជែង​នៅឆ្នាំនេះមានភាពស្វិតស្វាញជាខ្លាំង ដោយមានការចូលរួមពីសិស្សានុសិស្សឆ្នើមចំនួន ៥៦៥នាក់ មកពី ១០៧សាលា តំណាងឱ្យ ២៨ប្រទេស ជុំវិញពិភពលោក។

ឆ្លងកាត់ការប្រកួតនៅលើឆាកអន្តរជាតិដ៏ធំធេងនេះ សិស្សឆ្នើមរបស់កម្ពុជាបានបង្ហាញពីឧត្តមភាពខាងការសិក្សា ដោយដណ្តើមបាន៖ មេដាយមាស ១៧គ្រឿង, មេដាយប្រាក់ ២គ្រឿង, មេដាយសំរឹទ្ធ ១១គ្រឿង ហើយសមិទ្ធផលពិសេសនោះគឺ សិស្ស ២រូប ទទួលបានចំណាត់ថ្នាក់លេខ ១ និងសិស្ស ៤រូបទៀត ទទួលបានចំណាត់ថ្នាក់លេខ២ ។ លទ្ធផលដ៏​ត្រចះត្រចង់នេះ គឺជាផ្លែផ្កានៃការខិតខំប្រឹងប្រែង​របស់សិស្សានុសិស្សកម្ពុជា ការយកចិត្តទុកដាក់​ពីលោកគ្រូ អ្នកគ្រូ និងអាណាព្យាបាល ដែលបានបង្ហាញឱ្យពិភពលោកឃើញពីសមត្ថភាពពិតរបស់យុវជនកម្ពុជា៕