(ភ្នំពេញ)៖ លោក នួន សុមេធ រដ្ឋលេខាធិការ និងជាអនុប្រធានអចិន្រ្តៃយ៍គណៈកម្មការប្រយុទ្ធប្រឆាំងគ្រឿងញៀន ក្រសួងទេសចរណ៍ តំណាងលោក ហួត ហាក់ រដ្ឋមន្ត្រី បានណែនាំឱ្យផ្សព្វផ្សាយការយល់ដឹងពី App NoDrug ដើម្បីការរាយការណ៍ និងទទួលព័ត៌មានពីបញ្ហាគ្រឿងញៀន។

ការណែនាំបែបនេះក្នុងឱកាសដែលក្រសួងទេសចរណ៍ សហការជាមួយអគ្គលេខាធិការ នៃអាជ្ញាធរជាតិប្រយុទ្ធប្រឆាំងគ្រឿងញៀន រៀបចំពិធីផ្សព្វផ្សាយផែនការយុទ្ធនាការប្រយុទ្ធប្រឆាំងគ្រឿងញៀនខុសច្បាប់លើកទី១១ ជូនដល់ថ្នាក់ដឹកនាំ និងមន្រ្តី ពីអង្គភាពចំណុះក្រសួង និងមន្ទីរទេសចរណ៍រាជធានី-ខេត្ត នាថ្ងៃទី៣០ ខែមិថុនា ឆ្នាំ២០២៦ តាមរយៈការចូលរួមដោយផ្ទាល់និងពីចំងាយ (Zoom)។

លោក ឡោ សុវិជ្ជា អគ្គនាយករង និងជាប្រធានលេខាធិការដ្ឋានគណៈកម្មកាប្រយុទ្ធប្រឆាំងគ្រឿងញៀន ក្រសួងទេសចរណ៍ បានជម្រាបជូនពីលទ្ធផលការងារ ឆ្នាំ២០២៥ និងទិសដៅអនុវត្តបន្តឆ្នាំ២០២៦ និងសេចក្តីណែនាំលេខ០០៧ ស្តីពីការអនុវត្តផែនការប្រយុទ្ធប្រឆាំងគ្រឿងញៀនខុសច្បាប់លើកទី១១ របស់ក្រសួងទេសចរណ៍។

ឧត្តមសេនីយ៍ត្រី យិន យឿត អនុប្រធាននាយកដ្ឋានផ្សព្វផ្សាយ អប់រំ និងទំនាក់ទំនងសាធារណៈ បានផ្តល់បទបង្ហាញពីច្បាប់ស្តីពីការត្រួតពិនិត្យគ្រឿងញៀន និងអត្ថប្រយោជន៍កម្មវិធីទូរស័ព្ទដៃ App NoDrug។

ក្នុងនាមនាយឧត្តមសេនីយ៍ មាស វិរិទ្ធ អគ្គលេខាធិការ ក្នុងឱកាសនោះឧត្តមសេនីយ៍ឯក នាក់ យុទ្ធា អគ្គលេខាធិការរង បានពាំនាំប្រសាសន៍សន្តិបណ្ឌិត នេត សាវឿន ឧបនាយករដ្ឋមន្រ្តី ប្រធានអាជ្ញាធរជាតិប្រយុទ្ធ ប្រឆាំងគ្រឿងញៀន ថ្លែងនូវអំណរគុណ និងកោតសសើរដល់ថ្នាក់ដឹកនាំក្រសួងទេសចរណ៍ និងបានផ្សព្វផ្សាយផែនការយុទ្ធនាការប្រយុទ្ធប្រឆាំងគ្រឿងញៀនខុសច្បាប់លើកទី១១ ព្រមទាំងយុទ្ធសាស្រ្តទាំង៦មាន៖យុទ្ធសាស្រ្តអប់រំ អនុវត្តច្បាប់ រដ្ឋបាល ព្យាបាលនិងស្តារនីតិសម្បទា បទបញ្ជា០១-០២ បប និងទំនាក់ទំនងអន្តរជាតិ។

លោក នួន សុមេធ បានដាក់ចេញនូវវិធានការអនុវត្តជាក់ស្តែងដើម្បីប្រសិទ្ធភាពការងារប្រយុទ្ធប្រឆាំងគ្រឿងញៀន មានជាអាទិ៍៖ការរៀបចំពង្រឹងជនបង្គោលតាមមន្ទីរទេសចរណ៍រាជធានី ខេត្ត ពង្រឹងការអនុវត្តច្បាប់ស្តីពីទេសចរណ៍ ច្បាប់ស្តីពីការត្រួតពិនិត្យគ្រឿងញៀន និងលិខិតបទដ្ឋានគតិយុត្តជាធរមាន ផ្សព្វផ្សាយឱ្យយល់ដឹងពីកម្មវិធីទូរស័ព្ទដៃ App NoDrug ដើម្បីការរាយការណ៍ និងទទួលបានព័ត៌មានពាក់ព័ន្ធនឹងបញ្ហាគ្រឿងញៀនដល់មន្រ្តីរាជការ ម្ចាស់អាជីវកម្ម និងបុគ្គលិកបានគ្រប់គ្នា ដោយត្រូវមានរបាយការណ៍ជាប់ជាប្រចាំ៕