(ភ្នំពែញ)៖ គណៈប្រតិភូគណបក្សប្រជាជនកម្ពុជា ដឹកនាំដោយលោក សុខ សូកេន សមាជិកគណៈកម្មាធិការកណ្តាលគណបក្សប្រជាជនកម្ពុជា អនុប្រធានវេទិកាយុវជន ICAPP និងជារដ្ឋមន្ត្រីក្រសួងអធិការកិច្ច បានអញ្ជើញចូលរួមកិច្ចប្រជុំគណៈកម្មាធិការអចិន្ត្រៃយ៍លើកទី៤៥ នៃសន្និសីទអន្តរជាតិ នៃបណ្តាគណបក្សនយោបាយអាស៊ី (45th ICAPP Standing Committee Meeting) ដែលដឹកនាំដោយលោក Chung Eui-yong ប្រធានអង្គការ ICAPP និងជាអតីតរដ្ឋមន្ត្រីការបរទេស នៃសាធារណរដ្ឋកូរ៉េ។

កិច្ចប្រជុំនេះត្រូវបានរៀបចំដោយគណបក្សប្រជាជនម៉ុងហ្គោលីចាប់ពីថ្ងៃទី២៥-២៨ ខែមិថុនា ឆ្នាំ២០២៦ នៅទីក្រុងអ៊ូឡង់បាទ័រ ដែលមានការចូលរួមដោយផ្ទាល់ និងអនឡាញ ពីគណបក្សនយោបាយចំនួន២១ មកពី១៧ប្រទេស។

កិច្ចប្រជុំគណៈកម្មាធិការអចិន្ត្រៃយ៍បានពិភាក្សាអំពីស្ថាប័នូបនីយកម្ម ICAPP ដើម្បីពង្រឹង និងពង្រីកសក្តានុពលរបស់ ICAPP ឱ្យកាន់តែមានវិសាលភាពទូលំទូលាយ និងជាក់ស្តែងដែលជាមូលដ្ឋាននៃការកសាងជំនឿទុកចិត្តដ៏សំខាន់របស់ ICAPP ដើម្បីទ្វីបអាស៊ី មានសន្តិភាព និងវិបុលភាពរួម។

គណៈកម្មាធិការអចិន្ត្រៃយ៍ បានសម្រេចរៀបចំកិច្ចសន្ទនាគណបក្សនយោបាយអន្តរទ្វីបលើកទី១, កិច្ចប្រជុំគណៈកម្មាធិការអចិន្ត្រៃយ៍លើកទី៤៦, វេទិកាសារព័ត៌មាន ICAPP លើកទី៨ និងមហាសន្និបាតលើកទី១៣ មុននឹងដំណាច់
ឆ្នាំ២០២៦ នៅសាធារណរដ្ឋកូរ៉េ និងវេទិកាយុវជន ICAPP លើកទី៨ នៅដើមឆ្នាំ២០២៧ នៅប្រទេសម៉ុងហ្គោលី ដោយបន្តគាំទ្រលោក Uchral Nyam-Osor នាយករដ្ឋមន្ត្រីនៃប្រទេសម៉ុងហ្គោលី ជាប្រធាន និងមានលោក សុខ សូកេន ជាអនុប្រធាននៃវេទិកាយុវជន ICAPP។

កិច្ចពិភាក្សាពិសេសនៃគណៈកម្មាធិការអចិន្ត្រៃយ៍ ICAPP ស្តីពី «ការផ្លាស់ប្តូរនៅអាស៊ី ក្នុងយុគសម័យឌីជីថល៖ បញ្ហាប្រឈមនៃបញ្ញាសិប្បនិម្មិត (AI)» មានការអញ្ជើញចូលរួមពីវាគ្មិនចំនួន១៦រូប មកពីប្រទេសកម្ពុជា ប៉ាគីស្ថាន ស្រីលង្កា អ៊ូសបេគីស្ថាន ម៉ាឡេស៊ី បង់ក្លាដេស នេប៉ាល់ ចិន អាស៊ែប៊ីហ្សង់ ឡាវ មីយ៉ាន់ម៉ា ថៃ វៀតណាម និងឥណ្ឌូនេស៊ី។

ថ្លែងក្នុងកិច្ចពិភាក្សាពិសេសនេះ លោក សុខ សូកេន បានបញ្ជាក់អំពីការប្ដេជ្ញាចិត្តរបស់រាជរដ្ឋាភិបាល អាណត្តិទី៧ ក្រោមការដឹកនាំប្រកបដោយចក្ខុវិស័យវែងឆ្ងាយ និងប្រាកដនិយមរបស់សម្តេចបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា។

ចំពោះការជំរុញគោលនយោបាយរដ្ឋាភិបាលឌីជីថលកម្ពុជានៅក្នុងរបៀបវារៈអភិវឌ្ឍន៍ជាតិ ដើម្បីពង្រឹងនវានុវត្តន៍ជំរុញផលិតភាពពង្រឹងសមត្ថភាពប្រកួតប្រជែង និងលើកកម្ពស់សេវាសាធារណៈព្រមទាំងបានផ្តល់នូវទស្សនទានសំខាន់ៗមួយចំនួនពិសេសលើការអភិវឌ្ឍធនធានមនុស្ស និងការលើកកម្ពស់អភិបាលកិច្ចបញ្ញាសិប្បនិម្មិត (AI) ប្រកបដោយក្រមសីលធម៌ច្បាស់លាស់ និងការទទួលខុសត្រូវ។

អង្គប្រជុំបានគូសបញ្ជាក់ពីតួនាទីនៃបញ្ញាសិប្បនិម្មិត ក្នុងការបង្កើតអនាគតរបស់អាស៊ី ដែលតម្រូវឱ្យមានការគិតគូរដល់ការអភិវឌ្ឍឌីជីថល ដែលផ្តោតសំខាន់លើការការពារនូវអត្ថប្រយោជន៍របស់ប្រជាជន និងបានសង្កត់ធ្ងន់ទៅលើអភិបាលកិច្ចនៃបញ្ញាសិប្បនិម្មិត (AI) ដែលក្នុងនោះប្រទេសចិន ម៉ុងហ្គោលីសាធារណរដ្ឋកូរ៉េ កម្ពុជា វៀតណាម និងមីយ៉ាន់ម៉ា ក៏បានលើកនូវមតិយោបល់មួយចំនួន និងបានផ្តល់អនុសាសន៍សំខាន់ៗលើការងារនេះផងដែរ។

នៅក្នុងឱកាសនេះដែរ គណៈប្រតិភូ ICAPP ក៏ទទួលបានការអនុញ្ញាតចូលជួបសម្តែងការគួរសម និងពិភាក្សាការងារជាមួយនឹងលោក Uchral Nyam-Osor នាយករដ្ឋមន្ត្រីប្រទេសម៉ុងហ្គោលី ប្រធានគណបក្សប្រជាជនម៉ុងហ្គោលី និងជាប្រធានវេទិកាយុវជន ICAPP។

នាយករដ្ឋមន្ត្រីម៉ុងហ្គោលី បានបញ្ជាក់ថាគណបក្សប្រជាជនម៉ុងហ្គោលី ចាត់ទុក ICAPP គឺជាវេទិកាគណបក្សនយោបាយដ៏មានសារៈសំខាន់ដែលបានចូលរួមគាំទ្រដល់ការកសាងកិច្ចសន្ទនា និងមិត្តភាពរវាងគណបក្សនយោបាយនានា ដែលមាននិន្នាការចម្រុះ ដើម្បីសម្រេចបាននូវវិបុលភាពសន្តិភាព និងការអភិវឌ្ឍរួមគ្នានៃទ្វីបអាស៊ី។

នាយករដ្ឋមន្ត្រីម៉ុងហ្គោលី បានបញ្ជាក់អំពីការប្ដេជ្ញាចិត្តរបស់គណបក្សប្រជាជនម៉ុងហ្គោលី ក្នុងការជំរុញបញ្ញាសិប្បនិម្មិត (AI) នៅក្នុងកិច្ចការដឹកនាំគណបក្ស និងប្រទេសម៉ុងហ្គោលីនៅក្នុងយុគសម័យឌីជីថល ដើម្បីអនាគតទាំងអស់គា្ន។

លោក សុខ សូកេន ក្នុងនាមគណបក្សប្រជាជនកម្ពុជា បានសម្ដែងការអបអរសាទរចំពោះគណបក្សប្រជាជនម៉ុងហ្គោលី និងជូនពរនាយករដ្ឋមន្ត្រីម៉ុងហ្គោលី សម្រេចនូវចក្ខុវិស័យក្នុងការកសាងសង្គមឌីជីថល នៅម៉ុងហ្គោលី និងបានគាំទ្រតួនាទីដឹកនាំវេទិកាយុវជន ICAPP របស់ម៉ុងហ្គោលី ព្រមទាំងបានបញ្ជាក់អំពីការបន្តពង្រឹង និងពង្រីកកិច្ចសហប្រតិបត្តិការមិត្តភាព និងសហប្រតិបត្តិការរវាងបក្សរដ្ឋ និងប្រជាជននៃប្រទេសទាំងពីរនិងការគាំទ្រគ្នាទៅវិញទៅមក នៅក្នុងកិច្ចសហប្រតិបត្តិការពហុភាគីក្នុងតំបន់ និងអន្តរជាតិ។

ឆ្លៀតក្នុងឱកាសនេះផងដែរ គណៈប្រតិភូ ICAPP ក៏បានចូលរួមកម្មវិធីដាំដើមឈើនៅក្នុងឧទ្យានជាតិនាទីក្រុងប៊ូឡង់បាទ័រ សម្រាប់យុទ្ធនាការនៃការដាំដើមឈើ ១ពាន់លានដើម ឆ្នាំ២០៣០ ដែលជាការប្ដេជ្ញាចិត្តរបស់រដ្ឋាភិបាលម៉ុងហ្គោលី ដើម្បីចូលរួមចំណែកក្នុងការប្រយុទ្ធប្រឆាំងនឹងការបម្រែបម្រួលអាកាសធាតុ៕