(ភ្នំពេញ)៖ លោកឧត្តមសេនីយ៍ឯក សាស្ត្រាចារ្យបណ្ឌិត សៅ សុវណ្ណី នៅថ្ងៃទី៣០ ខែមិថុនា ឆ្នាំ២០២៦ បានអញ្ជើញបំពេញទស្សនកិច្ចសិក្សានៅក្រុមហ៊ុន Interlock Group នៃសាធារណរដ្ឋសិង្ហបុរី ដើម្បីស្វែងយល់អំពីបច្ចេកវិទ្យាទំនើប និងការអនុវត្តប្រព័ន្ធបញ្ញាសិប្បនិម្មិត (AI) ក្នុងការគ្រប់គ្រងសន្តិសុខ និងហេដ្ឋារចនាសម្ព័ន្ធឆ្លាតវៃ។

ក្នុងឱកាសនោះ ថ្នាក់ដឹកនាំ និងក្រុមការងាររបស់ក្រុមហ៊ុន Interlock Group បានធ្វើបទបង្ហាញអំពីបច្ចេកវិទ្យាទំនើបដែលកំពុងអភិវឌ្ឍ និងដាក់ឱ្យប្រើប្រាស់ ដោយផ្តោតលើប្រព័ន្ធ AI សម្រាប់ការគ្រប់គ្រងសន្តិសុខឆ្លាតវៃ ការគ្រប់គ្រងអគារ សាលារៀន សណ្ឋាគារ សហគ្រាស និងទីតាំងសំខាន់ៗផ្សេងទៀត ដែលរួមចំណែកលើកកម្ពស់ប្រសិទ្ធភាព សុវត្ថិភាព និងការគ្រប់គ្រងតាមបែបឌីជីថល។

ថ្លែងក្នុងឱកាសនោះ លោកឧត្តមសេនីយ៍ឯក សាស្ត្រាចារ្យបណ្ឌិត សៅ សុវណ្ណី បានថ្លែងថា ដំណើរទស្សនកិច្ចនេះពិតជាមានសារៈសំខាន់ក្នុងការផ្លាស់ប្តូរចំណេះដឹង បទពិសោធន៍ និងបច្ចេកវិទ្យាទំនើប ដែលអាចជាមូលដ្ឋានសម្រាប់ការសិក្សា និងពិចារណាយកមកអនុវត្តនៅកម្ពុជា ស្របតាមគោលនយោបាយរដ្ឋាភិបាលក្នុងការជំរុញការធ្វើបរិវត្តកម្មឌីជីថល ការកសាងសង្គមឌីជីថល និងសេដ្ឋកិច្ចឌីជីថល ព្រមទាំងការពង្រឹងសន្តិសុខ និងសុវត្ថិភាពសាធារណៈ។

បន្ថែមលើសពីនេះ លោកសាស្ត្រាចារ្យបណ្ឌិត សៅ សុវណ្ណី បានថ្លែងអំណរគុណចំពោះការទទួលស្វាគមន៍យ៉ាងកក់ក្តៅពីថ្នាក់ដឹកនាំ និងក្រុមការងារ Interlock Group។ សង្ឃឹមថា ទំនាក់ទំនង និងកិច្ចសហប្រតិបត្តិការរវាងភាគីទាំងពីរ នឹងបន្តរីកចម្រើន និងនាំមកនូវលទ្ធផលជាវិជ្ជមាននាពេលអនាគត។

ជាមួយគ្នានេះ លោក Mr. Jimmy អគ្គនាយកក្រុមហ៊ុន Interlock Group បានលើកឡើងថា បច្ចេកវិទ្យា AI និងប្រព័ន្ធសន្តិសុខឆ្លាតវៃ គឺជានិន្នាការដ៏សំខាន់សម្រាប់ពិភពលោកនាពេលបច្ចុប្បន្ន ដែលអាចជួយបង្កើនប្រសិទ្ធភាពក្នុងការគ្រប់គ្រងសន្តិសុខ ការពារទ្រព្យសម្បត្តិ កាត់បន្ថយហានិភ័យ និងគាំទ្រដល់ការអភិវឌ្ឍទីក្រុងឆ្លាតវៃប្រកបដោយចីរភាព។

ដំណើរទស្សនកិច្ចនេះ បានប្រព្រឹត្តទៅក្នុងបរិយាកាសស្និទ្ធស្នាល និងប្រកបដោយផ្លែផ្កា ដោយមានការអមដំណើរពី បណ្ឌិត ហាន បូរិន ដែលបានសម្របសម្រួល និងរួមចំណែកពង្រឹងទំនាក់ទំនង និងកិច្ចសហប្រតិបត្តិការរវាងភាគីទាំងពីរ សំដៅរួមចំណែកដល់ការអភិវឌ្ឍធនធានមនុស្ស បច្ចេកវិទ្យា និងនវានុវត្តន៍ ស្របតាមទិសដៅអភិវឌ្ឍន៍របស់ព្រះរាជាណាចក្រកម្ពុជា៕