(កំពង់ចាម)៖ ថ្មីៗនេះមានការចុះផ្សាយ និងចែកចាយព័ត៌មានតាមបណ្តាញសង្គមនានានូវឃ្លីបវីដេអូខ្លី ដោយបានដកស្រង់សំឡេងសន្ទនារបស់លោក ថោ ជេដ្ឋា រដ្ឋមន្ត្រីក្រសួងធនធានទឹក និងឧតុនិយម និងលោក អ៊ុន ចាន់ដា អភិបាលខេត្តកំពង់ចាម ក្នុងឱកាសចុះពិនិត្យ សិក្សាជួសជុលច្រាំងទន្លេបាក់ស្រុត ក្នុងក្រុងកំពង់ចាម កាលពីថ្ងៃទី២៩ ខែមិថុនា ឆ្នាំ២០២៦ ដែលមានខ្លឹមសារថា «ពួកអ្នកកាសែតហ្នឹងខូចណាស់ កន្លែងណាឲ្យច្បាប់ហើយ ក៏ថតបង្ហោះដែរ» «ទាល់តែដាក់ខ្នះមួយពីរទៅ បានដឹងខ្លួន»។

ឆ្លើយតបនឹងករណីនេះ រដ្ឋបាលខេត្តកំពង់ចាម សូមបំភ្លឺជូនអ្នកសារព័ត៌មាន និងសាធារណជនមេត្តាជ្រាបដូចខាងក្រោម៖

១៖ ថ្នាក់ដឹកនាំខេត្ត ពិតជាមានការសោកស្តាយចំពោះសំឡេងសន្ទនាខាងលើ ដែលមិនមានប្រភពច្បាស់លាស់ធ្វើឲ្យមានការយល់ច្រឡំ និងបានប៉ះពាល់ដល់អ្នកប្រកបវិជ្ជាជីវៈសារព័ត៌មានទូទៅ។ ប៉ុន្តែជាមនោសញ្ចេតនា ដើមរបស់ថ្នាក់ដឹកនាំទាំងពីរ គឺមានបំណងសំដៅតែទៅលើបុគ្គលអ្នកសារព័ត៌មានមួយចំនួនតូចប៉ុណ្ណោះ ដែលគាត់មិនបានអនុវត្តតាមជំនាញវិជ្ជាជីវៈ និងក្រមសីលធម៌អ្នកសារព័ត៌មាន ផ្សព្វផ្សាយព័ត៌មានដោយមិនបានប្រមូល ប្រភពគ្រប់ជ្រុងជ្រោយ ធ្វើឲ្យព័ត៌មាននោះ មិនបានឆ្លុះបញ្ចាំងពីការពិត ប៉ះពាល់ដល់កិត្តិយស សេចក្តីថ្លៃថ្នូរ និងការខិតខំប្រឹងប្រែងរបស់រដ្ឋាភិបាល និងរដ្ឋបាលខេត្តក្នុងការបម្រើប្រជាពលរដ្ឋ។

២៖ រដ្ឋបាលខេត្តកំពង់ចាម ពុំដែលរើសអើង ឬចាត់ទុកអ្នកសារព័ត៌មានជាសត្រូវឡើយ ផ្ទុយមកវិញ រដ្ឋបាលខេត្តតែងចាត់ទុកអ្នកសារព័ត៌មានជាដៃគូដ៏មានប្រសិទ្ធភាព បានធ្វើជាស្ពានចម្លងព័ត៌មានពីរដ្ឋបាលខេត្ត ទៅកាន់មហាជន និងពីមហាជន មកកាន់រដ្ឋបាលខេត្តវិញ។ តាមរយៈអ្នកសារព័ត៌មាន រដ្ឋបាលខេត្តទទួលបាននូវកង្វល់ និងសំណូមពរជាច្រើនពីប្រជាពលរដ្ឋ ដែលត្រូវបានលើកយកមកពិនិត្យ និងបានដោះស្រាយជាបន្តបន្ទាប់។

រដ្ឋបាលខេត្តតែងធ្វើការយ៉ាងជិតស្និទ្ធជាមួយអ្នកសារព័ត៌មានទាំងការឆ្លងឆ្លើយព័ត៌មាន ព្រមទាំងជួបសំណេះ សំណាលជាមួយអ្នកសារព័ត៌មាននៅក្នុងខេត្ត ជារៀងរាល់ឆ្នាំក្នុងឱកាសពិធីបុណ្យចូលឆ្នាំថ្មីប្រពៃណីជាតិខ្មែរ ពិធីបុណ្យភ្ជុំបិណ្ឌ និងការជួបជុំដំណាច់ឆ្នាំជាដើម។

រដ្ឋបាលខេត្តកំពង់ចាម សូមសម្តែងនូវការអរគុណចំពោះអ្នកសារព័ត៌មានទាំងអស់ដែលបានចូល រួមជាមួយរដ្ឋបាលខេត្តកន្លងមក និងសូមស្នើឲ្យអ្នកសារព័ត៌មានទាំងអស់បន្តចូលរួម ដោយប្រកាន់យកជំនាញវិជ្ជាជីវៈ និងក្រមសីលធម៌អ្នកសារព័ត៌មាន ផ្ដល់ព័ត៌មានពិត ដែលមានប្រភពច្បាស់លាស់ និងគ្រប់ជ្រុងជ្រោយ ដើម្បីលើកកម្ពស់សណ្តាប់ធ្នាប់ក្នុងវិស័យព័ត៌មានសម្រាប់សង្គមជាតិយើងទាំងអស់គ្នា៕