(ភ្នំពេញ)៖ ឧកញ៉ាសាស្រ្ដាចារ្យសមូហកបណ្ឌិត ឡី សុភាព ប្រធានសមាគមសហព័ន្ធវិនិយោគិនកម្ពុជា និងជាប្រធានសមាគមសហព័ន្ធការពារអ្នកប្រើប្រាស់នៅកម្ពុជា បានដឹកនាំ ម្ចាស់ក្រុមហ៊ុន សហគ្រាស ផលិតកម្ម និងម្ចាស់ផលិតផលផលិតផល វិនិយោគិន អ្នកលក់ដុំលក់រាយ រាប់ពាន់នាក់ គាំទ្រយុទ្ធនាយុទ្ធនាការ «អភិវឌ្ឍន៍សហគ្រាស និងអនុលោមភាពផលិតផល» ក្នុងគោលបំណងលើកកម្ពស់ភាពប្រកួតប្រជែងរបស់សហគ្រាសក្នុងស្រុក តាមរយៈគុណភាព ផលិតភាព ស្តង់ដា និងនវានុវត្តន៍។

យុទ្ធនាការ «អភិវឌ្ឍន៍សហគ្រាស និងអនុលោមភាពផលិតផល» ប្រារព្ធក្រោមអធិបតីភាពលោក ហែម វណ្ណឌី រដ្ឋមន្រ្ដីក្រសួង ឧស្សាហកម្ម វិទ្យាសាស្រ្ដ បច្ចេកវិទ្យា និងនវានុវត្ដន៍ កាលពីរសៀលថ្ងៃទី២៩ ខែមិថុនា ឆ្នាំ២០២៦ នៅ ដឹ ហ្រ្គេន ធឺរេស ខណ្ឌទួលគោក។

លោកឧកញ៉ា សាស្ត្រាចារ្យ សមូហកបណ្ឌិត ឡី សុភាព បានបញ្ជាក់ពីគោលបំណង នៃយុទ្ធនាការអភិវឌ្ឍន៍សហគ្រាស និងអនុលោមភាពផលិតផល គឺសម្រាប់ជាស្ពាន រវាងរដ្ឋ និងឯកជន ស្ថាប័នហិរញ្ញវត្ថុ និងទីផ្សារឱ្យក្លាយជាកម្លាំងដ៏រឹងមាំ ក្នុងអភិវឌ្ឍន៍សង្គមសេដ្ឋកិច្ច ទន្ទឹមនោះនិងការគាំទ្រពីរាជរដ្ឋាភិបាល ប្រជាពលរដ្ឋ និងដៃគូអភិវឌ្ឍន៍ ក្រុមហ៊ុន សហគ្រាស សិប្បកម្ម ឧស្សាហ៍កម្ម និងម្ចាស់ផលិតផល រោងចក្រផង ត្រូវតែបន្ត និងពង្រឹង ពង្រីកខ្លួនឱ្យត្រូវនឹងសភាពការណ៍ក្នុងតំបន់ និងពិភពលោកផងដែរ។

ការបង្កើតវេទិកាេនះ គឺជាគ្រឹះមួយដ៏រឹងមាំ ក្នុងការពង្រឹងខឿនសេដ្ឋកិច្ចជាតិ ស្របតាមអនុសាសន៍របស់រាជរដ្ឋាភិបាល ហើយការអភិវឌ្ឍសហគ្រាសត្រូវតែមានជំនាញវិជ្ជាជីវៈពិតប្រាកដ។ បុគ្គលម្នាក់ មានជំនាញមួយ សេវាកម្មមួយ ស្តង់ដារមួយ និងអាជីវកម្មមួយ ស្តង់ដារមួយ។ យន្តការគន្លឹះនេះទើបធ្វើអោយតំបន់នៃសេដ្ឋកិច្ចក្រៅប្រព័ន្ធ អភិវឌ្ឍន៍ឈានទៅក្លាយទៅជាតំបន់នៃការអភិវឌ្ឍសេដ្ឋកិច្ចក្រៅប្រព័ន្ធ គឺសហគ្រាសធុនមីក្រូ តូច និងមធ្យម និងឈានដល់ធុនធំ។

ថ្លែងក្នុងយុទ្ធនាការ លោក ហែម វណ្ណឌី បានរំលេចពីសារសំខាន់នៃការត្រៀមលក្ខណៈសម្រាប់ដំណាក់កាលបន្ទាប់នៃការអភិវឌ្ឍសេដ្ឋកិច្ចកម្ពុជា ដែលតម្រូវឱ្យសហគ្រាសក្នុងស្រុកមានសមត្ថភាពប្រកួតប្រជែង ដោយមិនផ្តោតតែលើថ្លៃដើមទាបដូចពីមុនឡើយ ប៉ុន្តែត្រូវឈានប្រកួតប្រជែងលើគុណភាព ផលិតភាព និងនវានុវត្តន៍។

លោករដ្ឋមន្ត្រីបានលើកឡើងថា៖ «សូមម្ចាស់សហគ្រាសគិតថា អនុលោមភាពគឺជាការវិនិយោគ មិនមែនគ្រាន់តែជាបន្ទុកចំណាយរបស់អាជីវកម្មទេ។ សហគ្រាសដែលវិនិយោគលើគុណភាព ស្តង់ដា ភាពត្រឹមត្រូវនៃខ្នាតរង្វាស់រង្វាល់ ការធ្វើតេស្តមន្ទីរពិសោធន៍ និងនវានុវត្តន៍ គឺកំពុងវិនិយោគលើទំនុកចិត្តរបស់អតិថិជន ពង្រឹងម៉ាកយីហោកាន់តែរឹងមាំ និងកំណើនប្រកបដោយចីរភាព»។

លោក ហែម វណ្ណឌី បានគូសបញ្ជាក់ថា ក្រសួងនឹងបន្តកែទម្រង់ដើម្បីធ្វើឱ្យអនុលោមភាពកាន់តែងាយស្រួល តាមរយៈការកែលម្អនីតិវិធី និងការផ្តល់សេវាសាធារណៈតាមប្រព័ន្ធឌីជីថល ដើម្បីជួយសហគ្រាសកម្ពុជាបង្កើនភាពប្រកួតប្រជែង និងត្រៀមខ្លួនសម្រាប់ទីផ្សារក្នុងស្រុក តំបន់ និងអន្តរជាតិ។

យុទ្ធនាការនេះជាផ្នែកមួយនៃកិច្ចខិតខំប្រឹងប្រែងរបស់ក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ ក្នុងការពង្រឹងភាពប្រកួតប្រជែងរបស់វិស័យឧស្សាហកម្មកម្ពុជា និងគាំទ្រចក្ខុវិស័យរបស់រាជរដ្ឋាភិបាល ក្នុងការកសាងសេដ្ឋកិច្ចដែលមានភាពធន់ ជំរុញដោយនវានុវត្តន៍ និងបង្កើតតម្លៃបន្ថែមខ្ពស់ ស្របតាមចក្ខុវិស័យឆ្នាំ២០៥០ របស់រាជរដ្ឋាភិបាល៕