(ខេត្តព្រះសីហនុ)៖ លោកស្រី ហួន ចន្ទបូរ៉ា នាយិកានាយកដ្ឋានទំនាក់ទំនង និងមន្ដ្រីក្រុមការងារស្នាក់ការកណ្ដាលកាកបាទក្រហមកម្ពុជា បានអញ្ជើញចុះផ្សព្វផ្សាយស្តីពី «បច្ចុប្បន្នភាពច្បាប់មនុស្សធម៌អន្តរជាតិ និងបេសកកម្មរបស់គណៈកម្មាធិការអន្តរជាតិនៃកាកបាទក្រហម (ICRC) និងកាកបាទក្រហមកម្ពុជា (CRC) ក្នុងពេលមានជម្លោះប្រដាប់អាវុធ» ជូនដល់មេបញ្ជាការ មេបញ្ជារង នាយនាវី នាយនាវីរង និងពលនាវិក ចំនួន ៣០០នាក់ ស្រី៦នាក់ នៃបញ្ជាការមូលដ្ឋានសមុទ្ររាម។

វគ្គផ្សព្វផ្សាយនេះរៀបចំធ្វើឡើងនៅថ្ងៃទី៣០ ខែមិថុនា ឆ្នាំ២០២៦ ក្នុងមជ្ឈមណ្ឌលហ្វឹកហ្វឺនពហុសាសន៍ មូលដ្ឋានសមុទ្ររាម កងទ័ពជើងទឹក ដែលមានការអញ្ជើញពីឧត្តមនាវីទោ ទេព វុទ្ធី មេបញ្ជាការរង មូលដ្ឋានសមុទ្ររាម រួមជាមួយលោក ថម ហ្គាយហ្សឺ ប្រតិភូផ្នែកកងទ័ពថ្នាក់តំបន់នៃ ICRC ព្រមទាំងប្រតិភូ លោក គាំ សុខុម នាយកសាខា មន្ត្រីនៃទីស្នាក់ការកណ្តាល មន្រ្តីប្រតិបត្តិសាខា នាយនាវី នាយនាវីរង ពលនាវិកជាច្រើនរូប។

មានមតិស្វាគមន៍ឧត្តមនាវីទោ ទេព វុទ្ធី មេបញ្ជាការរង មូលដ្ឋានសមុទ្ររាម សូមថ្លែងអំណរគុណចំពោះវត្តមានលោកជំទាវគណៈធិបតី គណៈប្រតិភូ និងក្រុមការងារ ដែលបានអញ្ជើញមកផ្សព្វផ្សាយស្ដីពីប្រវត្តិចលនាកាកបាទក្រហមអន្តរជាតិ បច្ចុប្បន្នភាពច្បាប់មនុស្សធម៌អន្តរជាតិ បេសកកម្មកាកបាទក្រហមកម្ពុជា និងគណៈកម្មាធិការអន្តរជាតិនៃកាកបាទក្រហមក្នុងពេលមានជម្លោះប្រដាប់អាវុធ។ ជាមួយគ្នានេះ ឧត្តមនាវីទោ សង្ឃឹមយ៉ាងមុតមាំថា នាយនាវី នាយនាវីរង ពលនាវិកទាំងអស់ ដែលចូលរួមសូមយកចិត្តទុក្ខក្រេបយកចំណេះដឹងពីក្រុមវាគ្មិន ដើម្បីទុកជាទន់ក្នុងការអនុវត្តភារ:កិច្ចការពារជាតិមាតុភូមិ ប្រកបដោយវិជ្ជាជីវៈ និងសីលធម៏ខ្ពស់។ ជាថ្មីម្ដងទៀតលោកឧត្តមនាវីទោ សូមថ្លែងអំណរអរគុណយ៉ាងជ្រាលជ្រៅចំពោះ លោកស្រីនិងសហការីទាំងអស់ សម្រាប់ការគំទ្រ និងកិច្ចសហប្រតិបត្តិការយ៉ាងល្អប្រពៃជារៀងរហូតមក។

ក្នុងឱកាសនោះ លោកស្រី ហួន ចន្ទបូរ៉ា នាយិកានាយកដ្ឋានទំនាក់ទំនងកាកបាទក្រហមកម្ពុជា បានមានប្រសាសន៍ពាំនាំការផ្ដាំផ្ញើ និងសួរសុខទុក្ខពីសំណាក់សម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ប្រធានកាកបាទក្រហមកម្ពុជា និងសូមគោរពថ្លែងអំណរគុណចំពោះស្មារតីនិងការទទួលខុសត្រូវខ្ពស់របស់កងទ័ពជើងទឹកនៅឆ្នេរសមុទ្ររាម ដែលបានបំពេញភារកិច្ចល្បាត និងឃ្លាំមើលកោះឆ្នេរសមុទ្រកម្ពុជា ព្រមទាំងការថែរក្សាបូរណភាពដែនទឹកកម្ពុជា ប្រកបដោយប្រសិទ្ធភាព និងសូមគោរពអរគុណដល់ឯកឧត្តមមេបញ្ជាការ ដែលបានអនុញ្ញាតឱ្យមានពិធីផ្សព្វផ្សាយនាពេលនេះ ជូនចំពោះកងយោធពលខេមរភូមិន្ទ នៃបញ្ជាការដ្ឋានសមុទ្ររាម ដែលបានផ្ដល់កិត្តិយសចូលរួមក្នុងវគ្គផ្សព្វផ្សាយស្ដីពីប្រវត្តិចលនាអន្តរជាតិ។

លោកស្រីមានបានប្រសាសន៍បន្តថា ក្នុងឆ្នាំ២០២៥និងដើមឆ្នាំ២០២៦នេះ ក្នុងនាមជាសមាជិករបស់ចលនាអន្តរជាតិ បានធ្វើប្រតិបត្តិការផ្តល់ស្បៀងអាហារ សម្ភារៈ ជម្រក ការអប់រំអំពីហានិភ័យមីន និងអំពីអនាម័យ និងជួយប្រជាជនភៀសសឹកនៅតាមមណ្ឌលសុវត្ថិភាពនានា ជួយដល់គ្រួសារវីរយុទ្ធជនពលី ក្នុងជម្លោះប្រដាប់អាវុធតាមបណ្តោយព្រំដែន និងយុទ្ធជនរងរបួស អ្នកជំងឺ ដែលសម្រាកព្យាបាល អ្នករងគ្រោះដោយគ្រោះធម្មជាតិ រាប់សែនគ្រួសារ ដោយបានប្រើប្រាស់មូលនិធិទទួលបានពីសប្បុរសជនគ្រប់មជ្ឈដ្ឋានទាំងក្នុង និងក្រៅប្រទេស។

ក្នុងនោះផងដែរលោកស្រីបន្តថា «ក្នុងនាមកាកបាទក្រហមកម្ពុជា និងគណៈកម្មាធិការអន្តរជាតិនៃកាកបាទក្រហម សូមគោរពអរគុណយ៉ាងជ្រាលជ្រៅ ចំពោះទឹកចិត្ត និងការយកចិត្តទុកដាក់របស់ ឯកឧត្តម មេបញ្ជាការ លោក លោកស្រី ព្រមទាំងបងប្អូនកងយោធពលខេមរភូមិន្ទទាំងអស់ នៃបញ្ជាការដ្ឋានសមុទ្ររាម ដែលបានចំណាយពេលដ៏មានតម្លៃចូលរួមស្តាប់ការចែករំលែកនាពេលនេះ»។ ជាចុងក្រោយលោកស្រីបានសូមគោរពជូនពរចំពោះប្រតិភូ និងនាយទាហាន នាយទាហានរង ព្រមទាំងពលទាហានទាំងអស់ សូមមានសុខ ភាពល្អមាំមួន និងសម្រេចបានជោគជ័យក្នុងភារកិច្ចការពារជាតិ និងទឹកដី។

បន្ទាប់ពីទទួលបានវគ្គផ្សព្វផ្សាយនេះរួចសិក្ខាកាមទាំងអស់ដែលជានាយនាវី នាយនាវីរង និងពលនាវិក បានយល់ដឹងអំពី៖ (១) បច្ចុប្បន្នភាពច្បាប់មនុស្សធម៌អន្តរជាតិ និងបេសកកម្មរបស់គណៈកម្មាធិការអន្តរជាតិនៃកាកបាទក្រហម (ICRC) និងកាកបាទក្រហមកម្ពុជា ( CRC ) ក្នុងពេលមានជម្លោះប្រដាប់អាវុធ, (២) ប្រវត្តិចលនាអន្តរជាតិកាកបាទក្រហម និងអឌ្ឍចន្ទក្រហម, និង(៣) ស្តីពីច្បាប់អន្តរជាតិដែលអាចអនុវត្តបានចំពោះជម្លោះប្រដាប់អាវុធនៅលើលំហសមុទ្រ ដែលចំណុចនេះពិតជាមានសារ:សំខាន់ចំពោះនាយនាវី នាយនាវីរង និងពលនាវិកទាំងអស់សម្រាប់បំពេញភារកិច្ចក្នុងការការពារអធិបតេយ្យភាព និងបូរណភាពទឹកដី៕