(ភ្នំពេញ)៖ សម្តេចបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជា បានថ្លែងថា ក្រៅពីការប្រឹងប្រែងស្វែងរកទីផ្សារសម្រាប់ ផលិតផលកសិកម្មជូនប្រជាកសិករ រាជរដ្ឋាភិបាលក៏បានដាក់ចេញនូវកិច្ចអន្តរាគមន៍ជាច្រើនទៀត ដើម្បីជួយសម្រាលបន្ទុក និងលើកកម្ពស់ជីវភាពរបស់កសិករកម្ពុជា។

កិច្ចអន្តរាគមន៍ទាំងនោះមានដូចជា ការបញ្ចេញថវិកាជាតិ ដើម្បីរក្សាតម្លៃផលិតផល និងការស្រោចស្រង់ទិន្នផលតាមរយៈប្រព័ន្ធធារាសាស្រ្តជាដើម។ ជាមួយគ្នានេះសម្ដេចបវរធិបតីបានសង្កត់ធ្ងន់ទៅលើការប្តេជ្ញាចិត្តរបស់រាជរដ្ឋាភិបាលក្នុងការគាំទ្រវិស័យកសិកម្ម ដែលជាឆ្អឹងខ្នងនៃសេដ្ឋកិច្ចជាតិ។ ការថ្លែងរបស់សម្ដេចនាយករដ្ឋមន្រ្តីបានធ្វើឡើង ក្នុងឱកាសដែលសម្ដេចអញ្ជើញប្រារព្ធទិវាមច្ឆជាតិ ស្ថិតក្នុងក្រុងស្វាយរៀង ខេត្តស្វាយរៀង នាព្រឹកថ្ងៃទី០១ ខែកក្កដា ឆ្នាំ២០២៦។

សម្ដេចបវរធិបតី ហ៊ុន ម៉ាណែត បានថ្លែងយ៉ាងដូច្នេះថា៖ «ទីផ្សារឡើងចុះ ពេលខ្លះស្រូវអង្ករថ្លៃ រាជរដ្ឋាភិបាលបានបញ្ចេញថវិការាប់សិបលានដុល្លារ ដើម្បីជួយទប់បញ្ចេញទៅរោងម៉ាស៊ីនកិនស្រូវ ឆ្នាំទៅយើងជួយ៦០លានដុល្លារដើម្បីជួយទៅឲ្យម៉ាស៊ីនកិនស្រូវយកលុយទៅទិញស្រូវពីប្រជាកសិកររបស់យើង»។ នេះគឺជាការពិតជាក់ស្ដែង ស្រូវប្រាំងខ្វះទឹក ពេលស្រូវអង្ករឡើងថ្លៃស្រូវប្រាំងធ្វើច្រើន អីចឹងត្រូវបញ្ចេញទឹក ក្រសួងធនធានទឹកអន្តរាគមន៍ ដើម្បីធ្វើយ៉ាងណាយើងធានា។

សម្ដេចនាយករដ្ឋមន្រ្តីបានបន្តថា៖ «បើទីផ្សារមានហើយ តម្លៃយើងខិតខំធ្វើយ៉ាងណា រក្សាតុល្យភាពឡើងចុះ តែយើងខិតខំធ្វើយ៉ាងណាឲ្យបានល្អ ការធានានូវផលិតផលធ្វើមិចឲ្យប្រជាពលរដ្ឋទុកក្នុងហោប៉ៅឲ្យបានច្រើន»។

វិធានការទាំងនេះបានបង្ហាញពីការយកចិត្តទុកដាក់ខ្ពស់របស់រាជរដ្ឋាភិបាលចំពោះបញ្ហាប្រឈមនានារបស់កសិករ ជាពិសេសនៅពេលដែលតម្លៃទីផ្សារមានការប្រែប្រួល។ ការទិញ ស្រូវពីកសិករដោយផ្ទាល់ គឺជាយន្តការមួយដែលជួយកាត់បន្ថយអន្តរការី និងធានាថាប្រាក់ចំណេញទៅដល់ដៃកសិករពិតប្រាកដ។

ការដាក់ចេញនូវកិច្ចអន្តរាគមន៍ទាំងនេះ គឺជាផ្នែកមួយនៃយុទ្ធសាស្រ្តចតុកោណដំណាក់កាលទី៤ របស់រាជរដ្ឋាភិបាល ដែលផ្តោតសំខាន់លើការអភិវឌ្ឍវិស័យ កសិកម្ម ប្រកបដោយចីរភាព និងបរិយាប័ន្ន។ រាជរដ្ឋាភិបាលយល់ច្បាស់ថា ការគាំទ្រកសិករ គឺស្មើនឹងការគាំទ្រដល់សន្តិសុខស្បៀងជាតិ និងការលើកកម្ពស់ សេដ្ឋកិច្ចគ្រួសារ។ តាមរយៈវិធានការទាំងនេះ កសិករមានលទ្ធភាពកាន់តែប្រសើរក្នុងការបង្កើនផលិតភាព កាត់បន្ថយការចំណាយ និងបង្កើនប្រាក់ចំណូល។

ជាការកត់សម្គាល់ កិច្ចខិតខំប្រឹងប្រែងរបស់រាជរដ្ឋាភិបាលក្រោមការដឹកនាំរបស់សម្តេចបវរធិបតី ហ៊ុន ម៉ាណែត ក្នុងការស្វែងរកទីផ្សារ និងការដាក់ចេញនូវកិច្ច អន្តរាគមន៍ជាក់ស្តែងដូចជាការបញ្ចេញថវិកា ៦០លានដុល្លារជួយទិញស្រូវ និងការបូមទឹកស្រោចស្រព គឺជាសក្ខីភាពបញ្ជាក់ពីការប្តេជ្ញាចិត្តខ្ពស់ក្នុងការគាំទ្រ វិស័យកសិកម្ម និងលើកកម្ពស់ជីវភាពប្រជាកសិករកម្ពុជាឱ្យកាន់តែប្រសើរឡើង។ វិធានការទាំងនេះនឹងបន្តរួមចំណែកយ៉ាងសំខាន់ក្នុងការជំរុញកំណើនសេដ្ឋកិច្ចជាតិ និងធានាបាននូវវិបុលភាពសម្រាប់ប្រជាជនគ្រប់រូប៕