(ភ្នំពេញ)៖ សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តីនៃបច្ចុប្បន្ននេះ បានថ្លែងថា កម្ពុជាតូច ប្រជាជនតិច ប៉ុន្តែផលជលផល ឬកសិផលមានផលច្រើន ដូច្នេះរាជរដ្ឋាភិបាល ទើបប្រឹងប្រែងរកទីផ្សារនៅក្រៅប្រទេស ដើម្បីនាំចេញជលផល និងកសិផល ដែលសល់ពីការហូបទាំងនោះ និងដើម្បីផ្តល់ប្រយោជន៍ដល់កសិករ។

សម្តេចមហាបវរធិបតី ហ៊ុន ម៉ាណែត គូសបញ្ជាក់បែបនេះ ធ្វើឡើង ក្នុងឱកាសដែលសម្តេចអញ្ជើញប្រារព្ធទិវាមច្ឆជាតិ ស្ថិតក្នុងក្រុងស្វាយរៀង ខេត្តស្វាយរៀង នាព្រឹកថ្ងៃទី០១ ខែកក្កដា ឆ្នាំ២០២៦។

សម្តេចបវរធិបតី បានគូសបញ្ជាក់យ៉ាងដូច្នេះថា «ប្រទេសយើងជាប្រទេសតូច ហើយជាពិសេសដែលនាំចេញទៅក្រៅ ទីផ្សារកសិផលគឺសំខាន់ បរិមាណ និងតម្លៃដែលយើងត្រូវខិតខំ ដើម្បីផ្ទេរទៅឱ្យកសិកររបស់យើង បើមានផលិតផលហើយ យើងនាំចេញអត់បាន នៅក្នុងប្រទេសយើងប្រជាជន១៧លាននាក់ យើងហូបអត់អស់ទេ ។ឧទាហរណ៍ ក្នុងមួយឆ្នាំយើងផលិតស្រូវបាន១២លានតោន ១៧លាននាក់យើងប្រើអស់ខ្ទង់តែ៥ទៅ៦លានតោន អ៊ីចឹងសល់ពាក់កណ្តាលទៀត យើងត្រូវធានា នូវទីផ្សារ»។

សម្តេចនាយករដ្ឋមន្រ្តីបានមានប្រសាសន៍ថា ការចរចា និងការបើកច្រកទីផ្សារផ្សេងៗដែលរដ្ឋាភិបាលបានធ្វើនាពេលកន្លង គឺជាកិច្ចការសំខាន់ ដែលរាជរដ្ឋាភិបាលខិតខំ ជាពិសេសក្រសួងកសិកម្ម រុក្ខាប្រម៉ាញ់ និងនេសាទ ដែលជាសេនាធិការឱ្យរាជរដ្ឋាភិបាល ដោយក្រសួងបានដើរតួនាទីយ៉ាងសំខាន់ ក្នុងការបម្រើឱ្យកសិករ ព្រមទាំងការរកទីផ្សារ ដើម្បីបង្កើតឱកាស និងរកច្រកឱ្យកសិករអាចនាំចេញ។

សម្តេចបវរធិបតីបាន បន្ថែមថា ជាការពិត កសិករមិនអាចនាំចេញដោយខ្លួនឯងបាននោះទេ តែត្រូវធ្វើឡើងតាមរយៈក្រុមហ៊ុននាំចេញទៅតាមបណ្តាប្រទេសនានា ដូច្នេះហើយទើបរាជរដ្ឋាភិបាលព្យាបាលក្នុងការចរចាបើកទីផ្សារ បើទោះបីជាមិនងាយស្រួលក៏ដោយ៕