(មណ្ឌលគិរី)៖ លោក គង់ គឹមនី អភិបាលខេត្តមណ្ឌលគិរី បានប្រជុំណែនាំ ជំរុញឱ្យមន្រ្តីមន្ទីរសុខាភិបាលខេត្ត មានវិធានការជាបន្ទាន់ដើម្បីទប់ស្កាត់ជំងឺគ្រុនឈាម និងឈានទៅរកការលុបបំបាត់នៃជំងឺនេះ ស្របដែលពេលដែលជំងឺ គ្រុនឈាមបាននិងកំពុងបង្ហាញជាសញ្ញាថា កំពុងរាតត្បាតនៅមណ្ឌលគិរី កើនឡើងគួរឱ្យព្រួយបារម្ភ។

អភិបាលខេត្តបានជុំរុញឱ្យលោកប្រធានមន្ទីរសុខាភិបាលខេត្ត ធ្វើយ៉ាងណានៅពេលបងប្អូនប្រជាពលរដ្ឋ និងគ្រួសារ ដែលមានសមាជិកមានជំងឺសង្ស័យត្រូវនាំអ្នកជំងឺមកកាន់មន្ទីរពេទ្យបង្អែកខេត្តដើម្បីពិនិត្យ ព្យាបាល និងបំផុសស្មារតីបងប្អូនប្រជាពលេដ្ឋឱ្យគាត់យល់ដឹងពីទីកន្លែងជំរកមូសខ្លា ដែលជាប្រភពចំលងមេរោគគ្រុនឈាម។

សូមជម្រាបថា គិតត្រឹមសប្តាហ៍ទី៤ ខែមិថុនា ឆ្នាំ២០២៦ ចំនួនអ្នកផ្ទុកមេរោគបានហក់ឡើងរហូតដល់ ២៦៩ករណី។ នេះបើយោងតាមការបញ្ជាក់ពីលោក គីម ហេង អនុប្រធានការិយាល័យបង្ការ និងគ្រប់គ្រងជំងឺ នៃមន្ទីរសុខាភិបាលខេត្ត។

អ្វីដែលជាក្តីព្រួយបារម្ភបំផុតនោះ គឺអ្នកជំងឺភាគច្រើនគឺជាកុមារ និងយុវវ័យ ដែលមានអាយុចន្លោះពី ៦ ដល់ ១៨ ឆ្នាំ។ ទោះជាយ៉ាងណា គិតមកទល់ពេលនេះ មិនទាន់មានករណីស្លាប់បាត់បង់ជីវិតឡើយ។

លោកវេជ្ជបណ្ឌិត ប៊ុន សួរ ប្រធានមន្ទីរសុខាភិបាលខេត្តមណ្ឌលគិរី បានអំពាវនាវយ៉ាងទទូចដល់ប្រជាពលរដ្ឋ មាតាបិតា និងលោកគ្រូអ្នកគ្រូ ត្រូវរួមគ្នាសម្អាតបរិស្ថានជុំវិញលំនៅឋាន និងសាលារៀន។

ជាមួយគ្នានេះ លោកបានដាក់ចេញវិធានការគន្លឹះចំនួន ៤ចំណុច ដើម្បីចូលរួមអនុវត្តជាដាច់ខាត៖

*ទី១៖ កម្ទេចជម្រកមូសខ្លា ត្រូវផ្កាប់ពាង អាងទឹក និងប្រមូលកម្ទេចសំបកកង់ឡាន-ម៉ូតូ ឬវត្ថុដក់ទឹកភ្លៀង ដែលជាប្រភពបង្កាត់ពូជមូសខ្លា
*ទី២៖ សហការដាក់ថ្នាំអាបេត ត្រូវចូលរួមសម្របសម្រួលជាមួយមន្ត្រីសុខាភិបាល ក្នុងការដាក់ថ្នាំអាបេតក្នុងអាងទឹក និងបាញ់ថ្នាំសម្លាប់មូស
*ទី៣៖ ការពារការខាំពីមូសខ្លា ត្រូវតម្រូវឱ្យកូនៗពាក់អាវដៃវែង ខោជើងវែង និងគេងក្នុងមុងជានិច្ចទាំងថ្ងៃទាំងយប់
*ទី៤៖ ហាមដាច់ខាតការផ្សំថ្នាំព្យាបាលខ្លួនឯង ប្រសិនបើមានអាការៈក្តៅខ្លួនខ្លាំងភ្លាមៗ ត្រូវប្រញាប់បញ្ជូនអ្នកជំងឺទៅមណ្ឌលសុខភាព ឬមន្ទីរពេទ្យបង្អែកដែលនៅជិតបំផុត។ ការទិញថ្នាំលេប ឬចាក់ដោយខ្លួនឯង។

ទន្ទឹមនឹងនេះ មន្ទីរសុខាភិបាលខេត្ត បានបញ្ជាឱ្យមន្ត្រីសុខាភិបាលគ្រប់លំដាប់ថ្នាក់ ត្រូវត្រៀមលក្ខណៈឱ្យបាន ១០០ភាគរយ ទាំងកម្លាំង ឱសថ និងបរិក្ខារ ដើម្បីឆ្លើយតបនឹងស្ថានភាពនេះដោយស្មារតីទទួលខុសត្រូវ៕