(កណ្តាល)៖ កម្លាំងនគរបាលស្រុកអង្គស្នួល បានឃាត់ខ្លួនជនសង្ស័យ៤នាក់ ក្នុងនោះ៣នាក់ធ្លាប់ជាប់ពន្ធនាគារ តែពេលបានចេញមកវិញមិនរាងចាល មកជួញដូរ រក្សាទុក និងប្រើប្រាស់ដោយខុសច្បាប់នូវសារធាតុញៀនដដែល។

ករណីឃាត់ខ្លួននេះ ធ្វើឡើងនៅថ្ងៃទី២៩ ខែមិថុនា ឆ្នាំ២០២៦ នៅចំណុចផ្លូវលំស្ថិតនៅក្នុងភូមិត្រពាំងស្មាច់ ឃុំម្កាក់ ស្រុកអង្គស្នួល ខេត្តកណ្ដាល។

សមត្ថកិច្ច បានឲ្យដឹងថា ជនសង្ស័យចំនួន៤នាក់ រួមមាន៖

*ទី១៖ ឈ្មោះ សុខ កាន់ អាយុ៤១ឆ្នាំ ធ្លាប់ជាប់ពន្ធនាគារខេត្តកំពង់ស្ពឺ​ ១លើក រយៈពេល​២ឆ្នាំ
*ទី២៖ ឈ្មោះ ជួង ផល្លី អាយុ៣១ឆ្នាំ ធ្លាប់ជាប់ពន្ធនាគារខេត្តកំពង់ឆ្នាំង​ ១លើក រយៈពេល​០៣ឆ្នាំ​ ពីបទ​ជួញដូរដោយខុសច្បាប់នូវសារធាតុញៀន​
*ទី៣៖ ឈ្មោះ ម៉ន រ័ត្ន អាយុ៤១ឆ្នាំ
*ទី៤៖ ឈ្មោះ​ សាង​ ផាផាន់ អាយុ​២១ឆ្នាំ ​ធ្លាប់​ជាប់ពន្ធនាគារ​ខេត្ត​កណ្តាល​ ១លើករយៈពេល​១ឆ្នាំ​ ករណីលួច។ ជនសង្ស័យទាំង០៤ គ្មានមុខរបរពិតប្រាកដ និងរស់នៅឃុំម្កាក់ ស្រុកអង្គស្នួល ខេត្តកណ្តាល។

នៅមុនពេលកើតហេតុ កម្លាំងផ្នែកជំនាញប្រឆាំងគ្រឿងញៀនស្រុក សហការជាមួយ​កម្លាំងប៉ុស្តិ៍នគរបាលរដ្ឋបាលម្កាក់ ចេញល្បាតនៅក្នុងភូមិសាស្ត្រ​ លុះដល់ចំណុចកើតហេតុ​ បានប្រទះឃើញជនសង្ស័យ ដែលជាមុខសញ្ញចំនួន២នាក់ដំបូង កម្លាំងបានឃាត់សួរនាំត្រួតពិនិត្យរកឃើញម្សៅក្រាមសថ្លា​សង្ស័យ​សារធាតុញៀន (ម៉ាទឹកកក) ០១កញ្ចប់ លាក់ទុកក្នុងហោប៉ៅខោ ដែលពួកខ្លួនបានទិញ ក្នុងតំលៃ ១.៥០០រៀល ពីជនមិនស្គាល់ឈ្មោះនៅម្តុំផ្លូវជាតិលេខ៤២។

ក្រោយសួរនាំ កម្លាំងសមត្ថកិច្ចបានបន្តឃាត់ខ្លួនបានបក្ខពួកបាន២នាក់ និងថ្នាំញៀន០១កញ្ចប់បន្ថែមទៀត។ ជនសង្ស័យទាំង៤នាក់ រួមនឹងវត្ថុតាងបាន នាំមកកាន់អធិការដ្ឋានស្រុកអង្គស្នួល ដើម្បីកសាងសំណុំរឿងចាត់ការតាមនីតិវិធី៕