(តាកែវ)៖ មន្ទីរពេទ្យបង្អែកខេត្តតាកែវ បានប្រកាសស្វាគមន៍យ៉ាងកក់ក្ដៅ ចំពោះបងប្អូនប្រជាពលរដ្ឋទាំងអស់ ដែលមានបំណងមកទទួលសេវាតេស្តពិនិត្យសុខភាពទូទៅ នៅមន្ទីរពិសោធន៍វេជសាស្រ្ត ដែលមានឧបករណ៍ទំនើបៗ។

បើយោងតាមការប្រកាសរបស់មន្ទីរពេទ្យបង្អែកខេត្តតាកែវ ដើម្បីឆ្លើយតបទៅនឹងតម្រូវការជាក់ស្ដែងក៍ដូចជាការគិតគូ ពីតម្លៃពេលវេលាដ៍មានតម្លៃរបស់បងប្អូនប្រជាពលរដ្ឋ មន្ទីរពិសោធន៍របស់មន្ទីរពេទ្យបង្អែកខេត្តតាកែវ មានសេចក្ដីសោមនស្សរីករាយ ក្នុងការផ្ដល់ជូននូវ «សេវាពិនិត្យសុខភាពទូទៅដោយផ្ទាល់» ដែលជាយន្តការថ្មីមួយ ជួយឲ្យបងប្អូន ប្រជាពលរដ្ឋអាចមកទទួលសេវាកម្មតេស្តឈាម និងពិនិត្យទឹកនោមបានភ្លាមៗ ដោយមិនចាំបាច់ឆ្លងកាត់ដំណើរការចុះឈ្មោះស្មុគស្មាញជាមួយមន្ទីរពេទ្យឡើយ។

គោលបំណងដ៏ធំរបស់មន្ទីរពេទ្យ គឺបង្កើតភាពងាយស្រួលផ្ដល់ភាពស្រឡះចិត្ត និងកាត់បន្ថយពេលវេលារងចាំរបស់បងប្អូនប្រជាពលរដ្ឋ ឲ្យមកនៅត្រឹមកម្រិតទាបបំផុត។

បើតាមការប្រកាសរបស់មន្ទីរពេទ្យ សម្រាប់មន្ទីរពិសោធន៍របស់មន្ទីរពេទ្យមានម៉ាស៊ីនទំនើបៗ បុគ្គលិកមានសមត្ថភាព និងមានភាពរួសរាយរាក់ទាក់ ដើម្បីផ្តល់នូវសេវាមន្ទីរពិសោធន៍ដ៏មានគុណភាព ផ្តល់លទ្ធផលវិភាគត្រឹមត្រូវ អាចទុកចិត្តបាន និងទាន់ពេលវេលាសម្រាប់បងប្អូនប្រជាពលរដ្ឋ៕