អាជ្ញាធរថៃ បញ្ជូនពលករខ្មែរ៥១នាក់មកស្រុកកំណើតវិញ តាមច្រកទ្វារអន្តរជាតិប៉ោយប៉ែត
01-07-2026 15:02
(បន្ទាយមានជ័យ)៖ អាជ្ញាធរថៃ នៅថ្ងៃទី១ ខែកក្តដា ឆ្នាំ២០២៦ បានបញ្ជូនពលករខ្មែរចំនួន ៥១នាក់ ឱ្យអាជ្ញាធរកម្ពុជាវិញ តាមច្រកទ្វារព្រំដែនអន្តរជាតិប៉ោយប៉ែត ខេត្តបន្ទាយមានជ័យ។
ពិធីទទួលពលករខ្មែរ ឃើញវត្តមានឧត្តមសេនីយ៍ត្រី អ៊ី ចំរើន នាយប៉ុស្តិ៍នគរបាលអន្តោប្រវេសន៍ច្រកទ្វារព្រំដែនអន្តរជាតិប៉ោយប៉ែត និងលោក គាត ហ៊ុល អភិបាលក្រុងប៉ោយប៉ែត និងលោកវរសេនីយ៍ទោ សេម មករា នាយរងប៉ុស្តិ៍នគរបាលអន្តោប្រវេសន៍ និងក្រុមការងារ។
លោកឧត្តមសេនីយ៍ត្រី អ៉ី ចំរើន បានឱ្យដឹងថា ពលករខ្មែរ ដែលអាជ្ញាធរថៃ ចាប់បញ្ជូនតាមច្រកទ្វារព្រំដែនអន្តរជាតិប៉ោយប៉ែត មានចំនួន៥១នាក់ ក្នុងនោះស្រី១៦នាក់ ដែលបានយកចិត្តទុកដាក់ពីអាជ្ញាធរកម្ពុជា បានជូនអាហារសម្រន់មានម្នាក់បាយ និងទឹក។
លោកបានបញ្ជាក់ថា ពលករខ្មែរចំនួន៥១នាក់ ដែលអាជ្ញាធរកម្ពុជាទទួលមានពលករខ្មែរធ្វើការងារដោយខុសច្បាប់ និងពលករខ្មែរដែលចាញ់បោកមេខ្យល់លួចឆ្លងដែនទៅរកការងារធ្វើ និងអាជីវករខ្មែរដែលលក់ដូរនៅផ្សាររ៉ូងក្លឿ ប្រទេសថៃ ដែលស្នាក់នៅដោយខុសច្បាប់ ត្រូវបានចាប់បញ្ជូនមកកម្ពុជាវិញ។
លោកឧត្តមសេនីយ៍ត្រី អ៉ី ចំរើន បានបញ្ជាក់ថា នៅអំឡុងខែមិថុនា ឆ្នាំ២០២៦កន្លងទៅ អាជ្ញាធរកម្ពុជា បានទទួលពលករខ្មែរ ដែលអាជ្ញាធរថៃ ចាប់បញ្ជូនតាមច្រកទ្វារព្រំដែនអន្តរជាតិប៉ោយប៉ែត ចំនួន២លើក គឺនៅលើកទី១៖ កាលពីថ្ងៃទី០៥ ខែមិថុនា ឆ្នាំ២០២៦ មានពលករខ្មែរចំនួន ១២២នាក់ស្រី៤៤នាក់ និងកុមារ១៤នាក់ និងលើកទី២៖ កាលពីថ្ងៃទី១៨ ខែមិថុនា ឆ្នាំ២០២៦ មានពលករចំនួន ៨៨នាក់ ស្រី៣២នាក់ និងកុមារ៧នាក់។
ដោយឡែកកម្ពុជា បានបញ្ជូនជនជាតិថៃ ចេញ១លើក នៅថ្ងៃទី២៣ ខែមិថុនា ឆ្នាំ២០២៦ មានចំនួន៤៩នាក់ ស្រី១៨នាក់ ដែលឃាត់ខ្លួនពាក់ព័ន្ធបង្ក្រាបបទល្មើសឆបោកតាមប្រព័ន្ធបច្ចេកវិទ្យា (Online Scmas) នៅក្រុងប៉ោយប៉ែត៕
