(ភ្នំពេញ)៖ ដោយមានការឧបត្ថម្ភពីភេសជ្ជៈ Pocari Sweat ការប្រកួតបាល់ទាត់មិត្តភាព រវាងក្រុមបាល់ទាត់ FCA និងក្រុមបាល់ទាត់ទូរទស្សន៍ជាតិកម្ពុជា (TVK) ត្រូវបានរៀបចំឡើងនៅល្ងាចថ្ងៃទី៣០ ខែមិថុនា ឆ្នាំ២០២៦ នៅតារាងបាល់ទាត់ឃីងស្ពត ប្រកបដោយជោគជ័យ ជាលទ្ធផលក្រុមទាំងពីរ គ្មានអ្នកឈ្នះ និងគ្មានអ្នកចាញ់ គឺឈ្នះមិត្តភាព និងសុខភាពទាំងអស់គ្នា។

លើវាលស្មៅសប្បនិម្មិត ២តង់រយៈពេលសរុបចំនួន ១០០នាទី កីឡាករទាំងពីរក្រុម បានប្រកួតដោយការយោគយល់ អាធ្យាស្រ័យគ្នាទៅវិញទៅមក មិនមានការប៉ះទង្គិចគ្នា ធ្វើឱ្យកីឡាករណាម្នាក់រងរបួសនោះឡើយ។

លោក លឹម ជាវុត្ថា អគ្គនាយក Fresh News, CoolApp & Fresh AI និងជាប្រធានបាល់ទាត់ FCA និងលោក ឃឹម វុទ្ធី អគ្គនាយកទូរទស្សន៍ជាតិកម្ពុជា បានបង្ហាញនូវក្តីរីករាយ ចំពោះការប្រកួតបាល់ទាត់មិត្តភាពនេះ ដែលជំរុញឱ្យមន្ត្រី និងបុគ្គលិកនៃស្ថាប័នព័ត៌មានបានស្គាល់គ្នា បង្កើតនូវសាមគ្គីភាពដ៏រឹងមាំ បង្កើនកិច្ចសហការ និងជំរុញស្មារតីស្រឡាញ់សុខភាព តាមរយៈការលេងកីឡា និងហាត់ប្រាណ បន្ទាប់ពីនឿយហត់ពីការងារប្រចាំថ្ងៃ ព្រោះថាការមានសុខភាពល្អ គឺជារង្វាន់ដ៏មានតម្លៃបំផុតសម្រាប់បុគ្គលិកគ្រប់រូប។

គោលបំណងនៃការប្រកួតបាល់ទាត់នេះ ដើម្បីតែមិត្តភាព និងសុខភាពប៉ុណ្ណោះ ហើយការប្រកួតនេះ គ្មានអ្នកឈ្នះ ក៏គ្មានអ្នកចាញ់ដែរ គឺឈ្នះទាំងអស់គ្នា ឈ្នះមិត្តភាព និងឈ្នះសុខភាព។

លោកអគ្គនាយកស្ថាប័នព័ត៌មានទាំងពីរ បានអំពាវនាវរួមគ្នាដល់បងប្អូនប្រជាពលរដ្ឋ ពិសេសបងប្អូនអ្នកសារព័ត៌មាន ដែលមានសុខភាពមិនសូវល្អ សូមនាំគ្នាលេងកីឡាឱ្យបានគ្រប់ៗគ្នា ព្រោះមានសុខភាពល្អ ទើបមានអ្វីៗតាមក្រោយ។

ជាមួយគ្នានេះ ប្រធានក្រុមទាំងពីរសុទ្ធតែអះអាងដូចគ្នាថា នឹងមានការប្រកួតមិត្តភាពបែបនេះលើកក្រោយៗទៀត អាចរយៈពេល១ខែជួបគ្នាម្តង៕