(សៀមរាប)៖ លោក យឿន ចាន់ អនុប្រធានមន្ទីរព័ត៌មានខេត្តសៀមរាប ទទួលបន្ទុករួម បានលើកឡើងនៅថ្ងៃទី១ ខែកក្កដា ឆ្នាំ២០២៦នេះថា មន្ទីរព័ត៌មានខេត្តសៀមរាប នឹងចាប់ផ្ដើមយុទ្ធនាការ «និយាយថាទេចំពោះព័ត៌មានក្លែងក្លាយ» ជំហានទី២ ក្រោមប្រធានបទ «ពង្រឹងអក្ខរកម្មព័ត៌មាន និងប្រព័ន្ធផ្សព្វផ្សាយដើម្បីសុវត្ថិភាពព័ត៌មាន»។

លោកបានថ្លែងថា ដែលផ្ដោតលើការពង្រឹងអក្ខរកម្មព័ត៌មានដល់សាធារណជន ជាពិសេសយុវជនដោយអនុវត្តយុទ្ធសាស្ត្រ «៣កុំ ១ការពារ» ជាអាវក្រោះឌីជីថល ដើម្បីទប់ស្កាត់ព័ត៌មានបំភ្លៃ និងព័ត៌មានមិនពិត ដែលចាប់ផ្ដើមអនុវត្តចាប់ពីដើមខែកក្កដា ឆ្នាំ២០២៦នេះតទៅ។

លោកបានបន្តថា យុទ្ធនាការ «និយាយថាទេចំពោះព័ត៌មានក្លែងក្លាយ» បានដើរតួនាទីយ៉ាងសំខាន់ ជាខែលការពារពលរដ្ឋ ពិសេសជួយយុវជនកម្ពុជាឱ្យជៀសផុតពីហានិភ័យនៃការឆបោក, ការកេងចំណេញផ្នែកនយោបាយ, គ្រោះថ្នាក់នៃព័ត៌មានក្លែងក្លាយ, បានចូលរួមផ្ដល់ស្ថិរភាពសតិអារម្មណ៍ ដោយទប់ស្កាត់បាននូវការធ្លាក់ចូលក្នុងអន្ទាក់ព័ត៌មានក្លែងក្លាយ។

លោក យឿន ចាន់ បានលើកឡើងថា យុទ្ធនាការនេះ ជាក្លាយជាសក្ខីកម្មឆ្លុះបញ្ចាំងពីការប្ដេជ្ញាចិត្តរបស់រាជរដ្ឋាភិបាល និងក្រសួងព័ត៌មាន ក្នុងការពង្រឹងសន្ដិសុខព័ត៌មាន និងកសាងភាពធន់ឌីជីថលជូនដល់ប្រជាពលរដ្ឋគ្រប់រូប ជាពិសេសការការពារយុវវ័យកម្ពុជា ឱ្យចៀសផុតពីមហន្តរាយនៃព័ត៌មានក្លែងក្លាយ។

លោក យឿន ចាន់ បានបញ្ជាក់ថា កាលពីជំហានទី១ យុទ្ធនាការនេះ បានប្រព្រឹត្តទៅយ៉ាងរលូន ដោយមានការចូលរួមពីអាជ្ញាធរខេត្ត អ្នកសារព័ត៌មាន អ្នកបង្កើតមាតិកាបណ្ដាញសង្គម សិស្ស និស្សិត អាជីវករ និងប្រជាពលរដ្ឋទូទៅយ៉ាងផុលផុស។ យ៉ាងណា សម្រាប់យុទ្ធនាការជំហានទី២នេះ បន្ទាប់ពីក្រសួងព័ត៌មានបានប្រកាសបើក និងដាក់ឱ្យដំណើរការជាផ្លូវការ កាលពីខែឧសភា ឆ្នាំ២០២៦កន្លងទៅ មន្ទីរព័ត៌មានខេត្តសៀមរាប ក៏បានត្រៀមខ្លួនរួចជាស្រេចក្នុងការរៀបចំយុទ្ធនាការនេះ ដែលនឹងចាប់ផ្ដើមពីដើមខែកក្កដា ឆ្នាំ២០២៦នេះ។

អនុប្រធានមន្ទីរ ក៏បានអំពាវនាវដោយទទូចដល់សាធារណជនទូទៅ ជាពិសេសយុវជនប្រើបច្ចេកវិទ្យាឱ្យចំគោលដៅការសិក្សាស្រាវជ្រាវ ព្រមទាំងការបង្កើនការប្រុងប្រយ័ត្នចំពោះការចែកចាយព័ត៌មានមិនពិតដែលកំពុងចរាចរលើបណ្ដាញសង្គម។ នៅពេលដែលយើងប្រើប្រាស់បច្ចេកវិទ្យាបានត្រឹមត្រូវតាមគោលដៅ វានឹងផ្ដល់ផលប្រយោជន៍ និងផ្ដល់តម្លៃមកឱ្យយើងវិញ។

សូមបញ្ជាក់ថា យុទ្ធនាការ «និយាយថាទេចំពោះព័ត៌មានក្លែងក្លាយ» ជំហានទី២នេះ មន្ទីរព័ត៌មានខេត្តសៀមរាប នឹងរៀបចំឡើងផ្ទាល់ចំនួន ៤ទីតាំង រួមមាន៖ វិទ្យាល័យ ១០ មករា ១៩៧៩ ក្នុងក្រុងសៀមរាប, វិទ្យាល័យ ហ៊ុន សែន ស្វាយធំ ក្នុងស្រុកប្រាសាទបាគង, វិទ្យាល័យបន្ទាយស្រី ក្នុងស្រុកបន្ទាយស្រី និងវិទ្យាល័យចំណេះទូទៅ និងបច្ចេកទេសពួក ក្នុងស្រុកពួក ខេត្តសៀមរាប៕