(ភ្នំពេញ)៖ លោក ជា វ៉ាន់ដេត រដ្ឋមន្រ្តីក្រសួងប្រៃសណីយ៍ និងទូរគមនាគមន៍ (ក.ប.ទ.) នាព្រឹកថ្ងៃទី១ ខែកក្កដា ឆ្នាំ២០២៦ បានអនុញ្ញាតជូនលោក អ៊ូអិណុ អាត់ស៊ូស៊ី (UENO Atsushi) ឯកអគ្គរាជទូតជប៉ុនប្រចាំកម្ពុជា ចូលជួបសម្ដែងការគួរសម និងជម្រាបលាក្នុងឱកាសដែលលោក បានបញ្ចប់បេសកកម្មនៅកម្ពុជា នៅទីស្ដីការ ក.ប.ទ.។

ក្នុងជំនួបនេះ លោករដ្ឋមន្រ្តី និងលោកឯកអគ្គរាជទូត បានពិភាក្សា និងផ្លាស់ប្តូរយោបល់គ្នា លើការងារពាក់ព័ន្ធនឹងបច្ចេកវិទ្យាឌីជីថល មជ្ឈមណ្ឌលទិន្នន័យជាតិ កិច្ចសហប្រតបត្តិការរវាងស្ថាប័នទាំងពីរ នាពេលកន្លងមក និងកិច្ចការងារដែលត្រូវសហការគ្នាបន្ត។

មុននឹងបញ្ចប់ លោករដ្ឋមន្រ្តី និងលោកឯកអគ្គរាជទូត បានប្តេជ្ញាបន្តកិច្ចសហប្រតិបត្តិការរវាងស្ថាប័នទាំងពីរជាមួយគ្នា ឱ្យកាន់តែល្អប្រសើរបន្ថែមទៀត។ បន្ថែមលើនេះ លោករដ្ឋមន្រ្តី បានជូនពរ លោកឯកអគ្គរាជទូត បានទទួលនូវជោគជ័យបន្ថែមទៀត ក្នុងបេសកកម្មរបស់ខ្លួន៕