(ភ្នំពេញ)៖ គិតត្រឹមថ្ងៃទី១ ខែកក្កដា ឆ្នាំ២០២៦ សំណុំរឿងគ្រោះថ្នាក់ចរាចរណ៍ដ៏រន្ធត់មួយ ដែលបានបណ្តាលឱ្យនិស្សិតស្រីម្នាក់បាត់បង់ជីវិត កាលពីថ្ងៃទី៨ ខែមេសា ឆ្នាំ២០២៦ កន្លងទៅ ហាក់កំពុងស្ថិតក្នុងភាពស្រពិស្រពិល និងស្ងាត់ជ្រាប ដែលធ្វើឱ្យក្រុមគ្រួសារជនរងគ្រោះធ្លាក់ក្នុងភាពអស់សង្ឃឹមយ៉ាងខ្លាំង រហូតដង្ហោយហៅស្វែងរកកិច្ចអន្តរាគមន៍ពីថ្នាក់ដឹកនាំ ដើម្បីស្វែងរកពន្លឺយុត្តិធម៌។ ករណីនេះ បានកើតឡើងនៅចំណុចក្បែររង្វង់មូលគួរស្រូវ ស្ថិតក្នុងសង្កាត់រលួស ខណ្ឌដង្កោ រាជធានីភ្នំពេញ បង្កឡើងដោយរថយន្តខ្នាតយក្សដឹកសសរបេតុងរបស់ក្រុមហ៊ុន «បូសខន អ៊ិនវេសម៉ិន ត្រេឌីង» (Bosskorn Investment Trading)។

យុវតីរងគ្រោះត្រូវបានគេស្គាល់ឈ្មោះថា ស៊ុំ លីហ្សា អាយុ២១ឆ្នាំ ជានិស្សិតឆ្នាំទី៣ ដែលបានបាត់បង់ជីវិតយ៉ាងអាណោចអាធ័ម។ យោងតាមប្រភពពីកន្លែងកើតហេតុ និងក្រុមគ្រួសារជនរងគ្រោះ បានឱ្យដឹងថា នៅមុនពេលកើតហេតុ រថយន្តខ្នាតយក្សរបស់ក្រុមហ៊ុនខាងលើ បានបើកបរដឹកសសរបេតុងធំៗចេញពីទីតាំងក្រុមហ៊ុន ដោយការធ្វេសប្រហែសបំផុត និងគ្មានព្រូឡាន (អ្នកបញ្ជាចរាចរណ៍) ចាំជួយសម្រួលផ្លូវនោះឡើយ។ ស្ថានភាពនេះបានធ្វើឱ្យយុវតីរងគ្រោះ ដែលកំពុងធ្វើដំណើរលើផ្លូវអាទិភាពវាក់អើ រហូតជ្រុលចង្កូតចូលក្រោមរថយន្ត បណ្តាលឱ្យកិនស្លាប់បាត់បង់ជីវិតភ្លាមៗ។

ក្រោយពេលកើតហេតុ តៃកុងរថយន្តបង្កបានរត់គេចខ្លួនចូលទៅក្នុងទីតាំងក្រុមហ៊ុនបាត់ស្រមោល ខណៈខាងក្រុមហ៊ុនបានរងការចោទប្រកាន់ថា បានព្យាយាមលាក់បាំងជនបង្ក និងមិនបង្ហាញទំនួលខុសត្រូវចំពោះមុខច្បាប់។ ក្រុមគ្រួសារសពបានសម្តែងការហួសចិត្ត និងឈឺចាប់ជាខ្លាំង ចំពោះចំណាត់ការដោះស្រាយនាពេលកន្លងមក ដោយពួកគាត់បានទម្លាយថា ខាងក្រុមហ៊ុនបានព្យាយាមបញ្ចប់រឿងដោយផ្តល់ប្រាក់សំណងត្រឹមតែ ២,២០០ដុល្លារប៉ុណ្ណោះ ដែលជាការប្រមាថយ៉ាងធ្ងន់ធ្ងរដល់តម្លៃជីវិតមនុស្ស។

ឪពុកម្តាយក្មេងស្រីរងគ្រោះ បានរៀបរាប់ទាំងទឹកភ្នែកថា «មកដល់ពេលនេះ កូនស្រីខ្ញុំស្លាប់ទៅហើយ ឯសំណុំរឿងមិនដឹងដល់ណានោះទេ ឬក៏គេបិទសំណុំរឿងចោលហើយ ព្រោះតែឃើញយើងជាគ្រួសារក្រីក្រ? គេឱ្យតម្លៃជីវិតកូនស្រីខ្ញុំត្រឹមតែ ២,២០០ដុល្លារ បើមិនយកក៏មិនដឹងធ្វើអ្វីគេដែរ។ ក្រុមហ៊ុននេះប្រាកដជារបស់អ្នកមានអំណាចហើយ បានជាសំណុំរឿងស្ងាត់ជ្រាបដូចចោរលួចសេះបែបនេះ»។ សម្តីទាំងនេះបានឆ្លុះបញ្ចាំងពីភាពអស់សង្ឃឹម និងការឈឺចាប់យ៉ាងខ្លាំងរបស់ក្រុមគ្រួសារ ដែលមានអារម្មណ៍ថា យុត្តិធម៌កំពុងតែឃ្លាតឆ្ងាយពីពួកគាត់។

ដោយសារតែបាត់បង់ជំនឿចិត្តលើចំណាត់ការនៃការដោះស្រាយ និងបារម្ភថាខ្លួនជាជនក្រីក្រត្រូវរងភាពអយុត្តិធម៌រាប់សិបឆ្នាំ គ្រួសារសពបានអំពាវនាវ និងដាក់ក្តីសង្ឃឹមចុងក្រោយទៅលើថ្នាក់ដឹកនាំពាក់ព័ន្ធជួយអន្តរាគមន៍ និងផ្តល់ពន្លឺយុត្តិធម៌ដ៏ពេញលេញមួយជូនដល់កូនស្រីរបស់ពួកគាត់ផង។ ការអំពាវនាវនេះ គឺជាការបង្ហាញពីជំនឿទុកចិត្តចុងក្រោយរបស់ប្រជាពលរដ្ឋចំពោះថ្នាក់ដឹកនាំកំពូល ក្នុងការស្វែងរកដំណោះស្រាយប្រកបដោយយុត្តិធម៌ និងតម្លាភាព។

មហាជន និងអ្នកលេងបណ្តាញសង្គមជាច្រើន កំពុងតែតាមដានមើលយ៉ាងយកចិត្តទុកដាក់ថា តើមានចំណាត់ការយ៉ាងដូចម្តេចចំពោះជនបង្កហេតុប្រកបដោយតម្លាភាព និងយុត្តិធម៌កម្រិតណា ដើម្បីកុំឱ្យតម្លៃជីវិតមនុស្ស ត្រូវបានទិញដូរដោយទឹកប្រាក់ដ៏តិចតួចបែបនេះ។ ករណីនេះបានក្លាយជាប្រធានបទក្តៅគគុកមួយ ដែលទាមទារឱ្យមានការដោះស្រាយប្រកបដោយភាពម៉ឺងម៉ាត់ និងស្មើភាពគ្នាចំពោះមុខច្បាប់ ដើម្បីធានាបាននូវជំនឿទុកចិត្ត របស់សាធារណជនចំពោះប្រព័ន្ធយុត្តិធម៌៕