(ភ្នំពេញ)៖ មជ្ឈមណ្ឌលបោះពុម្ពផ្សាយអន្តរជាតិចិន (China International Publishing Center – CIPC) បានអញ្ជើញបណ្តាញព័ត៌មាន Fresh News ចូលរួមវេទិកាសន្ទនាស្តីពីបេតិកភណ្ឌវប្បធម៌ ចិន–អាស៊ាន នៅប្រទេសចិន។

លោកអគ្គនាយក លឹម ជាវុត្ថា បានចាត់តាំងលោកនិពន្ធនាយករង កែវ ពិសិដ្ឋ ទៅចូលរួមវេទិកាសន្ទនាស្តីពីបេតិកភណ្ឌវប្បធម៌ ចិន–អាស៊ាន មួយនេះ ចាប់ពីថ្ងៃទី១ ដល់ថ្ងៃទី៥ ខែកក្កដា ឆ្នាំ២០២៦។

លិខិតអញ្ជើញបានឲ្យដឹងថា «ឆ្នាំ២០២៦ គឺជាឆ្នាំគម្រប់ខួបលើកទី៥ នៃភាពជាដៃគូយុទ្ធសាស្ត្រគ្រប់ជ្រុងជ្រោយរវាងចិន និងអាស៊ាន។ ដើម្បីពង្រឹងកិច្ចសហប្រតិបត្តិការឆ្លងដែនលើវិស័យបេតិកភណ្ឌវប្បធម៌ និងលើកកម្ពស់ការផ្លាស់ប្តូរអរិយធម៌ឱ្យកាន់តែស៊ីជម្រៅ មជ្ឈមណ្ឌលបោះពុម្ពផ្សាយអន្តរជាតិចិន (China International Publishing Center – CIPC) នឹងរៀបចំ វេទិកាសន្ទនាស្តីពីបេតិកភណ្ឌវប្បធម៌ ចិន–អាស៊ាន នៅទីក្រុង តុនហួង (Dunhuang) ខេត្តកានស៊ូ (Gansu) ចាប់ពីថ្ងៃទី១ ដល់ថ្ងៃទី៥ ខែកក្កដា ឆ្នាំ២០២៦»។

បើតាមលិខិតអញ្ជើញដដែល ដោយផ្អែកលើភាពជោគជ័យនៃការរៀបចំកន្លងមកនៅតំបន់ ក្វាងស៊ី (Guangxi) និង កានស៊ូ (Gansu) ក្នុងឆ្នាំ២០២៤–២០២៥ វេទិកានេះបានក្លាយជាវេទិកាដ៏សំខាន់មួយសម្រាប់លើកកម្ពស់មិត្តភាព និងការយល់ដឹងទៅវិញទៅមក ដែលត្រូវបានទទួលស្គាល់ដោយអតីតអគ្គនាយិកាអង្គការយូណេស្កូ លោកស្រី Irina Bokova។

ក្រោមប្រធានបទ «បេតិកភណ្ឌស្ថិតស្ថេរ សម្រស់រួមសម្រាប់មនុស្សទាំងអស់» (Enduring Heritage, Shared Beauty for All) ព្រឹត្តិការណ៍នេះនឹងប្រមូលផ្តុំតំណាងមកពីអង្គការអន្តរជាតិ អ្នកការទូតអាស៊ាន អ្នកប្រាជ្ញ ស្ថាប័នស្រាវជ្រាវ (Think Tanks) ស្ថាប័នសារព័ត៌មាន និងអ្នកដឹកនាំក្នុងវិស័យពាក់ព័ន្ធ។

កិច្ចពិភាក្សានឹងផ្តោតលើការអភិរក្សប្រកបដោយនវានុវត្តន៍ កិច្ចសហប្រតិបត្តិការពហុភាគី និងការសហការឆ្លងវិស័យ ដើម្បីជំរុញការអភិវឌ្ឍប្រកបដោយចីរភាពនៃបេតិកភណ្ឌរួមរបស់យើង។

ក្នុងឱកាសនៃវេទិកាសន្ទនានេះ នឹងមានការរៀបចំដំណើរទស្សនកិច្ចពិសេសសម្រាប់អ្នកសារព័ត៌មានអន្តរជាតិ ដែលរួមមានការចុះទស្សនកិច្ចនៅតាមទីតាំងជាក់ស្តែងផងដែរ៕