(ភ្នំពេញ)៖ នៅព្រឹកថ្ងៃទី២ ខែកក្កដា ឆ្នាំ២០២៦នេះ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា និងលោកជំទាវបណ្ឌិត ពេជ ចន្ទមុន្នី ហ៊ុនម៉ាណែត អញ្ជើញជាអធិបតីក្នុងពិធីអបអរសាទរខួបលើកទី៣០ឆ្នាំ នៃអង្គការដើម្បីភាពញញឹម នៃកុមារ (PSE) និងប្រគល់សញ្ញាបត្រជូនដល់សិស្ស-និស្សិត សម្រាប់ឆ្នាំសិក្សា២០២១-២០២៤ ចំនួន៥០០នាក់ (ស្រី៣១៩នាក់) ក្នុងកម្រិតបរិញ្ញាបត្របច្ចេកទេស សញ្ញាបត្រជាន់ខ្ពស់បច្ចេកទេស និងសញ្ញាបត្របច្ចេកទេស និងវិជ្ជាជីវៈ៣ (C3)។

អង្គការដើម្បីភាពញញឹមនៃកុមារ ហៅកាត់ជាភាសាបារាំងថា PSE ត្រូវបានបង្កើតឡើងក្នុងប្រទេសកម្ពុជានៅក្នុងឆ្នាំ១៩៩៦ ដោយលោក និងលោកស្រី Christian និង Marie-France Des Pallières។ ដើម្បីបំពេញបេសកកម្មក្នុងប្រទេសកម្ពុជា PSE បានចុះអនុស្សារណៈជាមួយក្រសួងការបរទេស និងសហប្រតិបត្តិការអន្តរជាតិ ក្រសួងអប់រំយុវជន និងកីឡា ក្រសួងការងារ និងបណ្តុះបណ្តាលវិជ្ជាជីវៈ ក្រសួងសុខាភិបាល និងក្រសួងសង្គមកិច្ច អតីតយុទ្ធជន និងយុវនីតិសម្បទា ព្រមទាំងទទួលបានការសហការយ៉ាងជិតស្និទ្ធជាមួយរដ្ឋបាលមូលដ្ឋាន។

ចាប់តាំងពីឆ្នាំ១៩៩៦មក PSE បានជួយកុមារ និងយុវជនដែលមកពីគ្រួសារទីទ័លក្រ និងមិនបានទទួលការអប់រំដែលស្ថិតនៅរាជធានីភ្នំពេញ ខេត្តសៀមរាប និងខេត្តព្រះសីហនុ តាមរយៈកម្មវិធីប្រតិបត្តិចំនួន៦ធំៗគឺ៖ ទី១ កម្មវិធីអាហារ, ទី២ កម្មវិធីសុខភាព, ទី៣ កម្មវិធីការពារ និងការស្នាក់នៅ, ទី៤ កម្មវិធីអប់រំចំណេះទូទៅ, ទី៥ កម្មវិធីបណ្តុះបណ្តាលវិជ្ជាជីវៈ និងឧត្តមសិក្សា និងទី៦ កម្មវិធីផ្តល់ជំនួយដល់គ្រួសារ។ កម្មវីធីទាំងអស់នេះ គឺជាការចូលរួមចំណែកជាមួយនឹងគោលនយោបាយរបស់រាជរដ្ឋាភិបាល។

អង្គការដើម្បីភាពញញឹម នៃកុមារ (PSE) បានដើរតួនាទីយ៉ាងសំខាន់ក្នុងការជួយកុមារ និងយុវជនកម្ពុជាដែលងាយរងគ្រោះ ឲ្យទទួលបានការអប់រំ បណ្ដុះបណ្ដាលវិជ្ជាជីវៈ និងឱកាសសម្រាប់ជីវិតប្រសើរឡើង។ ការប្រារព្ធខួប៣០ឆ្នាំនេះ គឺជាការរំលឹកឡើងវិញនូវកិច្ចខិតខំប្រឹងប្រែង និងសមិទ្ធផលដ៏ត្រចះត្រចង់ដែលអង្គការមួយនេះ បានសម្រេចបានក្នុងរយៈពេលបីទសវត្សរ៍កន្លងមក។

រយៈពេលជាង៣០ឆ្នាំកន្លងមកនេះ មានកុមារ និងយុវជនក្រីក្រនិងងាយរងគ្រោះជាង១៥,០០០នាក់ បាននិងកំពុងទទួលបានការអប់រំចំណេះទូទៅ ការបណ្តុះបណ្តាលវិជ្ជាជីវៈ និងទទួលបានការគាំទ្រផ្សេងៗ។ ក្នុងនោះមានសិស្ស-និស្សិតជាង៨,០០០នាក់ បានបញ្ចប់ការសិក្សាវិជ្ជាជីវៈ និងកំពុងចូលរួមចំណែក នៃកម្លាំងពលកម្មជំនាញលើគ្រប់វិស័យការងារទូទាំងប្រទេសកម្ពុជា និងបានក្លាយជាបុគ្គលគំរូ នៅក្នុងសហគមន៍។ នាពេលបច្ចុប្បន្ននេះ ​PSE នៅតែបន្តបេសកកម្មអប់រំ ការបណ្តុះបណ្តាលវិជ្ជាជីវៈ និងការគាំទ្រផ្សេងៗដល់កុមារ និងយុវជនក្រីក្រ និងងាយរងគ្រោះជិត ៧,០០០នាក់ជារៀងរាល់ឆ្នាំ។

វត្តមានរបស់សម្តេចមហាបវរធិបតី ហ៊ុន ម៉ាណែត ក្នុងពិធីនេះ គឺជាសក្ខីភាពបញ្ជាក់ពីការប្តេជ្ញាចិត្តរបស់រាជរដ្ឋាភិបាលកម្ពុជា ក្នុងការគាំទ្រដល់ការងារមនុស្សធម៌ និងការអប់រំ ដើម្បីធានាថាកុមារ និងយុវជនគ្រប់រូបទទួលបានឱកាសស្មើៗ គ្នាសម្រាប់អនាគតដ៏ល្អប្រសើរ។ ពិធីនេះមិនត្រឹមតែជាការអបអរសាទរខួប៣០ឆ្នាំនៃអង្គការ PSE ប៉ុណ្ណោះទេ ប៉ុន្តែក៏ជាការលើកទឹកចិត្តដល់សិស្ស-និស្សិតជំនាន់ក្រោយ ឲ្យបន្តខិតខំរៀនសូត្រ និងក្លាយជាពលរដ្ឋល្អសម្រាប់ប្រទេសជាតិ៕