(បាត់ដំបង)៖ មានខណៈពេលខ្លះនៅក្នុងប្រវត្តិសាស្ត្រនៃប្រជាជាតិមួយ ដែលសកម្មភាពសាមញ្ញៗរបស់ប្រជាពលរដ្ឋ បានប្រែក្លាយទៅជាសមិទ្ធផលដ៏វិសេសវិសាល និងអស្ចារ្យបំផុត។ ការដាំដើមឈើមួយដើម គឺស្ថិតនៅក្នុងចំណោមសកម្មភាពដ៏មានតម្លៃទាំងនោះ។

ក្នុងខណៈពេលដែលប្រទេសកម្ពុជាកំពុងត្រៀមលក្ខណៈឆ្លើយតបនឹងបញ្ហាប្រឈមនៃបាតុភូត អែលនីញ៉ូ (El Niño) ដែលខិតជិតមកដល់ ព្រមទាំងនាំមកនូវសីតុណ្ហភាពកាន់តែខ្ពស់ អាកាសធាតុស្ងួតហួតហែងអូសបន្លាយពេល គ្រោះខ្វះខាតទឹក និងការកើនឡើងនូវហានិភ័យនៃគ្រោះភ្លើងឆេះព្រៃ ប្រជាពលរដ្ឋកម្ពុជារាប់លាននាក់ បានសម្រេចចិត្តងើបឈរឡើងធ្វើសកម្មភាពដោយស្ងប់ស្ងាត់។

បងប្អូនមិនបានរង់ចាំឱ្យអ្នកដទៃមកដោះស្រាយបញ្ហាជំនួសនោះឡើយ។ ផ្ទុយទៅវិញ បងប្អូនបានចាប់កាន់ចបជីក រួមគ្នាដាំកូនឈើ ស្រោចស្រព និងផ្តល់នូវក្តីសង្ឃឹមសម្រាប់ថ្ងៃអនាគត។

នៅថ្ងៃនេះ ខ្ញុំសូមសម្តែងនូវការដឹងគុណយ៉ាងជ្រាលជ្រៅបំផុតចេញពីបេះដូង ជូនចំពោះប្រជាពលរដ្ឋកម្ពុជាគ្រប់រូប ដែលបានចូលរួមក្នុងចលនាជាតិដ៏មានសារៈសំខាន់មួយនេះ។

ជូនចំពោះក្មួយៗសិស្សានុសិស្ស និងនិស្សិត ចាប់តាំងពីកម្រិតមត្តេយ្យសិក្សារហូតដល់ឧត្តមសិក្សា សូមអរគុណ! ក្មួយៗបានបង្ហាញឱ្យឃើញថា អាយុមិនមែនជាឧបសគ្គក្នុងការបម្រើជាតិមាតុភូមិនោះឡើយ។

រាល់ដើមឈើដែលក្មួយៗបានដាំ មិនមែនត្រឹមតែជាសកម្មភាពសិក្សានៅក្នុងថ្នាក់រៀននោះទេ ប៉ុន្តែវាគឺជាសច្ចភាពរស់រវើកដែលបន្សល់ទុកសម្រាប់មនុស្សជំនាន់ក្រោយ។ សូម្បីតែបន្ទាប់ពីក្មួយៗបានបញ្ចប់ការសិក្សារយៈពេលយូរយ៉ាងណាក៏ដោយ ក៏ដើមឈើទាំងនោះនៅតែបន្តផ្តល់ម្លប់ បង្កើតឧស័្មនអុកស៊ីសែន ការពារប្រភពទឹក ផ្តល់ជម្រកដល់សត្វព្រៃ និងជួយធ្វើឱ្យសហគមន៍ដែលក្មួយៗរស់នៅមានភាពត្រជាក់ត្រជុំ។

ក្មួយៗបានបង្ហាញឱ្យឃើញច្បាស់ថា ការឆ្លើយតបដ៏រឹងមាំបំផុតប្រឆាំងនឹងការប្រែប្រួលអាកាសធាតុ គឺត្រូវចាប់ផ្តើមចេញពីការអប់រំ ស្មារតីទទួលខុសត្រូវ និងសកម្មភាពជាក់ស្តែង។

ជូនចំពោះលោកគ្រូ អ្នកគ្រូ និងថ្នាក់ដឹកនាំសាលារៀនគ្រប់កម្រិត៖សូមអរគុណសម្រាប់ការបំពេញតួនាទីមិនត្រឹមតែក្នុងការផ្តល់ចំណេះដឹងប៉ុណ្ណោះទេ ប៉ុន្តែថែមទាំងបានបណ្តុះនូវស្មារតីជាអ្នកថែរក្សាការពារបរិស្ថានផងដែរ។ តាមរយៈការបង្រៀនឱ្យកុមារស្រឡាញ់ដើមឈើ លោកគ្រូអ្នកគ្រូកំពុងជួយបណ្តុះបណ្តាលប្រជាពលរដ្ឋដែលនឹងស្រឡាញ់ និងគាំពារប្រទេសកម្ពុជានាពេលអនាគត។

ជូនចំពោះមាតាបិតា កសិករ ព្រះសង្ឃ មេដឹកនាំសហគមន៍ មន្ត្រីរាជការ កងកម្លាំងប្រដាប់អាវុធ មន្ត្រីឆ្មាំព្រៃ ដៃគូអភិវឌ្ឍន៍ វិស័យឯកជន អង្គការសង្គមស៊ីវិល យុវជនស្ម័គ្រចិត្ត និងប្រជាពលរដ្ឋកម្ពុជាគ្រប់បណ្តាខេត្ត គ្រប់ភូមិឋាន និងគ្រប់មជ្ឈដ្ឋាន៖ សូមអរគុណ។ ដៃទាំងគូរបស់បងប្អូន មិនមែនដាំត្រឹមតែដើមឈើនោះឡើយ ប៉ុន្តែបងប្អូនកំពុងតែដាំ «ក្តីសង្ឃឹម»។

ដើមឈើគ្រប់ដើម គឺជារបាំងការពារធម្មជាតិប្រឆាំងនឹងឥទ្ធិពលនៃបាតុភូត អែលនីញ៉ូ។ ដើមឈើជួយធ្វើឱ្យខ្យល់អាកាសត្រជាក់ រក្សាប្រភពទឹក គាំពារដីមានជីជាតិ កាត់បន្ថយហានិភ័យនៃគ្រោះរាំងស្ងួត ពង្រឹងជីវៈចម្រុះ ចាប់យកឧស័្មនកាបូនឌីអុកស៊ីត និងធ្វើឱ្យសហគមន៍របស់យើងមានសុខភាពល្អ និងមានភាពធន់មាំជាងមុន។ ទោះបីជាយើងមិនអាចទប់ស្កាត់បាតុភូត អែលនីញ៉ូ មិនឱ្យកើតឡើងបានក៏ដោយ ប៉ុន្តែយើងអាចកាត់បន្ថយផលប៉ះពាល់របស់វាបាន តាមរយៈការស្តារ និងការគាំពារធម្មជាតិឡើងវិញ។

ការរួមចំណែករបស់បងប្អូន គឺជាភស្តុតាងសបញ្ជាក់ឱ្យឃើញថា សកម្មភាពឆ្លើយតបនឹងអាកាសធាតុ មិនមែនតែងតែចាប់ផ្តើមចេញពីក្នុងសាលសន្និសីទ ឬបន្ទប់ពិសោធន៍នោះឡើយ។ វាចាប់ផ្តើមចេញពីសាលារៀន ភូមិករ វត្តអារាម ចំការ ទីកន្លែងធ្វើការ និងតាមខ្នងផ្ទះរបស់ក្រុមគ្រួសារនីមួយៗ។

វាចាប់ផ្តើមនៅពេលដែលប្រជាពលរដ្ឋសាមញ្ញបានសម្រេចចិត្តរួមគ្នាថា ការការពារធម្មជាតិគឺជាកាតព្វកិច្ចរបស់ពួកយើងគ្រប់រូប។ ជោគជ័យដ៏ធំធេងបំផុត ប្រហែលជាមិនមែនស្ថិតនៅលើចំនួនដើមឈើដែលបានដាំនោះទេ ប៉ុន្តែគឺស្ថិតនៅលើស្មារតីដែលនៅពីក្រោយចលនានេះ។

ដើមឈើដែលដាំដោយបុគ្គលម្នាក់ នឹងផ្តល់ផលប្រយោជន៍ដល់មនុស្សរាប់មិនអស់ដទៃទៀត។ វាផ្តល់ម្លប់ដល់អ្នកដំណើរដែលមិនធ្លាប់ស្គាល់គ្នា ផ្តល់ជម្រកដល់សត្វព្រៃ ផ្តល់ខ្យល់អាកាសបរិសុទ្ធដល់សហគមន៍ និងផ្តល់ក្តីសង្ឃឹមដល់មនុស្សជំនាន់ក្រោយៗទៀតដែលមិនទាន់ចាប់កំណើត។ នេះហើយគឺជាអត្ថន័យពិតប្រាកដនៃការបម្រើផលប្រយោជន៍សាធារណៈ។

បញ្ហាប្រឈមនៃការប្រែប្រួលអាកាសធាតុនឹងនៅតែបន្តកើតមាន ហើយបាតុភូត អែលនីញ៉ូ នឹងមកសាកល្បងភាពធន់មាំរបស់យើង។ ប៉ុន្តែ ដោយសារតែប្រជាពលរដ្ឋកម្ពុជារាប់លាននាក់បានសម្រេចចិត្តរួមគ្នាធ្វើសកម្មភាពរួចជាស្រេចទៅហើយនោះ យើងនឹងដើរទៅរកអនាគតដោយភាពជឿជាក់ និងរឹងមាំបំផុត។

រាល់កូនឈើដែលកំពុងលូតលាស់នៅទូទាំងប្រទេស គឺជានិមិត្តរូបនៃកងកម្លាំងប្តេជ្ញាចិត្តរបស់យើង មិនត្រឹមតែក្នុងការបត់បែនរស់ទៅតាមការប្រែប្រួលអាកាសធាតុប៉ុណ្ណោះទេ ប៉ុន្តែថែមទាំងដើម្បីបន្សល់ទុកនូវទឹកដីកម្ពុជាមួយ ដែលមានភាពបៃតងជាងមុនសម្រាប់ថ្ងៃស្អែក។

ចូរយើងបន្តរួមគ្នាថែរក្សាដើមឈើដែលយើងបានដាំ ព្រោះការដាំគ្រាន់តែជាជំហានដំបូងប៉ុណ្ណោះ។ ដើមឈើមួយដើមអាចផ្តល់តម្លៃពេញលេញទៅបាន លុះត្រាតែវាត្រូវបានការពារ ទទួលបានការស្រោចស្រព និងអនុញ្ញាតឱ្យលូតលាស់ក្លាយជាអ្នកការពារដ៏រឹងមាំនៃទឹកដីរបស់យើង។

ប្រវត្តិសាស្ត្រនៃប្រទេសកម្ពុជា តែងតែត្រូវបានចារឹកទុកដោយប្រជាពលរដ្ឋដែលមានទឹកចិត្តស្រឡាញ់ជាតិមាតុភូមិយ៉ាងជ្រាលជ្រៅបំផុត។ នៅថ្ងៃនេះ ទំព័រប្រវត្តិសាស្ត្រថ្មីមួយទៀតកំពុងត្រូវបានចារឹកឡើង មិនមែនចារឹកដោយទឹកប៊ិចនោះទេ ប៉ុន្តែចារឹកដោយឫសឈើដែលកំពុងចាក់ជ្រៅទៅក្នុងដី និងមែកធាងដែលកំពុងលូតលាស់ឈោងចាប់មេឃខៀវ។ ជូនចំពោះប្រជាពលរដ្ឋកម្ពុជាគ្រប់រូបដែលបានដាំដើមឈើ សូមអរគុណ!

បងប្អូនមិនមែនគ្រាន់តែដាំដុះព្រៃឈើនោះឡើយ។ ប៉ុន្តែបងប្អូនកំពុងដាំដុះ «ភាពធន់មាំ»។ បងប្អូនកំពុងដាំដុះ «ក្តីសង្ឃឹម»។ ហើយបងប្អូនកំពុងរួមគ្នាកសាងប្រទេសកម្ពុជា ឱ្យកាន់តែស្អាត កាន់តែបៃតង កាន់តែត្រជាក់ និងមាននិរន្តរភាពសម្រាប់មនុស្សជំនាន់ក្រោយតទៅ៕