(កំពង់ស្ពឺ)៖ ក្នុងស្មារតីមនុស្សធម៌ និងការយកចិត្តទុកដាក់ខ្ពស់ចំពោះសុខុមាលភាពកងទ័ព លោកឧត្តមសេនីយ៍ត្រី ម៉េង ស្រ៊ុន មេបញ្ជាការកងរាជអាវុធហត្ថខេត្តកំពង់ស្ពឺ បានបន្តដឹកនាំក្រុមការងារចុះសួរសុខទុក្ខ និងនាំយកអំណោយទៅឧបត្ថម្ភដល់វីរៈកងទ័ព លោកអនុសេនីយ៍ត្រី ផាន់ ផល្លា ជំនួយការការិយាល័យឃោសនាព័ត៌មាន ដែលកំពុងសម្រាកព្យាបាលជំងឺពុកក្បាលឆ្អឹងភ្លៅទាំងសងខាង នៅគេហដ្ឋានរបស់លោក ក្នុងភូមិផ្សារចាស់ សង្កាត់ស្វាយក្រវ៉ាន់ ក្រុងច្បារមន ខេត្តកំពង់ស្ពឺ។ ពិធីនេះបានប្រព្រឹត្តទៅកាលពីវេលាម៉ោង ១០:៣០ នាទីព្រឹក នាថ្ងៃទី១ ខែកក្កដា ឆ្នាំ២០២៦។

ការចុះសួរសុខទុក្ខនេះ ធ្វើឡើងដោយអនុវត្តតាមគោលការណ៍ដឹកនាំដ៏ប៉ិនប្រសប់ ឈ្លាសវៃ ប្រកបដោយគុណធម៌របស់នាយឧត្តមសេនីយ៍ សៅ សុខា អគ្គមេបញ្ជាការរងកងយោធពលខេមរភូមិន្ទ និងជាមេបញ្ជាការកង រាជអាវុធហត្ថលើផ្ទៃប្រទេស រួមជាមួយការណែនាំផ្ទាល់ជាប្រចាំពីសំណាក់លោកបណ្ឌិត ជាម ច័ន្ទសោភ័ណ អភិបាល នៃគណៈអភិបាលខេត្តកំពង់ស្ពឺ។ វត្តមានរបស់លោកឧត្តមសេនីយ៍ត្រី ម៉េង ស្រ៊ុន ក្នុងនាមជាមេបញ្ជាការកងរាជអាវុធហត្ថខេត្តកំពង់ស្ពឺ បានបង្ហាញពីការយកចិត្តទុកដាក់យ៉ាងជ្រាលជ្រៅរបស់ថ្នាក់ដឹកនាំចំពោះកងកម្លាំងដែលបានបូជាកម្លាំងកាយចិត្តដើម្បីជាតិមាតុភូមិ។

ក្នុងឱកាសដ៏មានអត្ថន័យនេះ ក្រុមការងារកងរាជអាវុធហត្ថខេត្តកំពង់ស្ពឺ ក៏មានការចូលរួមពីក្រុមការងារសហភាពសហព័ន្ធយុវជនកម្ពុជាខេត្តកំពង់ស្ពឺ និងអ្នកស្ម័គ្រចិត្តកាកបាទក្រហមកម្ពុជាខេត្តកំពង់ស្ពឺផងដែរ។ លោកអនុសេនីយ៍ត្រី ផាន់ ផល្លា គឺជាវីរៈកងទ័ពម្នាក់ដែលបានឈរជើងការពារបូរណភាពទឹកដីនៅទិសទី៣ ប្រាសាទតាមាន់ តាក្របី នាខេត្តឧត្តរមានជ័យ ដែលជាតំបន់ព្រំដែនដ៏សំខាន់។ ការលះបង់របស់លោកក្នុងការបំពេញបេសកកម្មដ៏ឧត្តុង្គឧត្តមនេះ ត្រូវបានថ្នាក់ដឹកនាំ និងប្រជាពលរដ្ឋគ្រប់រូបចងចាំ និងដឹងគុណជានិច្ច។

ក្នុងជំនួបសំណេះសំណាល លោកឧត្តមសេនីយ៍ត្រី ម៉េង ស្រ៊ុន បានពាំនាំនូវការផ្តាំផ្ញើសួរសុខទុក្ខដោយក្តីនឹករលឹកពីសំណាក់នាយឧត្តមសេនីយ៍ សៅ សុខា ចំពោះលោកអនុសេនីយ៍ត្រី ផាន់ ផល្លា ព្រមទាំងបានជូនពរ ឲ្យលោកឆាប់ជាសះស្បើយពីជំងឺ ដើម្បីអាចត្រឡប់មកបំពេញភារកិច្ចបម្រើជាតិវិញនាពេលឆាប់ៗ។ ទឹកចិត្តសាមគ្គីភាព និងការយកចិត្តទុកដាក់នេះ គឺជាកម្លាំងចិត្តដ៏ធំធេងសម្រាប់វីរៈកងទ័ពដែលកំពុងប្រឈមនឹងការលំបាក។

ឆ្លៀតក្នុងឱកាសនោះដែរ លោកឧត្តមសេនីយ៍ត្រី ម៉េង ស្រ៊ុន ក៏បានសម្តែងនូវការគោរពដឹងគុណយ៉ាងជ្រាលជ្រៅចំពោះវីរៈកងទ័ពនៅសមរភូមិមុខទាំងអស់ ដែលបាននិងកំពុងបំពេញបេសកកម្មដ៏ឧត្តុង្គឧត្តម ដើម្បីការពារដែនអធិបតេយ្យភាព និងបូរណភាពទឹកដីពីសត្រូវឈ្លានពាន។ ការលះបង់របស់ពួកគាត់ គឺដើម្បីការពារជាតិមាតុភូមិ និងបុព្វហេតុថែរក្សាសុខសន្តិភាពជូនប្រជាជនកម្ពុជាទាំងមូល។ នេះជាការបង្ហាញពីស្មារតីស្នេហាជាតិ និងការទទួលខុសត្រូវខ្ពស់របស់កងយោធពលខេមរភូមិន្ទ។

ក្នុងនាមជាទឹកចិត្តមនុស្សធម៌ខ្មែរស្រឡាញ់ខ្មែរ លោកឧត្តមសេនីយ៍ត្រី ម៉េង ស្រ៊ុន បានបរិច្ចាគថវិកាផ្ទាល់ខ្លួនចំនួន ៤០០,០០០ រៀល (សែសិបម៉ឺនរៀល) និងគ្រឿងឧបភោគបរិភោគមួយចំនួនរួមមាន៖ អង្ករ ១ បាវ (៥០ គីឡូក្រាម) មី ១ កេស ទឹកសុទ្ធ ២ កេស ភេសជ្ជៈ ១ កេស ទឹកត្រី ១ យួរ ទឹកស៊ីអ៊ីវ ១ យួរ និងត្រីខ ១ យួរ។ អំណោយសរុបជាថវិកាមានតម្លៃប្រមាណ ៧០៤,០០០ រៀល។ ការឧបត្ថម្ភនេះ គឺជាការរួមចំណែកដ៏សំខាន់ក្នុងការជួយសម្រាលបន្ទុកជីវភាព និងការចំណាយលើការព្យាបាលជំងឺរបស់លោកអនុសេនីយ៍ត្រី ផាន់ ផល្លា។

សរុបមក ការចុះសួរសុខទុក្ខ និងឧបត្ថម្ភដល់វីរៈកងទ័ពដែលកំពុងមានជំងឺនេះ មិនត្រឹមតែជាកាយវិការមនុស្សធម៌ប៉ុណ្ណោះទេ ប៉ុន្តែក៏ជាការបង្ហាញពីការយកចិត្តទុកដាក់ដ៏ខ្ពង់ខ្ពស់របស់ថ្នាក់ដឹកនាំកងយោធពលខេមរភូមិន្ទ និងអាជ្ញាធរខេត្ត ចំពោះកងកម្លាំងប្រដាប់អាវុធដែលបានលះបង់ដើម្បីជាតិ។ នេះក៏ជាសារមួយដើម្បីលើកទឹកចិត្តដល់កងទ័ពទាំងអស់ឲ្យបន្តបំពេញភារកិច្ចដោយស្មារតីទទួលខុសត្រូវខ្ពស់ និងជឿជាក់លើការគាំទ្រពីថ្នាក់ដឹកនាំ និងប្រជាពលរដ្ឋ៕