(ភ្នំពេញ)៖ លោក សាយ គឹមឡម អភិបាលស្រុកស្ទោង ខេត្តកំពង់ធំ បានជំរុញ និងលើកទឹកចិត្តយ៉ាងខ្លាំងដល់អ្នកផ្គត់ផ្គង់អាហារពេលព្រឹកតាមបណ្ដាសាលារៀនបឋមសិក្សាក្នុងស្រុក ឱ្យងាកមកប្រើប្រាស់ផលិតផលកសិកម្ម និងគ្រឿងឧបភោគបរិភោគដែលដាំដុះ និងផលិតនៅក្នុងសហគមន៍ និងមូលដ្ឋានផ្ទាល់។ ការជំរុញនេះ គឺក្នុងគោលបំណងធានាបាននូវគុណភាព សុវត្ថិភាពចំណីអាហារ និងលើកកម្ពស់សុខភាពរបស់សិស្សានុសិស្ស ក៏ដូចជាចូលរួមចំណែកអភិវឌ្ឍសេដ្ឋកិច្ចមូលដ្ឋានផងដែរ។

ការលើកឡើងនេះ ធ្វើឡើងក្នុងឱកាសដែលលោកអភិបាលស្រុក បានអញ្ជើញចុះជួបសំណេះសំណាល និងទស្សនកិច្ចដោយផ្ទាល់ទៅលើការទទួលទានអាហារពេលព្រឹករបស់សិស្សានុសិស្សនៃសាលាបឋមសិក្សាធ្លក ដែលមានទីតាំងស្ថិតនៅក្នុងឃុំចំណាលើ ស្រុកស្ទោង ខេត្តកំពង់ធំ កាលពីព្រឹកថ្ងៃទី១ ខែកក្កដា ឆ្នាំ២០២៦។ ដំណើរទស្សនកិច្ចនេះ គឺដើម្បីពិនិត្យមើលពីស្ថានភាពជាក់ស្ដែងនៃការរៀបចំ និងការផ្គត់ផ្គង់អាហារពេលព្រឹកដល់កុមារតូចៗ ដែលជាទំពាំងស្នងឫស្សីរបស់ជាតិ។

លោក សាយ គឹមឡម បានគូសបញ្ជាក់ថា បច្ចុប្បន្ននេះ នៅក្នុងសហគមន៍តាមបណ្ដាភូមិ ឃុំ នានា ក្នុងស្រុកស្ទោង មានផលិតផលកសិកម្មជាច្រើនប្រភេទដូចជា បន្លែ ត្រី សាច់ និងស៊ុត ដែលជាផលិតផលមានគុណភាពខ្ពស់ សុវត្ថិភាព និងគ្មានការប្រើប្រាស់សារធាតុគីមី ដែលអាចប៉ះពាល់ដល់សុខភាព។ ហេតុដូច្នេះ លោកបានជំរុញឱ្យអ្នកផ្គត់ផ្គង់អាហារទាំងអស់ ត្រូវតែទៅសហការជាមួយប្រជាកសិករ និងអ្នកផលិតក្នុងមូលដ្ឋាន ដើម្បីទទួលទិញនូវផលិតផលស្រស់ៗទាំងនោះ មកផ្គត់ផ្គង់ និងចម្អិនជាអាហារពេលព្រឹកសម្រាប់សិស្សានុសិស្សជាប្រចាំ។ ទង្វើនេះ មិនត្រឹមតែជាផ្នែកមួយនៃការលើកកម្ពស់សុខភាពសិស្សប៉ុណ្ណោះទេ ប៉ុន្តែថែមទាំងជាការរួមចំណែកដ៏សំខាន់ក្នុងការលើកកម្ពស់សុខភាពសាធារណៈទាំងមូល និងជួយគាំទ្រដល់ជីវភាពរបស់ប្រជាពលរដ្ឋក្នុងសហគមន៍ផងដែរ។

ជាមួយគ្នានេះ លោកអភិបាលស្រុក ក៏បានផ្ដាំផ្ញើ និងលើកទឹកចិត្តយ៉ាងទទូចដល់ចុងភៅ លោកគ្រូ អ្នកគ្រូ និងសិស្សានុសិស្សទាំងអស់ ឱ្យសហការគ្នា និងអនុវត្តបានខ្ជាប់ខ្ជួននូវគោលការណ៍ «អនាម័យ ៣ល្អ»។ គោលការណ៍ទាំងនេះ រួមមាន៖ ការធ្វើអនាម័យសម្ភារផ្ទះបាយឱ្យបានស្អាត និងមានសុវត្ថិភាពជានិច្ច ការចម្អិនម្ហូបអាហាររៀងរាល់ពេលដោយយកចិត្តទុកដាក់ខ្ពស់ និងការរក្សាអនាម័យគ្រប់ស្ថានភាពទាំងអស់នៅក្នុងរោងបាយ។ ការអនុវត្តអនាម័យឱ្យបានល្អប្រសើរ គឺជាកត្តាចាំបាច់បំផុតដើម្បីការពារសិស្សានុសិស្សពីជំងឺផ្សេងៗដែលបណ្ដាលមកពីចំណីអាហារមិនស្អាត។

គួរបញ្ជាក់ថា ក្នុងឱកាសនោះ លោក សាយ គឹមឡម ក៏បានសន្យាផ្ដល់ជូនតុបាយវែងថ្មីចំនួន ៦ សម្រាប់សិស្សានុសិស្សទទួលទានអាហារពេលព្រឹក ដែលនឹងត្រូវប្រគល់ជូនក្នុងពេលឆាប់ៗនេះ ដើម្បីបង្កលក្ខណៈងាយស្រួល និងផាសុកភាពបន្ថែមទៀតដល់ការទទួលទានអាហាររបស់កុមារ។ បច្ចុប្បន្ន សាលាបឋមសិក្សាធ្លក មានសិស្សសរុបចំនួន ១៧៥ នាក់ ក្នុងនោះមានសិស្សស្រី ៨៥ នាក់ ព្រមទាំងមានលោកគ្រូ អ្នកគ្រូសរុប ៧នាក់ ក្នុងនោះមានគ្រូស្រី ៤ នាក់ និងមានថ្នាក់រៀនសរុបចំនួន ៧ថ្នាក់។

សរុបមក ការយកចិត្តទុកដាក់របស់លោកអភិបាលស្រុកស្ទោង ក្នុងការជំរុញឱ្យមានការប្រើប្រាស់ផលិតផលក្នុងស្រុក និងការអនុវត្តអនាម័យខ្ពស់ គឺជាកាយវិការដ៏សំខាន់មួយដែលឆ្លុះបញ្ចាំងពីការប្ដេជ្ញាចិត្តរបស់អាជ្ញាធរមូលដ្ឋាន ក្នុងការលើកកម្ពស់គុណភាពជីវិត និងសុខភាពរបស់កុមារកម្ពុជា ដែលជាធនធានមនុស្សដ៏មានតម្លៃសម្រាប់អនាគតប្រទេសជាតិ។ ការគាំទ្រផលិតផលក្នុងសហគមន៍ ក៏ជាយុទ្ធសាស្ត្រដ៏ល្អមួយក្នុងការជំរុញកំណើនសេដ្ឋកិច្ចមូលដ្ឋាន និងបង្កើតការងារជូនប្រជាពលរដ្ឋផងដែរ៕