(ភ្នំពេញ)៖ លោក ហ្សង់ ហ្វ្រង់ស័រ តាន់ រដ្ឋមន្ដ្រីប្រតិភូអមនាយករដ្ឋមន្ដ្រី ទទួលបន្ទុកកិច្ចការបរទេស និងសហប្រតិបត្តិការអន្ដរជាតិ បានប្រាប់ឲ្យប្រជាពលរដ្ឋបន្ដជឿជាក់លើ «យុទ្ធសាស្ដ្រស្ងាត់ តែមិនស្ងៀមរាប់រាជរដ្ឋាភិបាលកម្ពុជា» ក្នុងការដោះស្រាយបញ្ហាជម្លោះព្រំដែនជាមួយប្រទេសថៃ ហើយរាជរដ្ឋាភិបាលកម្ពុជា មានទាំងផែនការយុទ្ធសាស្ដ្រ និងផែនការសកម្មភាពច្បាស់លាស់ នៅក្រោយវាំងននកំពុងបន្ដដំណើរការ។

ក្នុងវេទិកាសារព័ត៌មានលើកទី៨ នៅថ្ងៃទី២ ខែកក្កដា ឆ្នាំ២០២៦នេះ លោក ហ្សង់ ហ្វ្រង់ស័រ តាន់ បានអះអាងថា បើទោះបីរឿងក្រោយវាំងនន មិនត្រូវបានលាតត្រដាងជាសាធារណៈយ៉ាងណាក្ដី ប៉ុន្ដែលទ្ធផលជាក់ស្ដែងមួយដែលបានកើតចេញឡើង តាមរយៈយុទ្ធសាស្ដ្រស្ងាត់ តែមិនស្ញៀម គឺរាជរដ្ឋាភិបាលកម្ពុជា ក្រោមការដឹកនាំរបស់សម្ដេចមហាបវរធិបតី ហ៊ុន ម៉ាណែត បានសម្រេចប្រើប្រាស់យន្ដការនៃការផ្សះផ្សាដោយបង្ខំ ក្រោមអនុសញ្ញាអន្ដរជាតិស្ដីពីនីតិសមុទ្រ។

រដ្ឋមន្ដ្រីប្រតិភូអម ហ្សង់ ហ្វ្រង់ស័រ តាន់ បានថ្លែងយ៉ាងដូច្នេះថា «មានច្រើនទៀតនៅក្រោយឆាត ទាំងយុទ្ធសាស្ដ្រ និងផែនការសកម្មភាព ប៉ុន្ដែខ្ញុំមិនអាចយកសកម្មភាពនៅក្រោយវាំងនន មកលាតត្រដាងជាសាធារណៈបានទេ ខ្ញុំគ្រាន់តែអាចនិយាយបញ្ចុះបញ្ចូលជនជាតិរួមជាតិទាំងអស់ ទាំងក្រៅ និងក្នុងប្រទេស ត្រូវជឿជាក់លើយុទ្ធសាស្ដ្រ ស្ងាត់តែមិនស្ងៀមរបស់រាជរដ្ឋាភិបាលកម្ពុជា នៅតែបន្ដ។ ចុងក្រោយនេះ កម្ពុជា សម្រេចប្រើប្រាស់យន្ដការនៃការផ្សះផ្សាដោយបង្ខំ ក្រោមអនុសញ្ញាអន្ដរជាតិស្ដីពីនីតិសមុទ្រ គឺជាលទ្ធផលជាក់ស្ដែងមួយ នៃកិច្ចការងារនៅក្រោយវាំងនន»។

លោក ហ្សង់ ហ្វ្រង់ស័រ តាន់ បានពន្យល់ទៅកាន់ប្រជាពលរដ្ឋថា ជម្លោះកម្ពុជា-ថៃ មានលក្ខណៈជារចនាសម្ព័ន្ធយូរអង្វែង រ៉ាំរ៉ៃ តជំនាន់ ជាជម្លោះរយៈកាលវែង ដែលត្រូវការដំណោះស្រាយរយៈពេលវែង ខុសផ្ទុយពីជម្លោះបែបកាលៈទេសៈ ដែលអាចដោះស្រាយចេញក្រោយជួបជជែកគ្នាត្រឹមពីរបីដង គឺដោះស្រាយចេញជាស្ថាពរ។

បើតាមលោក ហ្សង់ ហ្វ្រង់ស័រ តាន់, អ្វីដែលរាជរដ្ឋាភិបាល និងប្រជាជនខ្មែរទាំងមូលកំពុងប្រឈមមុខក្នុងពេលនេះ គឺជាជម្លោះបែបរចនាសម្ព័ន្ធ ដូចនេះការតស៊ូស្វិតស្វាញមិនមែនប្រព្រឹត្តទៅត្រឹមសមរភូមិយោធាប៉ុណ្ណោះទេ។ ដំណាលគ្នា សមរភូមិការទូត សមរភូមិច្បាប់ សមរភូមិព័ត៌មាន សមរភូមិសាធារណៈមតិ ជារួមសមរភូមិនិទានកឋា ដូច្នេះក្នុងពេលមួយ ដែលគេចង់ឲ្យយើងបាក់ទឹកចិត្ត ហែកហួរបែកបាក់គ្នា យើងត្រូវរក្សាភាពស្ងប់ស្ងាត់ អត់ធ្មត់ ឯកភាពជាតិ៕