(ភ្នំពេញ)៖ មូលនិធិ ម៉េងលី ជេ. គួច នាព្រឹកថ្ងៃទី៣០ ខែមិថុនា ឆ្នាំ២០២៦ បានសហការជាមួយមជ្ឈមណ្ឌលផ្ដល់ឈាមខេត្តតាកែវ មជ្ឈមណ្ឌលភាសា អេ អាយ អាយ និងសាលារៀន អន្តរទ្វីប អាមេរិកាំង សាខាតាកែវ ប្រារព្ធធ្វើកម្មវិធីធនាគារឈាម ម៉េងលី ជេ. គួច លើកទី១៧របស់ខ្លួនក្រោមប្រធានបទ «ផ្តល់ឈាមគឺផ្តល់ក្តីសង្ឈឹមនិងសង្រ្គោះជីវិត» ដោយមានការចូលរួមបរិច្ចាគឈាមដោយស្មោះចិត្តពីសំណាក់លោកគ្រូ អ្នកគ្រូ មាតាបិតា អ្នកអាណាព្យាបាល សិស្សានុសិស្ស បុគ្គលិកតាមផ្នែក និងសាធារណជនជាច្រើនរូប។

នៅរៀងរាល់ពីរទៅបីវិនាទីម្តង មានអ្នកជំងឺម្នាក់កំពុងត្រូវការឈាមបន្ទាន់ក្នុងនោះអាចជាស្ត្រី ដែលកំពុងសម្រាលកូន អ្នកជំងឺមហារីក ឬអ្នកជំងឺកំពុងទទួលការវះកាត់ដោយសារគ្រោះថ្នាក់ផ្សេងៗ។ ឆ្លើយតបទៅនឹងតម្រូវការផ្នែកសុខភាពនេះដែរ យុទ្ធនាការនេះមិនត្រឹមតែជាការបរិច្ចាគឈាមប៉ុណ្ណោះទេ ប៉ុន្តែវាជាព្រឹត្តិការណ៍សប្បុរសធម៌ដែលនាំមកនូវក្តីសង្ឃឹម កម្លាំងចិត្ត និងការសង្រ្គោះជីវិតរបស់អ្នកជំងឺ។

សូមបញ្ជាក់ថា គម្រោងធនាគារឈាម ម៉េងលី ជេ. គួច ជាគម្រោងមួយក្នុងចំណោមគម្រោងទាំង៦នៃកម្មវិធីសុខភាពរបស់មូលនិធិ ម៉េងលី ជេ. គួច ហើយគិតត្រឹមរយៈពេល ៦ ខែដើមឆ្នាំ២០២៦ នេះ មូលនិធិបានដើរតួនាទីយ៉ាងសកម្មក្នុងការសម្រួលឈាមជួយសង្គ្រោះអ្នកជំងឺ ៤៨ នាក់ សរុបជាឈាមមានចំនួន១១១សាក់។ ជាមួយគ្នានេះផងដែរ មូលនិធិ ម៉េងលី ជេ. គួច សូមសំណូមពរ និងលើកទឹកចិត្តដល់សាធារណជន សប្បុរសជន មេត្តាបន្តចូលរួមសកម្មភាពសប្បុរសធម៌តាមរយៈរូបភាពផ្សេងៗគ្នាឱ្យបានច្រើន ដើម្បីជួយសង្គ្រោះជីវិតអ្នកជំងឺ និងសហគមន៍យើងទាំងអស់គ្នា៕