ជម្លោះព្រំដែន និងស្កេមអនឡាញ ធ្វើឱ្យកម្ពុជាក្លាយជាគោលដៅវិនិយោគក្នុងភាពស្រពិចស្រពិលសម្រាប់អ្នកវិនិយោគជប៉ុន ខណៈកម្ពុជាប្រឹងប្រែងទាញទំនុកចិត្ត (Video inside)
02-07-2026 19:25
(ភ្នំពេញ)៖ ជម្លោះដែលបង្កឡើងដោយទង្វើឈ្លានពានរបស់កងទ័ពថៃ និងបញ្ហាស្កេមអនឡាញនៅកម្ពុជា បានធ្វើឱ្យកម្ពុជាក្លាយទៅជាគោលដៅវិនិយោគក្នុងភាពស្រពិចស្រពិលសម្រាប់អ្នកវិនិយោគជប៉ុន ប៉ុន្តែកម្ពុជា បានប្រឹងប្រែងដាក់ចេញនូវវិធានការជាច្រើនដើម្បីឆ្លើយតបចំពោះបញ្ហានេះ។
ក្នុងពិធីសម្ពោធដាក់ឱ្យដំណើរការការផ្គុំ និងដំឡើងរថយន្តស៊េរីថ្មី Hilux Travo របស់ក្រុមហ៊ុនតូយ៉ូតានៅកម្ពុជានាព្រឹកថ្ងៃទី២ ខែកក្កដា ឆ្នាំ២០២៦នេះ លោក អ៊ូអិណុ អាត់ស៊ូស៊ី ឯកអគ្គរាជទូតជប៉ុនប្រចាំនៅកម្ពុជា បានលើកឡើងថា ជម្លោះព្រំដែនជាមួយប្រទេសថៃ និងបញ្ហាបទល្មើសឆបោកតាមអនឡាញ បានធ្វើឱ្យអ្នកវិនិយោគជប៉ុន មើលមកប្រទេសកម្ពុជាក្នុងនាមជាគោលដៅវិនិយោគមួយមានភាពស្រពិចស្រពិល។
ឆ្លើយតបទៅនឹងអ្វីដែលក្តីបារម្ភរបស់អ្នកវិនិយោគនេះ លោកឧបនាយករដ្ឋមន្ត្រី ស៊ុន ចាន់ថុល អនុប្រធានទី១ ក្រុមប្រឹក្សាអភិវឌ្ឍន៍កម្ពុជា បានបញ្ជាក់ថា រាជរដ្ឋាភិបាលកម្ពុជា បានដឹងពីបញ្ហានេះ ហើយក៏បានដាក់ចេញវិធានការនានាក្នុងការដោះស្រាយ និងបង្កើនជំនឿចិត្តសម្រាប់អ្នកវិនិយោគ។ ក្នុងនោះក្នុងពេលថ្មីៗកន្លងទៅនេះ លោកឧបនាយករដ្ឋមន្ត្រី បានធ្វើដំណើរទៅកាន់ប្រទេសជប៉ុន កូរ៉េខាងត្បូង និងប្រទេសចិន ហើយបានបើកវេទិកា និងជំនួបជាមួយអ្នកវិនិយោគជាច្រើន ដើម្បីពន្យល់ពីស្ថានភាពវិនិយោគនៅកម្ពុជា។
ពាក់ព័ន្ធនឹងបញ្ហាស្កេមអនឡាញ លោកឧបនាយករដ្ឋមន្ត្រី ស៊ុន ចាន់ថុល បានបញ្ជាក់ថា តាមការបង្ក្រាប និងចាប់បញ្ជូនជនឆបោកអនឡាញទៅកាន់ប្រទេសដើមជាបន្តបន្ទាប់ ព្រមទាំងការបង្កើតច្បាប់ស្តីពី «ការប្រឆាំងការឆបោកតាមប្រព័ន្ធបច្ចេកវិទ្យា» ជាសក្ខីភាពបង្ហាញអំពីចំណាត់ការយ៉ាងមោះមុតបំផុត របស់ប្រមុខរាជរដ្ឋាភិបាលកម្ពុជា ដើម្បីធានាលុបបំបាត់សកម្មភាពឆបោកតាមប្រព័ន្ធបច្ចេកវិទ្យា សំដៅបង្កើតឱ្យបាននូវបរិយាកាសវិនិយោគ និងទេសចរណ៍ប្រកបដោយសុវត្ថិភាព សន្តិសុខ និងភាពជឿជាក់ពេញលេញ។
«សូមវិនិយោគិនទាំងអស់មេត្តាបន្តផ្តល់ទំនុកចិត្ត និងជួយផ្សព្វផ្សាយអំពីការប្ដេជ្ញាចិត្ត និងចំណាត់ការរបស់រាជរដ្ឋាភិបាល ពាក់ព័ន្ធនឹងករណីនេះ ដើម្បីបង្ហាញទៅកាន់ពិភពលោកថា កម្ពុជាមានសុវត្ថិភាព ១០០ភាគរយ ទាំងសម្រាប់វិនិយោគ និងទេសចរណ៍»។ នេះជាការបញ្ជាក់បន្ថែមរបស់លោកឧបនាយករដ្ឋមន្ត្រី ស៊ុន ចាន់ថុល។
លោកឧបនាយករដ្ឋមន្ត្រីដែលជាសេនាធិការរបស់រាជរដ្ឋាភិបាលលើការងារវិនិយោគ បានគូសរំលេចក្នុងឱកាសនោះដែរថា ទោះបីជាត្រូវទទួលរងនូវឥទ្ធិពលនៃភាពមិនប្រាកដប្រជានៅលើពិភពលោកជាបន្តបន្ទាប់ក្នុងរយៈពេលប៉ុន្មានឆ្នាំចុងក្រោយនេះយ៉ាងណាក្ដី ក៏បរិយាកាសវិនិយោគរបស់កម្ពុជានៅតែរក្សាបាននូវសញ្ញាណវិជ្ជមាន និងភាពធន់ខ្ពស់។
ជាក់ស្ដែងក្រុមប្រឹក្សាអភិវឌ្ឍន៍កម្ពុជា (ក.អ.ក.) បានបង្កើតកំណត់ត្រាថ្មីៗជាបន្តបន្ទាប់ ដោយបានអនុម័តគម្រោងវិនិយោគចំនួន ៤១៤គម្រោង នៅក្នុងឆ្នាំ២០២៤ និង បានអនុម័តគម្រោងវិនិយោគសរុបរហូតដល់ ៦៣០គម្រោង ក្នុងឆ្នាំ២០២៥ ក្នុងទំហំទុនវិនិយោគជិត ១០ប៊ីលានដុល្លារអាម៉េរិក។ ទន្ទឹមនេះ ក្នុងរយៈពេល ៥ខែដំបូង នៃឆ្នាំ២០២៦នេះ កម្ពុជានៅតែរក្សាបាននូវស្ថិរភាពរំហូរវិនិយោគ ដោយបានអនុម័តគម្រោងវិនិយោគចំនួន ២២៦គម្រោង ក្នុងទំហំទុនប្រមាណ ៣,៣ប៊ីលានដុល្លារអាម៉េរិក។
ដោយឡែកសម្រាប់ការវិនិយោគ និងពាណិជ្ជកម្មរវាងកម្ពុជា និងជប៉ុនវិញ នៅតែបន្តមានភាពល្អប្រសើរ។ ជាក់ស្តែងទំហំពាណិជ្ជកម្មទ្វេភាគីរវាងកម្ពុជា-ជប៉ុន បានកើនឡើងដល់ប្រមាណ ២,៥ប៊ីលានដុល្លារអាម៉េរិក ក្នុងឆ្នាំ២០២៥ កើនឡើងប្រមាណ១៧ភាគរយ ធៀបនឹងឆ្នាំ២០២៤ ខណៈត្រីមាសទី១ នៃឆ្នាំ២០២៦នេះ សម្រេចបានជាង ១,២ប៊ីលានដុល្លារអាម៉េរិក។
សម្រាប់ក្របខណ្ឌវិនិយោគវិញ ជប៉ុនបានចាប់ផ្តើមបណ្តាក់ទុនវិនិ យោគនៅកម្ពុជាចាប់ពីឆ្នាំ១៩៩៤មកម្ល៉េះ។ ក្នុងនោះ ក្រុមហ៊ុនជប៉ុនដែលលេចធ្លោជាច្រើនដូចជា ក្រុមហ៊ុន AEON Mall (Cambodia), មន្ទីរពេទ្យ Sunrise, ក្រុមហ៊ុន Minebea (Cambodia), និង ក្រុមហ៊ុន Toyota ផ្ទាល់ ក្រុមហ៊ុន Denso (Cambodia) ជាដើម សុទ្ធតែទទួលបានជោគជ័យ និងពង្រីកការវិនិយោគរបស់ខ្លួនជាបន្តបន្ទាប់។
លោកឯកអគ្គរដ្ឋទូតជប៉ុន ក៏បានមើលឃើញដែរថា ក្នុងបរិបទនៃការថយចុះទំនុកចិត្តរបស់វិនិយោគិនបរទេស ការដែលក្រុមហ៊ុនតូយ៉ូតា ជាម៉ាកយីហោជប៉ុនឈានមុខគេ កំពុងប្រតិបត្តិការរោងចក្រដំឡើងរថយន្តនៅកម្ពុជា ហើយទទួលបានជោគជ័យយ៉ាងខ្លាំងទាំងលើការលក់រថយន្ត និងការអភិវឌ្ឍធនធានមនុស្សនោះ នឹងចូលរួមចំណែកយ៉ាងធំធេងក្នុងការលើកកម្ពស់រូបភាពរបស់កម្ពុជាក្នុងនាមជាគោលដៅវិនិយោគ។
លោកឯកអគ្គរាជទូត បានបញ្ជាក់ថា រូបលោកផ្ទាល់ និងក្រុមការងារនៃស្ថានទូតជប៉ុន នឹងបន្តខិតខំប្រឹងប្រែងជំរុញការវិនិយោគពីប្រទេសជប៉ុនមកកាន់ប្រទេសកម្ពុជា៕
