(ភ្នំពេញ)៖ ក្រុមហ៊ុន បូសខន អ៊ិនវេសម៉ិន & ត្រេឌីង ឯ.ក ដែលមានអាសយដ្ឋាននៅភូមិសាលា សង្កាត់ទៀន ខណ្ឌដង្កោ រាជធានីភ្នំពេញ បានចេញបំភ្លឺករណីគ្រោះថ្នាក់ចរាចរណ៍ ចំពោះនិស្សិតស្រីម្នាក់បានស្លាប់ក្នុងករណីបើកបរម៉ូតូក្នុងស្ថានភាពលឿន ទៅបុកជាមួយរថយន្តដឹកសសរបេតុង ក្នុងសង្កាត់ទៀន ខណ្ឌដង្កោ មិនមែនជារថយន្ដរបស់ខ្លួនឡើយ។

នៅក្នុងសេចក្ដីបំភ្លឺ ក្រុមហ៊ុន បូសខន បានបញ្ជាក់យ៉ាងច្បាស់ថា រថយន្តដឹកសសរបេតុង ដែលពាក់ព័ន្ធក្នុងឧបទ្ទវហេតុនេះ គឺមិនមែនជាកម្មសិទ្ធិរបស់ក្រុមហ៊ុនឡើយ ហើយក្រុមហ៊ុនក៏ពុំធ្លាប់បានធ្វើការចរចា ឬដាក់សំណើផ្ដល់សំណងចំនួន២២០០ដុល្លារ ទៅកាន់ក្រុមគ្រួសារជនរងគ្រោះ ដូចការលើកឡើងនោះដែរ។

យោងតាមសេចក្ដីបំភ្លឺរបស់ក្រុមហ៊ុន បូសខន អ៊ិនវេសម៉ិន & ត្រេឌីង ឯ.ក បានឱ្យដឹងថា ករណីគ្រោះថ្នាក់ចរាចរណ៍ ដែលបានកើតឡើងកាលពីថ្ងៃទី០៨ ខែមេសា ឆ្នាំ២០២៦នោះ គឺពិតជាមានមែន ដោយបានកើតឡើងរវាងរថយន្តដឹកសសរបេតុងមួយគ្រឿង និងម៉ូតូមួយគ្រឿង ដែលបើកបរដោយនារីម្នាក់ក្នុងស្ថានភាពលឿនខ្លាំង។

ឧបទ្ទវហេតុនេះ បានកើតឡើងនៅត្រង់ចំណុចមុខទីតាំងរបស់ក្រុមហ៊ុន បូសខន អ៊ិនវេសម៉ិន។ ភ្លាមៗបន្ទាប់ពីកើតហេតុ ក្រុមហ៊ុនបានសហការយ៉ាងពេញលេញ ជាមួយសមត្ថកិច្ចពាក់ព័ន្ធ ដោយបានផ្ដល់វីដេអូពីកាមេរ៉ាសុវត្ថិភាព ដែលបានថតជាប់ហេតុការណ៍គ្រោះថ្នាក់ចរាចរណ៍នោះ ដើម្បីជាភស្តុតាងសម្រាប់ដោះស្រាយតាមនីតិវិធីច្បាប់។

ក្នុងពេលជាមួយគ្នានេះ ក្រុមហ៊ុនក៏បានធ្វើការបញ្ជាក់ដោយផ្ទាល់មាត់ទៅកាន់សមត្ថកិច្ច ក៏ដូចជាភាគីពាក់ព័ន្ធទាំងអស់ថា រថយន្តដឹកសសរបេតុងដែលពាក់ព័ន្ធ ក្នុងគ្រោះថ្នាក់ចរាចរណ៍នេះ គឺជារថយន្តដែលជាកម្មសិទ្ធិរបស់អតិថិជនរបស់ក្រុមហ៊ុន ពោលគឺមិនមែនជាកម្មសិទ្ធិផ្ទាល់របស់ក្រុមហ៊ុន បូសខន នោះឡើយ៕

ខាងក្រោមនេះ ជាសេចក្តីបំភ្លឺរបស់ក្រុមហ៊ុន «បូសខន» ៖