(បាត់ដំបង)៖ រដ្ឋបាលខេត្តបាត់ដំបង នឹងរៀបចំព្រឹត្តិការណ៍ពិព័រណ៍ផ្លែឈើបាត់ដំបង ឆ្នាំ២០២៦ ដើម្បីលើកកម្ពស់វិស័យកសិកម្ម ជំរុញការផ្សព្វផ្សាយផ្លែឈើដែលមានគុណភាពរបស់ខេត្តបាត់ដំបង បង្កើនទីផ្សារសម្រាប់កសិករ និងជំរុញវិស័យទេសចរណ៍ សេដ្ឋកិច្ច និងវប្បធម៌ក្នុងខេត្ត។

ព្រឹត្តិការណ៍ដ៏សំខាន់នេះនឹងប្រព្រឹត្តទៅរយៈពេលចំនួន ១០ថ្ងៃ ចាប់ពីថ្ងៃទី១០ ដល់ថ្ងៃទី១៩ ខែកក្កដា ឆ្នាំ២០២៦ នៅបរិវេណខាងក្នុង និងខាងមុខអគារសារមន្ទីរប្រវត្តិសាស្ត្រខេត្ត។

បើតាមលោក សុខ លូ អភិបាលខេត្តបាត់ដំបង បានបញ្ជាក់ថា គោលបំណងនៃការរៀបចំព្រឹត្តិការណ៍ផ្លែឈើ គឺដើម្បីចង់បង្ហាញឱ្យប្រជាពលរដ្ឋចាប់អារម្មណ៍មកលើផ្លែឈើបាត់ដំបង បង្កលក្ខណៈឱ្យប្រជាកសិករជាអ្នកដាំដំណាំផ្លែឈើនៅក្នុងខេត្ត បាននាំយកផលិតផលរបស់ខ្លួនមកតាំងលក់ជូនដល់ប្រជាពលរដ្ឋ ភ្ញៀវទេសចរជាតិ និងអន្តរជាតិឱ្យបានភ្លក្សរសជាតិដ៏ឆ្ងាញ់នៃផ្លែឈើដែលដាំដុះដោយកសិករក្នុងស្រុក និងទាក់ទាញភ្ញៀវទេសចរមកកាន់ខេត្តបាត់ដំបង។

លោកអភិបាលខេត្ត មានក្តីរំពឹងយ៉ាងមុតមាំថា ព្រឹត្តិការណ៍ផ្លែឈើនេះនឹងមានប្រជាពលរដ្ឋមកពីគ្រប់ទិសទីចូលរួមគាំទ្រយ៉ាងកុះករ ហើយកសិករដែលផលិតបានដំណាំផ្សេងៗ ក៏អាចនាំយកកសិផលរបស់ខ្លួនមកដាក់តាំងលក់នៅក្នុងព្រឹត្តិការណ៍នេះផងដែរ។

លោកបានឱ្យដឹងថា ក្នុងព្រឹត្តិការណ៍ពិព័រណ៍ផ្លែឈើបាត់ដំបង ឆ្នាំ២០២៦ នឹងមានសកម្មភាពសំខាន់ៗជាច្រើនរួមមាន៖ ពិព័រណ៍ និងលក់ផ្លែឈើប្រចាំខេត្តបាត់ដំបង, ក្បួនដង្ហែផ្លែឈើតំណាងក្រុងស្រុកទាំង១៤, បុហ្វេទុរេន និងការភ្លក់រសជាតិផ្លែឈើបាត់ដំបង, ការតាំងបង្ហាញផលិតផលកសិកម្មនិងផលិតផលក្នុងស្រុក, កម្មវិធីសិល្បៈវប្បធម៌ និងការប្រគំតន្ត្រី ការប្រកួតប្រជែង និងសកម្មភាពកម្សាន្តផ្សេងៗ។

ជាមួយគ្នានេះដែរ លោក សុខ លូ បានគូសបញ្ជាក់ថា ជាពិសេសនោះមានកម្មវិធីបុហ្វេទុរេននឹងត្រូវធ្វើឡើងត្រឹមតែរយៈពេល ៣ថ្ងៃប៉ុណ្ណោះ ពោលគឺចាប់ពីថ្ងៃទី១០ ដល់ថ្ងៃទី១២ ខែកក្កដា ឆ្នាំ២០២៦ ដើម្បីឱ្យប្រជាពលរដ្ឋមានឱកាសទទួលទានទុរេន ដ៏មានឱជារសផ្អែមឆ្ងាញ់ជាទុរេន មានប្រភពច្បាស់លាស់មកពីចម្ការរបស់អ្នកបាត់ដំបងផ្ទាល់១០០% ព្រមទាំងផ្លែឈើជាច្រើនមុខទៀតផងដែរ។

លោក សុខ លូ បានបន្តថា ម្ចាស់ចំការ និងក្រុមអ្នកផលិតផលិតផលក្នុងស្រុកជាច្រើនមានការចាប់អារម្មណ៍ខ្លាំង និងបានចុះឈ្មោះជាបន្តបន្ទាប់ដើម្បីចូលរួមក្នុងព្រឹត្តិការណ៍ពិព័រណ៍ផ្លែឈើឆ្នាំនេះ។

រដ្ឋបាលខេត្តបាត់ដំបង សូមអំពាវនាវដល់ប្រជាពលរដ្ឋ ភ្ញៀវទេសចរជាតិ និងអន្តរជាតិ អញ្ជើញចូលរួមទស្សនា និងគាំទ្រព្រឹត្តិការណ៍នេះឱ្យបានច្រើនកុះករ ព្រមទាំងសូមចូលរួមថែរក្សាសន្តិសុខ សណ្តាប់ធ្នាប់ អនាម័យ និងបរិស្ថាន ដើម្បីឱ្យព្រឹត្តិការណ៍នេះប្រព្រឹត្តទៅដោយជោគជ័យ និងរួមចំណែកដល់ការអភិវឌ្ឍសេដ្ឋកិច្ច និងទេសចរណ៍ក្នុងខេត្តបាត់ដំបង៕