(ភ្នំពេញ)៖ លោកស្រី អ៊ាត សោភា រដ្ឋមន្ត្រីស្តីទីក្រសួងការបរទេស និងសហប្រតិបត្តិការអន្តរជាតិ នៅរសៀលថ្ងៃទី៣ ខែកក្កដា ឆ្នាំ២០២៦ បានដឹកនាំកិច្ចប្រជុំ ដើម្បីធ្វើបទបង្ហាញជូនបណ្ដាអង្គទូតបរទេស និងអង្គការអន្តរជាតិប្រចាំកម្ពុជា អំពីការវិវត្តថ្មីៗនៃស្ថានភាពព្រំដែនកម្ពុជា-ថៃ។

កិច្ចប្រជុំនេះបានផ្តល់ឱកាសដ៏សំខាន់សម្រាប់កម្ពុជាក្នុងការបង្ហាញព័ត៌មានជាក់លាក់ និងទាន់ហេតុការណ៍ជូនសហគមន៍អន្តរជាតិ ដើម្បីឱ្យពួកគេយល់ដឹងកាន់តែច្បាស់អំពីស្ថានភាពជាក់ស្តែង និងជំហររបស់កម្ពុជា។

តាមរយៈការធ្វើបទបង្ហាញនេះ កម្ពុជាបានបង្ហាញពីការទទួលខុសត្រូវរបស់ខ្លួនក្នុងនាមជាសមាជិកនៃសហគមន៍អន្តរជាតិ ដែលតែងតែគោរពច្បាប់អន្តរជាតិ និងស្វែងរកដំណោះស្រាយដោយសន្តិវិធីចំពោះរាល់បញ្ហាប្រឈម។

កម្ពុជានៅតែបន្តរក្សាជំហររឹងមាំក្នុងការការពារអធិបតេយ្យភាព និងបូរណភាពទឹកដីរបស់ខ្លួន ព្រមទាំងប្តេជ្ញាចិត្តខ្ពស់ ក្នុងការដោះស្រាយរាល់ជម្លោះព្រំដែនជាមួយប្រទេសថៃ ក៏ដូចជាជាមួយប្រទេសជិតខាងទាំងអស់ តាមរយៈមធ្យោបាយសន្តិវិធី ស្របតាមច្បាប់អន្តរជាតិ និងកិច្ចព្រមព្រៀងទ្វេភាគីដែលមានស្រាប់ ព្រមទាំងប្រកាន់ខ្ជាប់នូវជំហរជាគោលការណ៍របស់ខ្លួនថា បន្ទាត់ព្រំដែនមិនត្រូវផ្លាស់ប្តូរដោយប្រើកម្លាំង នោះឡើយ៕