(កណ្តាល)៖ ប្រជាពលរដ្ឋរស់នៅក្នុងភូមិពពាលខែ ឃុំដីឥដ្ឋ ស្រុកកៀនស្វាយ ខេត្តកណ្ដាល កំពុងប្រឈមមុខនឹងបញ្ហាប៉ះពាល់សុខភាព និងបរិស្ថានយ៉ាងធ្ងន់ធ្ងរ ដោយសារតែក្លិនស្អុយឆ្អាប និងផ្សែងពុលដែលហុយចេញ ពីរោងចក្រមួយកន្លែងទើបបង្កើតថ្មីនៅក្នុងភូមិ។ បញ្ហានេះបានបង្កឱ្យអ្នកភូមិជាច្រើនគ្រួសារជួបការលំបាកក្នុងការដកដង្ហើម ក្អក និងស្រវាំងភ្នែក។

យោងតាមរបាយការណ៍ដែលពលរដ្ឋម្នាក់បានរាយការណ៍កាលពីថ្ងៃទី៣ ខែកក្កដា ឆ្នាំ២០២៦ បានឱ្យដឹងថា ផ្សែងដែលហុយចេញពីរោងចក្រនេះ ត្រូវបានខ្យល់បក់បោកចូលភូមិ បង្កជាក្លិនឈ្ងៀមក្រពុល ដែលធ្វើឱ្យប៉ះពាល់ដល់ការរស់នៅប្រចាំថ្ងៃរបស់ពួកគាត់។ ពលរដ្ឋរូបនេះបានបញ្ជាក់ថា រូបគាត់ផ្ទាល់ និងអ្នកភូមិជាច្រើនគ្រួសារទៀត បានទទួលរងនូវផលប៉ះពាល់នេះជាបន្តបន្ទាប់។

ប្រជាពលរដ្ឋបានលើកឡើងថា ពួកគាត់បានជូនដំណឹងអំពីបញ្ហានេះទៅលោកមេឃុំដីឥដ្ឋចំនួនពីរលើករួចមកហើយ ប៉ុន្តែពុំទាន់ឃើញមានចំណាត់ការណាមួយនៅឡើយទេ។ អាស្រ័យហេតុនេះ តាងនាមឱ្យអ្នកភូមិទាំងអស់ ពួកគាត់បានសំណូមពរដល់អាជ្ញាធរខេត្តកណ្ដាល មេត្តាអន្តរាគមន៍បន្ទាន់ទៅលើចំណុចសំខាន់ៗមួយចំនួន ដើម្បីដោះស្រាយបញ្ហានេះ។

សំណូមពររបស់ប្រជាពលរដ្ឋរួមមាន៖

*ទី១៖ ត្រួតពិនិត្យលក្ខណៈបច្ចេកទេសរបស់ឡដុតនៅក្នុងរោងចក្រឱ្យបានហ្មត់ចត់
*ទី២៖ ពិនិត្យមើលប្រភេទឥន្ធនៈដែលប្រើប្រាស់សម្រាប់ដុត ហើយស្នើឱ្យរោងចក្រប្ដូរមកប្រើប្រាស់អគ្គិសនី ឬឧស្ម័ន LPG ជំនួសវិញ ដើម្បីកាត់បន្ថយការបំពុល
*ទី៣៖ តម្រូវឱ្យរោងចក្រសាងសង់បំពង់បង្ហុយផ្សែងឱ្យបានខ្ពស់តាមដែលអាចធ្វើទៅបាន ដើម្បីកុំឱ្យផ្សែងហុយចូលទៅក្នុងភូមិដោយផ្ទាល់។

ជុំវិញបញ្ហានេះ លោក ឡូវ សុខសាន្ត អភិបាលស្រុកកៀនស្វាយ បានមានប្រសាសន៍ប្រាប់អ្នកយកព័ត៌មាន Fresh News ថា លោកបានទទួលព័ត៌មានអំពីការរងផលប៉ះពាល់របស់ប្រជាពលរដ្ឋនេះហើយ។ លោកបានបញ្ជាក់បន្ថែមថា លោកបានចាត់ក្រុមការងារឱ្យចុះទៅដោះស្រាយបញ្ហានេះជូនប្រជាពលរដ្ឋជាបន្ទាន់ផងដែរ។

ការអន្តរាគមន៍របស់អាជ្ញាធរស្រុកកៀនស្វាយ ត្រូវបានប្រជាពលរដ្ឋរំពឹងទុកយ៉ាងខ្លាំង ដើម្បីឱ្យពួកគាត់អាចរស់នៅដោយមានសុខភាពល្អ និងបរិស្ថានស្អាតឡើងវិញ។ បញ្ហាបំពុលបរិស្ថានដោយរោងចក្រ គឺជាកង្វល់រួមមួយ ដែលទាមទារឱ្យមានការយកចិត្តទុកដាក់ខ្ពស់ពីគ្រប់ភាគីពាក់ព័ន្ធ ដើម្បីធានានូវការអភិវឌ្ឍប្រកបដោយចីរភាព និងការរស់នៅប្រកបដោយផាសុកភាពរបស់ប្រជាពលរដ្ឋ៕