(កំពង់ស្ពឺ)៖ គណៈកម្មការអន្តរក្រសួង ដែលរួមមានតំណាងក្រសួងអភិវឌ្ឍន៍ជនបទ និងក្រសួងសេដ្ឋកិច្ច និងហិរញ្ញវត្ថុ បានដឹកនាំប្រតិភូចុះត្រួតពិនិត្យ និងវាយតម្លៃលទ្ធផលការងារថែទាំផ្លូវជាប្រចាំ (ដំណាក់កាលទី១) ក្នុងខេត្តកំពង់ស្ពឺ កាលពីរសៀលថ្ងៃទី២ ខែកក្កដា ឆ្នាំ២០២៦។ ដំណើរការចុះត្រួតពិនិត្យនេះ ធ្វើឡើងក្នុងគោលបំណងធានាគុណភាពសំណង់ផ្លូវ និងលើកកម្ពស់ប្រសិទ្ធភាពនៃការប្រើប្រាស់ថវិការដ្ឋ ព្រមទាំងឆ្លើយតបទៅនឹងតម្រូវការរបស់ប្រជាពលរដ្ឋក្នុងការធ្វើដំណើរ។

លោក ឈឹម សៅគី រដ្ឋលេខាធិការប្រចាំការ តំណាងលោក ឆាយ ឫទ្ធិសែន រដ្ឋមន្ត្រីក្រសួងអភិវឌ្ឍន៍ជនបទ រួមដំណើរដោយលោក អៀង ដាំ ប្រធានមន្ទីរអភិវឌ្ឍន៍ជនបទខេត្តកំពង់ស្ពឺ និងក្រុមការងារជំនាញ បានដឹកនាំគណៈកម្មការអន្តរក្រសួងនេះ ចុះពិនិត្យផ្លូវចំនួន ២គម្រោងសំខាន់ៗ។ គម្រោងទាំងពីរនេះ ដើរតួនាទីយ៉ាងសំខាន់ក្នុងការតភ្ជាប់បណ្តាញគមនាគមន៍ជនបទ និងជួយសម្រួលដល់ការដឹកជញ្ជូនកសិផល ក៏ដូចជាការធ្វើដំណើរប្រចាំថ្ងៃរបស់ប្រជាពលរដ្ឋ។

លោក ឈឹម សៅគី បានគូសបញ្ជាក់អំពីគម្រោងទី១ ដែលជាការងារថែទាំប្រចាំផ្លូវចំនួន ១៣ ខ្សែ មានប្រវែងសរុប ១៣២.៧០០ ម៉ែត្រ។ ក្នុងនោះរួមមាន៖ ផ្លូវក្រាលកៅស៊ូប្រភេទ DBST ចំនួន ១១ ខ្សែ មានប្រវែងសរុប ១១៣.៧០០ ម៉ែត្រ ទទឹងខ្នងលើពី ៦ ទៅ ៧ ម៉ែត្រ។ ផ្លូវទាំងនេះស្ថិតនៅតាមបណ្តាឃុំសំខាន់ៗជាច្រើនដូចជា ឃុំក្រាំងចេក ឃុំយុទ្ធសាមគ្គី ឃុំរុងរឿង ឃុំមហាសាំង ឃុំចាន់សែន ឃុំស្គុះ ឃុំសែនដី ឃុំដំបូងរូង ឃុំក្រាំងដីវ៉ាយ ឃុំតាំងសំរោង ឃុំព្រៃក្មេង ឃុំចំបក់ ឃុំរលាំងចេក ឃុំពជ្រមុនី ឃុំសង្កែសាទប និងឃុំរស្មីសាមគ្គី ដែលគ្របដណ្តប់លើស្រុកសាមគ្គីមុនីជ័យ ស្រុកភ្នំស្រួច ស្រុកសំរោងទង ស្រុកគងពិសី និងស្រុកឱរ៉ាល់។ ក្រៅពីនេះ ក៏មានផ្លូវក្រាលល្បាយក្រួស និងល្បាយថ្មភ្នំ ចំនួន ២ ខ្សែទៀត មានប្រវែងសរុប ១៩.០០០ ម៉ែត្រ ទទឹងខ្នងលើពី ៤ ទៅ ៨ ម៉ែត្រ ស្ថិតក្នុងឃុំជំពូព្រឹក ឃុំខ្ទុំក្រាំង និងឃុំព្រៃក្រសាំង នៃស្រុកសាមគ្គីមុនីជ័យ ខេត្តកំពង់ស្ពឺ។ គម្រោងនេះមានលេខសម្គាល់ DRR-RM-2026-No.031។

លោករដ្ឋលេខាធិការប្រចាំការ បានបន្តថា គម្រោងទី២ គឺជាការងារថែទាំខួបផ្លូវដោយក្រាលល្បាយថ្មភ្នំចំនួន ១ ខ្សែ មានប្រវែង ១១.៧០០ ម៉ែត្រ ទទឹង ៥ ម៉ែត្រ និងកម្រាស់ ០,២ ម៉ែត្រ។ ផ្លូវនេះស្ថិតនៅឃុំទ័ពមាន ស្រុកថ្ពង ខេត្តកំពង់ស្ពឺ ដែលមានលេខគម្រោង DRR-PM-2025-No.013។ គម្រោងទី២ នេះត្រូវបានអនុវត្តដោយមន្ទីរអភិវឌ្ឍន៍ជនបទខេត្តកំពង់ស្ពឺផ្ទាល់ ដែលបង្ហាញពីការយកចិត្តទុកដាក់របស់រដ្ឋបាលខេត្ត ក្នុងការអភិវឌ្ឍហេដ្ឋារចនាសម្ព័ន្ធមូលដ្ឋាន។

ក្នុងដំណើរចុះពិនិត្យនោះ លោក ឈឹម សៅគី ក៏បានផ្តាំផ្ញើទៅដល់អាជ្ញាធរភូមិ ឃុំ ស្រុក និងបងប្អូនប្រជាពលរដ្ឋដែលរស់នៅអមសងខាងផ្លូវ ព្រមទាំងពលរដ្ឋដែលទទួលផលពីផ្លូវទាំងអស់នោះ ឲ្យចូលរួមផ្សព្វផ្សាយ និងថែរក្សាផ្លូវឲ្យបានគង់វង្សយូរអង្វែង។ ការចូលរួមថែរក្សាផ្លូវសាធារណៈ គឺជាកាតព្វកិច្ចរួមរបស់ប្រជាពលរដ្ឋគ្រប់រូប ដើម្បីធានាថាហេដ្ឋារចនាសម្ព័ន្ធទាំងនេះអាចបម្រើផលប្រយោជន៍ដល់សហគមន៍បច្ចុប្បន្ន និងបន្សល់ទុកសម្រាប់ក្មេងៗជំនាន់ក្រោយប្រើប្រាស់បន្តផងដែរ។ ការងារថែទាំផ្លូវជាប្រចាំនេះ គឺពិតជាមានសារៈសំខាន់ណាស់ក្នុងការរក្សាគុណភាពផ្លូវ និងកាត់បន្ថយការចំណាយលើការជួសជុលធំៗនាពេលអនាគត ដែលរួមចំណែកដល់ការអភិវឌ្ឍសេដ្ឋកិច្ចសង្គមប្រកបដោយចីរភាពនៅតាមតំបន់ជនបទ៕