(កណ្តាល)៖ កាលពីថ្ងៃទី១ ខែកក្កដា ឆ្នាំ២០២៦ កងរាជអាវុធហត្ថខេត្តកណ្តាល បានរៀបចំពិធីបំពាក់ និងប្រគល់ប្រកាសរបស់ក្រសួងការពារជាតិ ស្តីពីការតម្លើងឋានន្តរស័ក្តិជូនដល់នាយទាហាន នៃកងរាជអាវុធហត្ថខេត្តកណ្តាល ដែលមានស្នាដៃឆ្នើមក្នុងការបំពេញភារកិច្ចកន្លងមក។ ពិធីនេះត្រូវបានធ្វើឡើងក្នុងឱកាសនៃកិច្ចប្រជុំត្រួតពិនិត្យការអនុវត្តតួនាទី ភារកិច្ច និងវឌ្ឍនភាពការងាររបស់កងរាជអាវុធហត្ថ ប្រចាំឆមាសទី១ និងលើកទិសដៅបន្តសម្រាប់ឆមាសទី២ ឆ្នាំ២០២៦។

ក្នុងឱកាសនោះ លោកឧត្ដមសេនីយ៍ត្រី សំ តុលា មេបញ្ជាការកងរាជអាវុធហត្ថខេត្តកណ្តាល បានថ្លែងអបអរសាទរយ៉ាងកក់ក្តៅ និងបានវាយតម្លៃខ្ពស់ ចំពោះស្នាដៃដ៏ត្រចះត្រចង់ ដែលនាយទាហាន នាយទាហានរង និងពលទាហាន នៃកងរាជអាវុធហត្ថខេត្តកណ្តាលទាំងអស់ បានខិតខំប្រឹងប្រែងសម្រេចបានក្នុងឆមាសទី១ ឆ្នាំ២០២៦។

លោកមេបញ្ជាការបានគូសបញ្ជាក់ថា សមិទ្ធផលទាំងនេះកើតចេញពីស្មារតីទទួលខុសត្រូវខ្ពស់ ការលះបង់កម្លាំងកាយចិត្ត បំពេញតួនាទី ភារកិច្ច និងបេសកកម្មទាំងយប់ទាំងថ្ងៃ ដោយពុំខ្លាចនឿយហត់ និងហ៊ានធ្វើពលិកម្ម គ្រប់បែបយ៉ាង។ ការខិតខំប្រឹងប្រែងទាំងនេះ បានរួមចំណែកយ៉ាងសំខាន់ក្នុងការការពារសន្តិសុខ សុវត្ថិភាព រក្សាសណ្តាប់ធ្នាប់ជូនថ្នាក់ដឹកនាំជាន់ខ្ពស់ ភ្ញៀវជាតិ-អន្តរជាតិ ក៏ដូចជាបម្រើសេចក្តីសុខជូនប្រជាពលរដ្ឋ និងសង្គមជាតិទាំងមូលប្រកបដោយប្រសិទ្ធភាព។

ការតម្លើងឋានន្តរស័ក្តិជូនមន្ត្រីដែលមានស្នាដៃល្អ គឺជាការលើកទឹកចិត្តដ៏ធំធេងមួយ ដែលឆ្លុះបញ្ចាំងពីការយកចិត្តទុកដាក់របស់ថ្នាក់ដឹកនាំចំពោះកិច្ចខិតខំប្រឹងប្រែង និងការលះបង់របស់កងកម្លាំងប្រដាប់អាវុធ។ នេះមិនត្រឹមតែជាការទទួលស្គាល់នូវគុណបំណាច់របស់បុគ្គលម្នាក់ៗប៉ុណ្ណោះទេ ប៉ុន្តែថែមទាំងជាកម្លាំងចលករជំរុញឲ្យកងកម្លាំងទាំងអស់បន្តខិតខំប្រឹងប្រែងបន្ថែមទៀត ដើម្បីសម្រេចបាននូវសមិទ្ធផលថ្មីៗ និងធំធេងជាងមុន។ តាមរយៈការលើកទឹកចិត្តនេះ កងរាជអាវុធហត្ថខេត្តកណ្តាល នឹងកាន់តែមានភាពរឹងមាំ និងមានសមត្ថភាពខ្ពស់ក្នុងការបំពេញភារកិច្ចរបស់ខ្លួន។

ជាមួយគ្នានេះដែរ លោកឧត្ដមសេនីយ៍ត្រី សំ តុលា ក៏បានធ្វើការផ្សព្វផ្សាយផែនការការពារ ពង្រឹង និងណែនាំការងារជំនាញសំខាន់ៗមួយចំនួនទៀតរបស់អង្គភាព។ ការណែនាំទាំងនេះមានគោលបំណងពង្រឹងសមត្ថភាពកងកម្លាំង លើកកម្ពស់ប្រសិទ្ធភាពការងារ និងធានាថា កងរាជអាវុធហត្ថខេត្តកណ្តាល អាចឆ្លើយតបបានទាន់ពេលវេលា និងប្រកបដោយប្រសិទ្ធភាពចំពោះរាល់បញ្ហាសន្តិសុខ និងសណ្តាប់ធ្នាប់សាធារណៈ។ លោកមេបញ្ជាការបានសង្កត់ធ្ងន់លើសារៈសំខាន់នៃការបន្តថែរក្សាសណ្តាប់ធ្នាប់សាធារណៈ និងការបម្រើប្រជាពលរដ្ឋឲ្យបានល្អប្រសើរ ដែលជាបេសកកម្មស្នូលរបស់កងរាជអាវុធហត្ថ។

ជាសរុប ការបំពាក់ឋានន្តរស័ក្តិ និងការណែនាំរបស់លោកមេបញ្ជាការ គឺជាសក្ខីភាពបញ្ជាក់ពីការប្តេជ្ញាចិត្តរបស់កងរាជអាវុធហត្ថខេត្តកណ្តាល ក្នុងការបន្តពង្រឹងសមត្ថភាព បង្កើនប្រសិទ្ធភាពការងារ និងរក្សាបាននូវសន្តិសុខ សុវត្ថិភាព និងសណ្តាប់ធ្នាប់សាធារណៈជូនប្រជាពលរដ្ឋ ក៏ដូចជាចូលរួមចំណែកក្នុងការអភិវឌ្ឍសង្គមជាតិឲ្យកាន់តែរីកចម្រើន។ កងកម្លាំងទាំងអស់ត្រូវបានជំរុញឲ្យបន្តរក្សាស្មារតីលះបង់ និងបម្រើជាតិ មាតុភូមិ ប្រជាពលរដ្ឋដោយស្មោះត្រង់ និងប្រកបដោយវិជ្ជាជីវៈខ្ពស់៕