(បរទេស)៖ អេហ្ស៊ីប បានក្លាយជាក្រុមទី២ មកពីតំបន់អាហ្រ្វិកបន្ទាប់ពីម៉ារ៉ុក ដែលបានឡើងទៅវគ្គ ១៦ក្រុមជាបន្តទៀតនៃព្រឹត្តិការណ៍បាល់ទាត់ជើងឯកពិភពលោក FIFA World Cup 2026 ក្រោយទម្លាក់គូប្រជែងអូស្រ្តាលី ដោយបាល់ប៉េណាល់ទីកាត់សេចក្តី ៤-២។

អេហ្ស៊ីប ដែលមានប្រធានក្រុម Mohamed Salah នៃក្លិបហង្សក្រហម Liverpool បានឆ្លងទៅវគ្គចាញ់-ធ្លាក់ជាលើកដំបូងសម្រាប់ពួកគេ ក្នុងប្រវត្តិសាស្រ្ត World Cup ដែលត្រូវប្រឈមមុខនឹងអាហ្សង់ទីន មកពីតំបន់អាមេរិកឡាទីន ក្នុងនាមជាម្ចាស់ការពារតំណែងជើងឯក ឬក៏កាប់វ៉េ។

ចំណែកឯអូស្រ្តាលីវិញ គឺជាក្រុមទី២ និងចុងក្រោយគេបង្អស់សម្រាប់តំបន់អាស៊ី ដែលបានហាលអាវត្រឹមវគ្គ ៣២ក្រុម បន្ទាប់ពីសាម៉ូរៃខៀវជប៉ុន ក្នុងចំណោម ៩ប្រទេសតំណាងទ្វីបអាស៊ី (AFC) ទាំងមូលឡើងមកលេង World Cup 2026 នៅសហរដ្ឋអាមេរិក មិចស៊ិក និងកាណាដា ធ្វើម្ចាស់ផ្ទះរួមគ្នា។

កីឡាករ Emam Ashour គឺជាអ្នរកបានគ្រាប់បាល់នាំមុខសម្រាប់អេហ្ស៊ីបនៅនាទីទី១៣ មុនពេលមិត្តរួមក្រុម Hany បានធ្វេសប្រហែសចូលទីខ្លួនឯងនៅនាទី៥៥ ដែលជាការបើកផ្លូវឱ្យកង់ហ្គូរូអូស្ត្រាលីតាមស្មើ ១-១ រហូតដល់ចប់ការប្រកួតពេញម៉ោង ៩០នាទី និងថែម ១៥នាទី ២ដងទៀតផង មុនឈានដល់ការទាត់ប៉េណាល់ទីកាត់សេចក្តី។

វាជាគ្រាប់បាល់ own goal លើកទី១៣ ដែលលេង ៤៨ក្រុមនៅ World Cup 2026 បំបែកកំណត់ត្រាចាស់កាល World Cup 2018 ដែលមានតែ ១២គ្រាប់ប៉ុណ្ណោះ៕