(ភ្នំពេញ)៖ កម្លាំងកងរាជអាវុធហត្ថខេត្តកំពង់ស្ពឺ បានបើកប្រតិបត្តិការបង្ក្រាបករណីល្បែងស៊ីសងតាមប្រព័ន្ធ Online ខុសច្បាប់មួយកន្លែង ស្ថិតនៅចំណុចភូមិក្រាំងពលទេព សង្កាត់រការធំ ក្រុងច្បារមន ខេត្តកំពង់ស្ពឺ ដោយឃាត់ខ្លួនជនសង្ស័យប្រុស-ស្រីចំនួន ០៧នាក់ រួមទាំងវត្ថុតាងមួយចំនួនធំកាលពីវេលាម៉ោង១៧:០០នាទី ថ្ងៃទី២៩ ខែមិថុនា ឆ្នាំ២០២៦ កន្លងទៅ។

ប្រតិបត្តិការនេះបានធ្វើឡើងក្រោមការដឹកនាំបញ្ជាយ៉ាងម៉ឺងម៉ាត់របស់លោកឧត្តមសេនីយ៍ត្រី ម៉េង ស្រ៊ុន មេបញ្ជាការ កងរាជអាវុធហត្ថខេត្តកំពង់ស្ពឺ ព្រមទាំងមានការណែនាំដោយផ្ទាល់ពីសំណាក់លោកបណ្ឌិត ជាម ច័ន្ទសោភ័ណ អភិបាលខេត្តកំពង់ស្ពឺ និងអនុវត្តតាមគោលការណ៍ដឹកនាំរបស់នាយឧត្តមសេនីយ៍ សៅ សុខា អគ្គមេបញ្ជាការរង កងយោធពលខេមរភូមិន្ទ និងជាមេបញ្ជាការ កងរាជអាវុធហត្ថលើផ្ទៃប្រទេស។

ប្រតិបត្តិការបង្ក្រាបនេះត្រូវបានធ្វើឡើងដោយកម្លាំងមន្ទីរស្រាវជ្រាវ និងបង្ក្រាបបទល្មើស នៃបញ្ជាការដ្ឋានកងរាជអាវុធហត្ថខេត្តកំពង់ស្ពឺ សហការជាមួយកម្លាំងមូលដ្ឋានកងរាជអាវុធហត្ថក្រុងច្បារមន។ ក្នុងកិច្ចប្រតិបត្តិការនេះ កម្លាំងជំនាញបានធ្វើការឃាត់ខ្លួនជនសង្ស័យចំនួន ០៧នាក់ ក្នុងនោះមានស្រីចំនួន ០៤នាក់ ដែលពាក់ព័ន្ធនឹងករណីល្បែងស៊ីសង Online ខុសច្បាប់។

ជនសង្ស័យទាំង ០៧នាក់រួមមាន៖

ទី១-ឈ្មោះ ម៉ី ប៊ុនធឿន ភេទប្រុស អាយុ៥៥ឆ្នាំ មុខរបរកសិករ (ម្ចាស់ទីតាំង)
ទី២-ឈ្មោះ ពេជ្រ សាវឿន ភេទស្រី អាយុ៤៥ឆ្នាំ មុខរបរកសិករ (ម្ចាស់ទីតាំង)
ទី៣-ឈ្មោះ ធឹម ស្រីណែត ភេទស្រី អាយុ២០ឆ្នាំ មុខរបរកាន់ម៉ាស៊ីនភ្នាល់ល្បែងឡូតូ
ទី៤-ឈ្មោះ អ៊ុន សុផាត ភេទប្រុស អាយុ៥៨ឆ្នាំ មុខរបរជាងសំណង់
ទី៥-ឈ្មោះ នៅ វង់លី ភេទប្រុស អាយុ៤២ឆ្នាំ មុខរបរកសិករ
ទី៦-ឈ្មោះ ម៉ម ស្រីម៉ៅ ភេទស្រី អាយុ៤៣ឆ្នាំ មុខរបរអាជីវករ
និងទី៧-ឈ្មោះ គង់ នឿន ភេទស្រី អាយុ៤៤ឆ្នាំ មុខរបរស្រ្តីមេផ្ទះ។ ជនសង្ស័យភាគច្រើនមានទីលំនៅបច្ចុប្បន្ននៅភូមិក្រាំងពលទេព សង្កាត់រការធំ ក្រុងច្បារមន ខេត្តកំពង់ស្ពឺ។

ប្រតិបបត្តិការនេះកម្លាំងកងរាជអាវុធហត្ថបានដកហូតវត្ថុតាងមួយចំនួនរួមមាន៖ ម៉ូតូចំនួន ០២គ្រឿង, ទូរសព្ទចំនួន ០៦គ្រឿង, កុំព្យូទ័រចំនួន ០១គ្រឿង, បៀចំនួន ០១ហ៊ូ និងខ្សែភ្លើងចំនួន ០១ដុំ។ វត្ថុតាងទាំងនេះត្រូវបានរឹបអូសដើម្បីបម្រើដល់ការស៊ើបអង្កេត និងនីតិវិធីច្បាប់។

បច្ចុប្បន្ន ជនសង្ស័យខាងលើ រួមនិងវត្ថុតាងទាំងអស់ ត្រូវបានកម្លាំងមន្ទីរស្រាវជ្រាវ និងបង្ក្រាបបទល្មើស នៃបញ្ជាការដ្ឋានកងរាជអាវុធហត្ថខេត្តកំពង់ស្ពឺ កសាងសំណុំរឿងបញ្ជូនទៅសាលាដំបូងខេត្តកំពង់ស្ពឺ ដើម្បីចាត់ការតាមនីតិវិធីច្បាប់ជាធរមាន។

ការបង្ក្រាបនេះបានបង្ហាញពីការប្តេជ្ញាចិត្តខ្ពស់របស់អាជ្ញាធរខេត្តកំពង់ស្ពឺ ក្នុងការទប់ស្កាត់ និងលុបបំបាត់បទល្មើសល្បែងស៊ីសងគ្រប់ប្រភេទ ដែលជាអំពើខុសច្បាប់ និងបង្កផលប៉ះពាល់អវិជ្ជមានដល់សន្តិសុខសណ្តាប់ធ្នាប់សាធារណៈ និងជីវភាពរស់នៅរបស់ប្រជាពលរដ្ឋ។ អាជ្ញាធរអំពាវនាវដល់ប្រជាពលរដ្ឋទាំងអស់ ចូលរួមសហការផ្តល់ព័ត៌មាន និងបញ្ឈប់ការលេងល្បែងស៊ីសងគ្រប់ប្រភេទ ដើម្បីរួមចំណែកកសាងសង្គមមួយដែលគ្មានបទល្មើស និងមានការអភិវឌ្ឍប្រកបដោយចីរភាព៕