(ភ្នំពេញ)៖ មកដល់ពេលបច្ចុប្បន្នេះ ប្រទេសកម្ពុជា មានរោងចក្រផ្គុំ និងដំឡើងរថយន្តចំនួន១១​ក្រុម​ហ៊ុន តែមានដំណើរការចំនួន៨ក្រុមហ៊ុន។ ក្រុមហ៊ុនទាំង៨ ដែលកំពុងដំណើរការនេះ មានសមត្ថភាពផ្គុំ និងដំឡើងរថយន្តជិត៤គ្រឿងក្នុងមួយឆ្នាំ។

ថ្លែងក្នុងពិធីសម្ពោធការផ្គុំ និងដំឡើងរថយន្តរបស់ក្រុមហ៊ុនតូយ៉ូតា កាលពីថ្ងៃទី២ ខែកក្កដា ឆ្នាំ២០២៦កន្លងទៅនេះ លោក ហែម វណ្ឌី រដ្ឋមន្ត្រីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ បានឱ្យដឹងថា ក្រុមហ៊ុនផ្គុំ និងដំឡើងរថយន្តទាំង១១ មានទុនវិនិយោគសរុប​ប្រមាណ​១៥៦លានដុល្លារអាមេរិក និងបានបង្កើតការងារចំនួន ១ ៣៦៥កន្លែង នារី ៦៣៣កន្លែង។

លោករដ្ឋមន្ត្រី បានឱ្យដឹងទៀតថា គិតមកដល់ពេលបច្ចុប្បន្ននេះ រថយន្តដែលបានផ្គុំ និង​ដំឡើង​នៅក្នុងប្រទេសកម្ពុជា មានចំនួនសរុប ១៧៣ ៤៧៣គ្រឿង និងមានតម្លៃសរុបប្រមាណ ១.១ប៊ីលានដុល្លារអាមេរិក។

របាយការណ៍របស់ក្រសួងបានឱ្យដឹងថា រោងចក្រផលិត ផ្គុំ និងដំឡើងរថយន្ត ដែលកំពុង​ដំណើរ​ការនៅកម្ពុជា រួមមាន រោងចក្ររថយន្ត KIA នៅខេត្តបន្ទាយមានជ័យ, Hyundai នៅ​ខេត្តកោះកុង, GTV របស់ខ្មែរនៅខេត្តកណ្តាល, ក្រុមហ៊ុន Toyota នៅក្នុងតំបន់សេដ្ឋ​កិច្ច​ពិសេសភ្នំពេញ, រថយន្ត I SUZU នៅខេត្តកំពង់ស្ពឺ, រោងចក្រផលិត ផ្គុំ និងដំឡើងរថយន្ត Ford នៅខេត្តពោធិ៍សាត់, រោងចក្រ Ssang Yong នៅខេត្តស្វាយរៀង, រោងចក្រ Zo Mo​tor ផ្គុំ និងដំឡើង រថយន្តខ្នាតធំអគ្គិសនីនៅខេត្តពោធិសាត់, រោងចក្រដំឡើងរថយន្តអគ្គិសនី BYD នៅខេត្តព្រះសីហនុ។

ដោយឡែករោងចក្ររថយន្ត GAC និងរោងចក្ររថយន្ត Chevrolet កំពុងស្ថិតក្នុងដំណាក់​កាល​សាងសង់ស្ថិតនៅខេត្តកំពង់ឆ្នាំង។

លោក ហែម វណ្ឌី បានឱ្យដឹងថា ក្រុមហ៊ុនផ្គុំ និងដំឡើងរថយន្តទាំងនេះ បាននិងកំពុងបង្កើន​ការ​ប្រើប្រាស់គ្រឿងផ្គុំ និងបំណែករថយន្តរបស់ក្រុមហ៊ុនក្នុងស្រុក ដែលជាសញ្ញាវិជ្ជមាន​ក្នុង​ឧស្សាហកម្មរថយន្តនៅកម្ពុជា។

លោករដ្ឋមន្ត្រីបន្ថែមថា តាមរយៈការវិនិយោគរោងចក្រផ្គុំ និងដំឡើងរថយន្តទាំងនេះ មិនត្រឹម​តែបង្កើតការងារ និងបង្កើនប្រាក់ចំណូលសម្រាប់ប្រជាពលរដ្ឋកម្ពុជាប៉ុណ្ណោះទេ ប៉ុន្តែបានជួយ ពន្លឿនការផ្ទេរបច្ចេកវិទ្យា ការអភិវឌ្ឍជំនាញ និងការកសាងសមត្ថភាពរបស់ឧស្សាហកម្មជាតិ ថែម ទៀតផង៕