(បាត់ដំបង)៖ លោក ព្រួញ រិទ្ធថា ប្រធានមន្ទីរសាធារណការ និងដឹកជញ្ជូនខេត្តបាត់ដំបង និងជាប្រធានក្រុមការងាររាជរដ្ឋាភិបាលចុះមូលដ្ឋានឃុំក្តុលតាហែន និងឃុំឃ្លាំងមាស ស្រុកបវេល រួមជាមួយភរិយា កូនៗ ព្រមទាំងសហការី បានអញ្ជើញចុះជួបសំណេះសំណាលសួរសុខទុក្ខ និងនាំយកអំណោយមនុស្សធម៌ទៅចែកជូនប្រជាពលរដ្ឋដែលខ្វះខាតស្បៀងចំនួន ៩៦គ្រួសារ មកពីភូមិចំនួន៥ ក្នុងឃុំក្តុលតាហែន និងឃុំឃ្លាំងមាស នៃស្រុកបវេល ខេត្តបាត់ដំបង។ ពិធីនេះ បានប្រព្រឹត្តទៅកាលពីព្រឹកថ្ងៃទី៤ ខែកក្កដា ឆ្នាំ២០២៦ នៅបរិវេណវត្តទំនប់តាកួន ស្ថិតក្នុងភូមិទំនប់តាកួន ឃុំឃ្លាំងមាស ស្រុកបវេល។

ក្នុងឱកាសនេះ ក៏មានការអញ្ជើញចូលរួមពីសំណាក់ លោក ចា សារៀង អភិបាលរងស្រុក តំណាងគណៈអភិបាលស្រុកបវេល ក្រុមប្រឹក្សាឃុំ និងអង្គភាពភូមិ ក្នុងស្រុកបវេលផងដែរ។ វត្តមានរបស់ថ្នាក់ដឹកនាំ និងមន្ត្រីពាក់ព័ន្ធទាំងអស់ បានបង្ហាញពីការយកចិត្តទុកដាក់ខ្ពស់របស់រាជរដ្ឋាភិបាល ចំពោះសុខទុក្ខ និងជីវភាពរស់នៅរបស់ប្រជាពលរដ្ឋ ជាពិសេសអ្នកដែលកំពុងជួបការលំបាក។

ថ្លែងទៅកាន់បងប្អូនប្រជាពលរដ្ឋ លោក ព្រួញ រិទ្ធថា បានសម្តែងនូវក្តីសប្បាយរីករាយយ៉ាងក្រៃលែង ដែលបានចុះមកជួបសំណេះសំណាលផ្ទាល់ជាមួយបងប្អូនប្រជាពលរដ្ឋនៅមូលដ្ឋាន។ លោកបានគូសបញ្ជាក់ថា ការចុះជួបសំណេះសំណាលនេះ គឺដើម្បីស្វែងយល់ពីទុក្ខលំបាក និងតម្រូវការជាក់ស្តែងរបស់ប្រជាពលរដ្ឋ ក៏ដូចជាពាំនាំនូវការផ្តាំផ្ញើសួរសុខទុក្ខពីសំណាក់ថ្នាក់ដឹកនាំរាជរដ្ឋាភិបាល។

ជាមួយគ្នានេះ លោកប្រធានក្រុមការងារ ក៏បានណែនាំដល់ប្រជាពលរដ្ឋក្នុងស្រុកបវេលទាំងអស់ ឱ្យមានការប្រុងប្រយ័ត្នខ្ពស់ចំពោះគ្រោះធម្មជាតិ ដែលអាចកើតមានឡើងក្នុងរដូវវស្សា។ លោកបានលើកឡើងថា ឆ្នាំនេះ រដូវវស្សាអាចនឹងមានភ្លៀងធ្លាក់ខ្លាំង អមដោយខ្យល់កន្ត្រាក់ និងផ្គររន្ទះ ដែលអាចបង្កជាគ្រោះថ្នាក់ដល់អាយុជីវិតមនុស្ស សត្វ និងទ្រព្យសម្បត្តិ។ ដូច្នេះ លោកបានអំពាវនាវដល់ប្រជាពលរដ្ឋគ្រប់រូប ត្រូវបង្កើនការប្រុងប្រយ័ត្នឱ្យបានគ្រប់ៗគ្នា ជាពិសេសត្រូវថែទាំសុខភាពឱ្យបានល្អប្រសើរ។ លោកបានសង្កត់ធ្ងន់ថា ចំពោះកូនចៅតូចៗ ត្រូវមានការប្រុងប្រយ័ត្នជាទីបំផុត ដើម្បីជៀសវាងពីវិបត្តិសុខភាពផ្សេងៗ ដែលអាចកើតមានឡើងក្នុងរដូវវស្សានេះ។

លោក ព្រួញ រិទ្ធថា ក៏បានណែនាំបន្ថែមថា ប្រសិនបើបងប្អូនប្រជាពលរដ្ឋមានបញ្ហាសុខភាព ឬមានអារម្មណ៍មិនស្រួលខ្លួន ត្រូវប្រញាប់ទៅកាន់មណ្ឌលសុខភាព ឬមន្ទីរពេទ្យដែលនៅជិតបំផុត ដើម្បីអាចពិគ្រោះ និងទទួលការព្យាបាលបានទាន់ពេលវេលា។ ការណែនាំទាំងនេះ គឺដើម្បីធានាបាននូវសុវត្ថិភាព និងសុខុមាលភាពរបស់ប្រជាពលរដ្ឋទាំងអស់។

ក្នុងនាមប្រជាពលរដ្ឋដែលខ្វះខាតទាំងអស់ តំណាងប្រជាពលរដ្ឋបានថ្លែងអំណរគុណយ៉ាងជ្រាលជ្រៅចំពោះលោក ព្រួញ រិទ្ធថា ប្រធានក្រុមការងារ និងភរិយា កូនៗ ព្រមទាំងសហការី ដែលតែងតែយកចិត្តទុកដាក់ចុះសួរសុខទុក្ខ និងនាំយកអំណោយមកចែកជូនពួកគាត់ជាហូរហែររហូតមក។ ការយកចិត្តទុកដាក់នេះ បានបង្ហាញពីទឹកចិត្តសប្បុរសធម៌ និងការទទួលខុសត្រូវខ្ពស់របស់ថ្នាក់ដឹកនាំ ចំពោះប្រជាពលរដ្ឋដែលកំពុងជួបការលំបាក។

សូមជម្រាបថា អំណោយដែលបានផ្តល់ជូនគ្រួសារនីមួយៗក្នុងឱកាសនោះ រួមមាន៖ អង្ករ ទឹកសុទ្ធ មី ទឹកស៊ីអ៊ីវ ទឹកត្រី និងត្រីខ។ អំណោយទាំងនេះ គឺជាការរួមចំណែកដ៏សំខាន់មួយ ក្នុងការជួយសម្រាលបន្ទុកជីវភាពប្រចាំថ្ងៃរបស់បងប្អូនប្រជាពលរដ្ឋដែលខ្វះខាត ក្នុងបរិបទដែលពួកគាត់កំពុងត្រូវការជំនួយ។ សកម្មភាពមនុស្សធម៌នេះ មិនត្រឹមតែជាការផ្តល់ជំនួយសម្ភារៈប៉ុណ្ណោះទេ ប៉ុន្តែថែមទាំងជាការផ្តល់នូវកម្លាំងចិត្ត និងក្តីសង្ឃឹមដល់ប្រជាពលរដ្ឋឱ្យបន្តតស៊ូជំនះរាល់ការលំបាកក្នុងជីវភាពរស់នៅ៕