(តាកែវ)៖ លោកបណ្ឌិត ស៊ូ ភិរិន្ទ អនុប្រធានក្រុមការងារគណបក្សចុះមូលដ្ឋានខេត្តតាកែវ និងជាប្រធានក្រុមការងារគណបក្សចុះមូលដ្ឋានស្រុកបូរីជលសារ នាព្រឹកថ្ងៃសៅរ៍ ទី៤ ខែកក្កដា ឆ្នាំ២០២៦ បានអញ្ជើញ នាំយកសម្ភារការិយាល័យមួយចំនួនធំ ទៅប្រគល់ជូនដល់ការិយាល័យគណៈកម្មាធិការគណបក្សប្រជាជនកម្ពុជាស្រុកបូរីជលសារ ខេត្តតាកែវ។ ការផ្ដល់ជូននេះ គឺក្នុងគោលបំណងគាំទ្រ និងត្រៀមលក្ខណៈសម្រាប់ ការប្រើប្រាស់ក្នុងយុទ្ធនាការបោះឆ្នោតឃុំសង្កាត់ ដែលនឹងឈានមកដល់ក្នុងពេលឆាប់ៗខាងមុខនេះ។

លោកបណ្ឌិត ស៊ូ ភិរិន្ទ បានពាំនាំនូវប្រសាសន៍ផ្ដាំផ្ញើសួរសុខទុក្ខយ៉ាងជ្រាលជ្រៅពីសំណាក់សម្ដេចតេជោ ហ៊ុន សែន ប្រធានព្រឹទ្ធសភា និងសម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ព្រមទាំងសម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា និងលោកជំទាវបណ្ឌិត ពេជ ចន្ទមុន្នី ហ៊ុនម៉ាណែត។

លោកបណ្ឌិតបានបញ្ជាក់ថា សម្ដេច និងលោកជំទាវបណ្ឌិត តែងតែយកចិត្តទុកដាក់គិតគូរពីសុខទុក្ខ និងជីវភាពរស់នៅរបស់សមាជិកបក្សទាំងអស់ ជាពិសេសសុខទុក្ខរបស់បងប្អូនប្រជាពលរដ្ឋនៅទូទាំងប្រទេសកម្ពុជា។ ការយកចិត្តទុកដាក់នេះ គឺជាកម្លាំងចលករដ៏សំខាន់ក្នុងការជំរុញការអភិវឌ្ឍប្រទេសជាតិ និងលើកកម្ពស់ជីវភាពប្រជាជនឱ្យកាន់តែប្រសើរឡើង។

ជាមួយគ្នានេះ លោកបណ្ឌិត ស៊ូ ភិរិន្ទ ក៏បានគូសបញ្ជាក់អំពីតម្លៃដ៏មហាសាលនៃសុខសន្តិភាព ដែលជាមូលដ្ឋានគ្រឹះមិនអាចខ្វះបានសម្រាប់ការអភិវឌ្ឍ និងវឌ្ឍនភាពសង្គម។ លោកបានថ្លែងថា បើគ្មានសន្តិភាពទេ នោះយើងទាំងអស់គ្នានឹងគ្មានអ្វីគ្រប់យ៉ាងដូចសព្វថ្ងៃនេះឡើយ។ សន្តិភាពបានផ្ដល់ឱកាសឱ្យប្រជាពលរដ្ឋរស់នៅដោយសុខដុមរមនា ប្រកបរបរចិញ្ចឹមជីវិតដោយរីកចម្រើន និងចូលរួមចំណែកកសាងប្រទេសជាតិ។

ក្នុងន័យនេះ រាជរដ្ឋាភិបាលនីតិកាលទី៧ នៃរដ្ឋសភា ក្រោមការដឹកនាំដ៏ឈ្លាសវៃរបស់សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រី បានប្ដេជ្ញាចិត្តយ៉ាងមុតមាំក្នុងការថែរក្សាសន្តិភាព និងតម្កល់សន្តិភាពជាគុណតម្លៃខ្ពស់បំផុត។ ការប្ដេជ្ញាចិត្តនេះ គឺគ្មានការប្រែប្រួលជាដាច់ខាត ទោះបីក្នុងតម្លៃណាក៏ដោយ ដើម្បីធានាបាននូវស្ថិរភាព និងការរីកចម្រើនយូរអង្វែងរបស់កម្ពុជា។

សម្ភារការិយាល័យដែលលោកបណ្ឌិត ស៊ូ ភិរិន្ទ ដែលជាអ្នកតំណាងរាស្ត្រមណ្ឌលតាកែវ បានផ្ដល់ជូនដល់គណៈកម្មាធិការគណបក្សប្រជាជនស្រុកបូរីជលសារ រួមមាន៖ ម៉ាស៊ីនព្រីនខ្នាតធំ ចំនួន ១ គ្រឿង, កុំព្យូទ័រលើតុ ចំនួន ១ គ្រឿង, ទូដាក់ឯកសារ ចំនួន ១, ក្រដាសរាម ចំនួន ១០ កេស, ក្រូណូដាក់ឯកសារ ចំនួន ៣ ដុំ ស្មើនឹង ១៦ ក្រូណូ, ប៊ិច ចំនួន ១ ប្រអប់, ទឹកថ្នាំ Printer ចំនួន ១ ថង់ និងបំពង់ទឹកក្ដៅ ចំនួន ១។ សម្ភារៈទាំងអស់នេះ មានតម្លៃសរុបប្រមាណ ១០,០០០,០០០ រៀល (ដប់លានរៀល)។ ការផ្ដល់ជូននេះ នឹងចូលរួមចំណែកយ៉ាងសំខាន់ក្នុងការបង្កើនប្រសិទ្ធភាពការងាររបស់ការិយាល័យគណបក្សប្រជាជនស្រុកបូរីជលសារ ក្នុងការបម្រើប្រជាពលរដ្ឋ និងត្រៀមខ្លួនសម្រាប់ការបោះឆ្នោតនាពេលខាងមុខ។

សរុបមក ការផ្ដល់ជូនសម្ភារៈការិយាល័យនេះ មិនត្រឹមតែជាការគាំទ្រផ្នែកសម្ភារៈប៉ុណ្ណោះទេ ប៉ុន្តែក៏ជាការបង្ហាញនូវការយកចិត្តទុកដាក់ និងការប្ដេជ្ញាចិត្តរបស់ថ្នាក់ដឹកនាំគណបក្សប្រជាជនកម្ពុជា ក្នុងការបន្តបម្រើប្រជាពលរដ្ឋ និងរក្សាសន្តិភាពជូនជាតិមាតុភូមិ។ តាមរយៈសកម្មភាពទាំងនេះ គណបក្សប្រជាជនកម្ពុជា បង្ហាញពីការត្រៀមខ្លួនរួចជាស្រេចក្នុងការបន្តដឹកនាំប្រទេសឆ្ពោះទៅរកភាពរីកចម្រើន និងវិបុលភាព៕