(ត្បូងឃ្មុំ)៖ នៅថ្ងៃទី៤ ខែកក្កដា ឆ្នាំ២០២៦នេះ លោក ផារ៉ា មង្គល សមាជិកគណៈកម្មាធិការកណ្តាល និងជាប្រធានក្រុមការងារគណបក្សចុះមូលដ្ឋានស្រុកក្រូចឆ្មារ រួមជាមួយ លោក ស៊ាក ឡេង សមាជិកព្រឹទ្ធសភាប្រចាំភូមិភាគទី២ បានអញ្ជើញជាអធិបតី ក្នុងពិធីប្រកាសសមាសភាពសាខាបក្ស អនុសាខាបក្ស និងក្រុមបក្ស ចំណុះឃុំជំនីក ស្រុកក្រូចឆ្មារ ខេត្តត្បូងឃ្មុំ ចំនួន៤៧៨នាក់ ដោយមានសមាជិកសមាជិកា និងក្រុមការងារចូលរួមយ៉ាងកុះករ។

មានប្រសាសន៍សំណេះសំណាលក្នុងឱកាសនោះ លោក ផារ៉ា មង្គល បានពាំនាំនូវការសាកសួរសុខទុក្ខ និងពរជ័យសិរីសួស្តីពីសំណាក់ សម្តេចតេជោ ហ៊ុន សែន ប្រធានគណបក្ស, សម្តេចចក្រី ហេង សំរិន ប្រធានកិត្តិយសគណបក្ស, សម្តេចមហាបវរធិបតី ហ៊ុន ម៉ាណែត អនុប្រធានគណបក្ស និងជានាយករដ្ឋមន្ត្រីនៃព្រះរាជាណាចក្រកម្ពុជា ព្រមទាំង លោក ជា សុផារ៉ា ឧត្តមប្រឹក្សាផ្ទាល់ព្រះមហាក្សត្រ និងជាប្រធានក្រុមការងារគណបក្សចុះមូលដ្ឋានខេត្តត្បូងឃ្មុំ ជូនដល់សមាជិក-សមាជិកាបក្សទាំងអស់។

ជាមួយគ្នានោះ ប្រធានក្រុមការងារ បានលើកបង្ហាញពីសមិទ្ធផលនានារបស់រាជរដ្ឋាភិបាល និងបានលើកទឹកចិត្តដល់សមាជិកបក្សទាំងអស់ ឱ្យបន្តរួមសាមគ្គីគ្នាជាធ្លុងមួយ ក្នុងការគាំទ្រ និងអនុវត្តគោលនយោបាយរបស់គណបក្ស ក្រោមការដឹកនាំដ៏ឈ្លាសវៃរបស់ សម្តេចតេជោ និងសម្តេចធិបតី។

ទន្ទឹមនឹងនេះ លោក បានដាក់ចេញនូវទិសដៅការងារយ៉ាងម៉ឺងម៉ាត់ ដល់ប្រធានក្រុមបក្សទាំងអស់ ត្រូវត្រៀមលក្ខណៈគ្រប់បែបយ៉ាង ឆ្ពោះទៅកាន់ការបោះឆ្នោតជ្រើសរើសក្រុមប្រឹក្សាឃុំ សង្កាត់ ឆ្នាំ២០២៧ ខាងមុខ ជាពិសេសត្រូវបន្តជួយជំរុញ និងណែនាំយុវជនគ្រប់អាយុនៅតាមមូលដ្ឋាន ឱ្យទៅចុះឈ្មោះបោះឆ្នោតឱ្យបានគ្រប់ៗគ្នា។

តមក លោក ផារ៉ា មង្គល បានដឹកនាំសមាជិកសមាជិកាជាង៥០០នាក់ រួមគ្នាដាំកូនឈើចំនួន ១.០០០ដើម នៅឮតំបន់បឹងជីសែន និងអូរក្ដារ ដើម្បីបង្កើនគម្របបៃតង និងចូលរួមអភិរក្សបរិស្ថានក្នុងឃុំជំនីក សម្រាប់ជាប្រយោជន៍ដល់កូនចៅជំនាន់ក្រោយ៕