(បរទេស)៖ ក្រុមតោកំណាចអង់គ្លេស នឹងត្រូវប្រឈមមុខនឹងសហម្ចាស់ផ្ទះមិចស៊ិក ក្នុងវគ្គ ១៦ក្រុមនៃ World Cup 2026 ក្រោយពេលសាំបាប្រេស៊ីល ជួបន័រវេសនារាត្រីនេះ។

ប្រេស៊ីល មកពីអាមេរិកឡាទីន អតីតជើងឯក World Cup ៥សម័យកាលច្រើនជាងគេ ត្រូវប្រឈមមុខនឹងន័រវេស ក្រុមនៅតំបន់អឺរ៉ុបនាម៉ោង ៣ទៀបភ្លឺ (ម៉ោងនៅកម្ពុជា) ដើម្បីប្រជែងកៅអីឡើងវគ្គ ៨ក្រុមជាបន្តទៀត។

ក្រុមសាំបាដែលដឹកនាំដោយអ្នកចាត់ការសញ្ជាតិអ៉ីតាលី Carlo Ancelotti បានយកឈ្នះជប៉ុន ២-១ ចុងម៉ោងនៃវគ្គ ៣២ក្រុម ដ្បិតគូប្រជែងន័រវេស ក៏បានទម្លាក់កូដឌីវ័រ ក្នុងលទ្ធផលនេះដែរ។

ចំណែកឯ ១ប្រកួតទៀត សហម្ចាស់ផ្ទះមិចស៊ិក ប៉ះអង់គ្លេស លេងម៉ោង ៧ព្រឹកថ្ងៃចន្ទ ទី០៦ ខែកក្កដា។ មិចស៊ិក ជាក្រុមលេខ១ ចេញពីពូល A និងបានទម្លាក់អេក្វាទ័រ ២-០ ក្នុងវគ្គ ៣២ក្រុម គ្រាដែលតោកំណាចវាយបកឈ្នះកុងហ្គោ ២-១ ចុងម៉ោង៕