(កណ្តាល)៖ បញ្ជាការដ្ឋានកងរាជអាវុធហត្ថខេត្តកណ្តាល បានសហការជាមួយមជ្ឈមណ្ឌលជាតិផ្តល់ឈាម សហភាពសហព័ន្ធយុវជនកម្ពុជាខេត្ត និងមន្ទីរពេទ្យបង្អែកជ័យជំនះខេត្តកណ្តាល រៀបចំពិធីបរិច្ចាគឈាមស្ម័គ្រចិត្តមួយ កាលពីថ្ងៃទី៤ ខែកក្កដា ឆ្នាំ២០២៦។ ពិធីមនុស្សធម៌នេះ ធ្វើឡើងក្នុងគោលបំណងអបអរសាទរខួបអនុស្សាវរីយ៍លើកទី៣៣ ថ្ងៃបង្កើតកងរាជអាវុធហត្ថ ដែលគិតចាប់ពីថ្ងៃទី១៤ ខែកក្កដា ឆ្នាំ១៩៩៣ ដល់ថ្ងៃទី១៤ ខែកក្កដា ឆ្នាំ២០២៦។

ពិធីនេះបានប្រព្រឹត្តទៅក្រោមអធិបតីភាពលោកឧត្ដមសេនីយ៍ ត្រី សំ តុលា មេបញ្ជាការកងរាជអាវុធហត្ថខេត្តកណ្តាល រួមជាមួយតំណាងមជ្ឈមណ្ឌលជាតិផ្តល់ឈាម និងប្រធានមន្ទីរពេទ្យបង្អែកជ័យជំនះខេត្តកណ្តាល និងមានការរួមមាននាយទាហាន នាយទាហានរង ពលទាហាន ក្រុមគ្រូពេទ្យ ព្រមទាំងក្រុមគ្រួសារកងទ័ព និងប្រជាពលរដ្ឋយ៉ាងច្រើនកុះករ ដែលបានបង្ហាញពីស្មារតីសាមគ្គីភាព និងការចូលរួមចំណែកក្នុងកិច្ចការមនុស្សធម៌។

ថ្លែងក្នុងឱកាសនោះ លោកឧត្ដមសេនីយ៍ ត្រី សំ តុលា បានគូសបញ្ជាក់ថា សកម្មភាពមនុស្សធម៌នៃការបរិច្ចាគឈាមនេះ គឺធ្វើឡើងស្របតាមភារកិច្ចស្នូលរបស់កងរាជអាវុធហត្ថ គឺ «បង្ការ បង្ក្រាប និងសង្គ្រោះ»។ សកម្មភាពទាំងអស់នេះ គឺស្ថិតក្រោមការដឹកនាំ និងចង្អុលបង្ហាញជាប្រចាំពីនាយឧត្តមសេនីយ៍ សៅ សុខា អគ្គមេបញ្ជាការរងនៃកងយោធពលខេមរភូមិន្ទ និងជាមេបញ្ជាការកងរាជអាវុធហត្ថលើផ្ទៃប្រទេស ព្រមទាំង លោក គួច ចំរើន អភិបាលខេត្តកណ្តាល។ លោកមេបញ្ជាការបានបន្ថែមថា កម្លាំងកងរាជអាវុធហត្ថខេត្តកណ្តាល តែងតែឈរលើគោលការណ៍គោរពបទបញ្ជា វិន័យ សាមគ្គីភាពផ្ទៃក្នុង និងត្រៀមលក្ខណៈជួយសង្គ្រោះប្រជាពលរដ្ឋដែលរងគ្រោះ ឬខ្វះឈាមចាំបាច់គ្រប់ពេលវេលា និងគ្រប់ទីកន្លែង។

លោកមេបញ្ជាការ បានសម្តែងនូវការស្ងើចសរសើរ និងលើកទឹកចិត្តយ៉ាងខ្លាំងចំពោះនាយទាហាន នាយទាហានរង ពលទាហាន និងអ្នកចូលរួមទាំងអស់ ដែលបានស្ម័គ្រចិត្តបរិច្ចាគឈាម ដើម្បីជួយសង្គ្រោះជីវិតមនុស្ស។ ការបរិច្ចាគឈាម គឺជាទង្វើដ៏ថ្លៃថ្នូរមួយ ដែលអាចផ្តល់ក្តីសង្ឃឹម និងជីវិតថ្មីដល់អ្នកជំងឺដែលត្រូវការឈាមជាចាំបាច់។

ជាលទ្ធផលនៃពិធីបរិច្ចាគឈាមស្ម័គ្រចិត្តនេះ មានអ្នកចូលរួមសរុបចំនួន ២៦៥នាក់ ក្នុងនោះអ្នកបរិច្ចាគឈាមជាក់ស្តែងមានចំនួន ១៨៥នាក់ ដែលស្មើនឹង ១៨៥ប្លោក។ នេះជាការរួមចំណែកដ៏សំខាន់មួយក្នុងការបំពេញបន្ថែមស្តុកឈាមរបស់មជ្ឈមណ្ឌលជាតិផ្តល់ឈាម ដើម្បីឆ្លើយតបទៅនឹងតម្រូវការបន្ទាន់របស់មន្ទីរពេទ្យនានា។

គួរបញ្ជាក់ផងដែរថា ប្រវត្តិនៃការបរិច្ចាគឈាមរបស់អង្គភាពកងរាជអាវុធហត្ថខេត្តកណ្តាល ចាប់តាំងពីឆ្នាំ២០១៥ រហូតមកដល់បច្ចុប្បន្ន អង្គភាពតែងតែរៀបចំសកម្មភាពមនុស្សធម៌នេះ យ៉ាងតិច ២ដងក្នុងមួយឆ្នាំ។ គិតមកទល់ពេលនេះ អង្គភាពបានសម្រេចរៀបចំពិធីបរិច្ចាគឈាមបានចំនួន ១៦លើក ដោយមានអ្នកចូលរួមសរុប ៣,៦៩៧នាក់ និងទទួលបានឈាមជូនមជ្ឈមណ្ឌលជាតិផ្តល់ឈាម ចំនួនជាង ២,០០០ប្លោក។ សកម្មភាពទាំងនេះ បានឆ្លុះបញ្ចាំងពីស្មារតីលះបង់ និងការប្តេជ្ញាចិត្តខ្ពស់របស់កងរាជអាវុធហត្ថខេត្តកណ្តាល ក្នុងការបម្រើប្រជាពលរដ្ឋ និងចូលរួមចំណែកក្នុងកិច្ចការសង្គមជាតិ៕