(កំពង់ស្ពឺ)៖ ភ្នាក់ងារ និងសកម្មជនគាំទ្រគណបក្សភ្លើងទៀនចំនួន ៥៤រូប មកពីឃុំការហែង ស្រុកសំរោងទង ខេត្តកំពង់ស្ពឺ នារសៀលថ្ងៃទី៤ ខែកក្កដា ឆ្នាំ២០២៦ បានសម្រេចចិត្តលាឈប់ពីគណបក្សរបស់ខ្លួន និងប្រកាសស្ម័គ្រចិត្តចូលរួមជីវភាពនយោបាយជាមួយគណបក្សប្រជាជនកម្ពុជា ក្រោមការដឹកនាំដ៏ឈ្លាសវៃរបស់សម្ដេចតេជោ ហ៊ុន សែន ប្រធានគណបក្ស។

ពិធីទទួលស្វាគមន៍ភ្នាក់ងារ និងសកម្មជនគាំទ្រគណបក្សភ្លើងទៀននេះត្រូវបានធ្វើឡើងក្រោមការដឹកនាំរបស់លោក ទី ប៊ុនថេង ទីប្រឹក្សាសម្ដេចតេជោ និងជាក្រុមការងារស្នូលរបស់ក្រុមចលនាកសាងសមាជិកបក្សស្នាក់ការកណ្ដាល ដោយមានការយកចិត្តទុកដាក់ខ្ពស់ពីលោក យូ សិរីវុឌ្ឍ បេសកជនពិសេសរបស់សម្ដេចតេជោ ហ៊ុន សែន។

ការសម្រេចចិត្តដ៏សំខាន់នេះ គឺកើតចេញពីការយល់ឃើញយ៉ាងច្បាស់អំពីតម្លៃនៃសន្តិភាព និងការអភិវឌ្ឍរីកចម្រើនលើគ្រប់វិស័យ ដែលសម្រេចបានក្រោមការដឹកនាំរបស់គណបក្សប្រជាជនកម្ពុជា។ ភ្នាក់ងារ និងសកម្មជនទាំង ៥៤រូប បានអះអាងថា ការចូលរួមជាមួយគណបក្សប្រជាជនកម្ពុជា គឺធ្វើឡើងដោយស្ម័គ្រចិត្ត ឥតមានការបង្ខិតបង្ខំ ឬទិញដូរអ្វីឡើយ។ ពួកគេបានបង្ហាញពីការអស់ជំនឿលើនយោបាយរបស់គណបក្សប្រឆាំង ដែលពួកគេយល់ថា មានគំនិតទុច្ចរិត ចង់បំបែកបំបាក់ស្មារតីសាមគ្គីភាពខ្មែរ និងខ្មែរ ព្រមទាំងបំផ្លាញសុខសន្តិភាព។

លោក លោកស្រី ដែលទើបនឹងភ្ញាក់រលឹកខាងនយោបាយ បានថ្លែងគាំទ្រយ៉ាងពេញទំហឹងចំពោះសម្ដេចតេជោ ហ៊ុន សែន និងសម្ដេចធិបតី ហ៊ុន ម៉ាណែត ក្នុងការដោះស្រាយបញ្ហាព្រំដែនទឹកដីកម្ពុជា ក្នុងយុទ្ធសាស្ត្រ «ស្ងាត់តែមិនស្ងៀម»។ ពួកគេបានបញ្ជាក់ថា សកម្មភាពនយោបាយរបស់ទណ្ឌិតក្បត់ជាតិ សម រង្ស៊ី និងក្រុមប្រឆាំង មានតែបំផ្លាញជាតិ និងមិនបានជួយអ្វីដល់ប្រជាជនឡើយ។

ផ្ទុយទៅវិញ ពួកគេបានសម្តែងនូវការដឹងគុណដ៏ធំធេងចំពោះវីរភាពរបស់សម្ដេចអគ្គមហាសេនាបតីតេជោ ហ៊ុន សែន ដែលបានលះបង់អាយុជីវិតដើម្បីប្ដូរយកសន្តិភាពជូនជាតិមាតុភូមិ និងបានបង្ហាញការជឿជាក់យ៉ាងមុតមាំលើរដ្ឋាភិបាលដែលដឹកនាំដោយសម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា។

បន្ទាប់ពីការប្រកាសផ្ដាច់ខ្លួនចេញពីគណបក្សចាស់ទាំង ៥៤រូប ក៏បានស្នើសុំការអនុគ្រោះពីសម្ដេចតេជោ ហ៊ុន សែន ដើម្បីទទួលបានឱកាសចូលរួមបន្តសកម្មភាពនយោបាយជាមួយគណបក្សប្រជាជនកម្ពុជា។ ពួកគេបានមើលឃើញយ៉ាងច្បាស់ថា គណបក្សប្រជាជនកម្ពុជា គឺជាបក្សនយោបាយតែមួយគត់ ដែលមានគុណបំណាច់ដ៏ធំធេងសម្រាប់ជាតិ និងប្រជាជនកម្ពុជា។

ថ្លែងក្នុងឱកាសនោះ លោក ទី ប៊ុនថេង បានសម្តែងនូវការអបអរសាទរយ៉ាងកក់ក្តៅចំពោះវត្តមានរបស់បងប្អូនទាំងអស់ ដែលបានសម្រេចចិត្តដ៏ត្រឹមត្រូវនេះ។ លោកបាននាំមកនូវការសាកសួរសុខទុក្ខ និងសេចក្តីនឹករលឹកពីសំណាក់សម្ដេចប្រធានគណបក្សប្រជាជនកម្ពុជា និងសម្ដេចអនុប្រធានគណបក្សជូនដល់ក្រុមគ្រួសារលោក លោកស្រី ដែលបានចូលរួមជីវភាពនយោបាយជាមួយគណបក្សប្រជាជនកម្ពុជា។ លោក ទី ប៊ុនថេង បានសង្កត់ធ្ងន់ថា គណបក្សប្រជាជនកម្ពុជា គឺជាគណបក្សតែមួយគត់ ដែលបានជួយប្រជាជនតាំងពីដើមរៀងមក គ្រប់កាលៈទេសៈទាំងអស់ ហើយជាគណបក្សដែលប្រជាពលរដ្ឋគ្រប់និន្នាការនយោបាយអាចរស់នៅជាមួយគ្នាបាន។

លោក ទី ប៊ុនថេង បានបន្តថា ព្រឹត្តិការណ៍នៃការចុះទទួលភ្នាក់ងារ និងសកម្មជនគាំទ្រគណបក្សភ្លើងទៀន នៅឃុំការហែង មិនមែនជាករណីដោយឡែកនោះទេ ប៉ុន្តែជាពិធីដែលបានកើតឡើងនៅទូទាំងប្រទេស គ្រប់ឃុំ សង្កាត់ ក្រុង ស្រុក រាជធានី ខេត្ត។ នេះគឺជាភស្តុតាងបញ្ជាក់យ៉ាងច្បាស់ថា គណបក្សប្រជាជនកម្ពុជា នៅតែជាគណបក្សដែលទទួលបានការគាំទ្រ និងគោរពស្រឡាញ់យ៉ាងភ្លូកទឹកភ្លូកដីពីប្រជាពលរដ្ឋ។

លោកបានបន្ថែមទៀតថា ក្រោមម្លប់សន្តិភាពរបស់សម្ដេចតេជោ ហ៊ុន សែន ប្រធានគណបក្សប្រជាជនកម្ពុជា ប្រជាពលរដ្ឋមានលទ្ធភាពគ្រប់គ្រាន់សម្រាប់បន្តការអភិវឌ្ឍសេដ្ឋកិច្ចគ្រួសារ និងសេដ្ឋកិច្ចសង្គមជាតិ។ ដូច្នេះ មានតែគណបក្សប្រជាជនកម្ពុជានោះទេ ដែលបានស្វែងរកសន្តិភាព និងការអភិវឌ្ឍជូនប្រជាជន ខុសពីគណបក្សប្រឆាំងមួយចំនួន ដែលមានតែការញុះញង់ បំផ្លាញផលប្រយោជន៍ជាតិ និងបង្កអស្ថិរភាពសង្គមជាតិ។ នេះគឺជាការគូសបញ្ជាក់ពីសមិទ្ធផលធំៗរបស់គណបក្សប្រជាជនកម្ពុជា ដែលសម្រេចបានសម្រាប់បុព្វហេតុនៃការកសាងសន្តិភាព និងការអភិវឌ្ឍជូនប្រជាជនកម្ពុជា៕