(កំពត)៖ លោក សាយ សំអាល់ ឧបនាយករដ្ឋមន្ត្រី រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ និងជាប្រធានក្រុមការងាររាជរដ្ឋាភិបាលចុះមូលដ្ឋានខេត្តកំពត បានជំរុញនិងលើកទឹកចិត្តឱ្យក្រុមការងាររាជរដ្ឋាភិបាល មន្ត្រីជំនាញ អាជ្ញាធរ និងភាគីពាក់ព័ន្ធនៅក្នុងខេត្តកំពត បន្តយកចិត្តទុកដាក់ និងលើកកម្ពស់វិស័យសំខាន់ៗ ចំនួន៩ រួមមាន៖ វិស័យអប់រំ, សុខាភិបាល, សាធារណៈការ, ឧស្សាហកម្ម, ធនធានទឹក, សន្តិសុខសណ្តាប់ធ្នាប់, ទេសចរណ៍, ការងារដែនដី និងមូលនិធិជាតិជំនួយសង្គម ឱ្យបានកាន់តែល្អប្រសើរ ដើម្បីឆ្លើយតបតាមផែនការអភិវឌ្ឍប្រទេស ឆ្នាំ២០៥០ កម្ពុជាជាប្រទេសមានប្រាក់ចំណូលខ្ពស់។

ឧបនាយករដ្ឋមន្ត្រី សាយ សំអាល់ ជំរុញដូច្នេះ ខណៈអញ្ជើញចូលរួមជាអធិបតីក្នុងកិច្ចប្រជុំបូកសរុបលទ្ធផលការងារប្រចាំឆមាសទី១ ឆ្នាំ២០២៦ និងទិសដៅអនុវត្តបន្ត របស់ក្រុមការងាររាជរដ្ឋាភិបាលចុះមូលដ្ឋានខេត្តកំពត ដែលប្រព្រឹត្តទៅនៅសាលសន្និសីទខេត្តកំពត នាថ្ងៃទី៤ ខែកក្កដា ឆ្នាំ២០២៦។

ឧបនាយករដ្ឋមន្ត្រី សាយ សំអាល់ បានបន្តថា ក្នុងយុទ្ធសាស្ត្របញ្ចកោណដំណាក់កាលទី១ របស់រាជរដ្ឋាភិបាលក្នុងអាណតិ្តទី៧នេះ គឺតម្រូវឱ្យវិស័យមួយចំនួនខាងលើ ត្រូវមានការពង្រឹងគុណភាព យកចិត្តទុកដាក់ផ្តល់សេវាសាធារណៈជូនពលរដ្ឋឱ្យបានល្អប្រសើរ ពិសេសមានទិសដៅការងារច្បាស់លាស់ ដើម្បីជួយជ្រោងការអនុវត្តយុទ្ធសាស្ត្របញ្ចកោណឱ្យទទួលបានជោគជ័យ។

លោក ម៉ៅ ធនិន អភិបាលខេត្តកំពត បានលើកឡើងថា សម្រាប់ឆមាសទី១ ឆ្នាំ២០២៦ ក្រុមការងាររាជរដ្ឋាភិបាលចុះតាមបណ្តាមូលដ្ឋានឃុំ-សង្កាត់ ក្រុង-ស្រុក បានរៀបចំធ្វើវេទិការសាធារណៈសរុបចំនួន ៤២៦លើក ទទួលបានបញ្ហាប្រឈម និងសំណូមពរពីប្រជាពលរដ្ឋ ចំនួន ៧៩២ករណី។ ហើយបានដោះស្រាយនៅក្នុងវេទិកាចំនួន ៥៣៤ករណី ដោះស្រាយនៅថ្នាក់ឃុំ ស្រុក ខេត្ត ចំនួន ១១៧ករណី នឹងកំពុងដោះស្រាយនៅក្នុង ឃុំ-សង្កាត់ ក្រុង-ស្រុក ខេត្ត ចំនួន ២៦១ករណី មិនទាន់បានដោះស្រាយ ៣១ករណី និងស្នើទៅថ្នាក់ជាតិចំនួន ៦ករណី។ ជាមួយគ្នានេះដែរ ក្រុមការងារក៏បានសម្របសម្រួលដោះស្រាយវិវាទក្រៅប្រព័ន្ធតុលាការនៅទូទាំងខេត្តបានចំនួន ១៤៣ករណីផងដែរ៕